အဆိုပါ တင်ပို့မှု၏ တန်ဖိုးမှာ ဘတ် ၁၁၄.၈၂ ဘီလီယံကျော်ရှိခဲ့ပြီး ထိုင်းဒူးရင်းသီး၏ အရည်အသွေးအပေါ် တရုတ်ဝယ်ယူသူများ၏ ဆက်လက်ယုံကြည်မှုကို ထိန်းထားနိုင်ခြင်းကို ပေါ်လွင်စေသည်။ ယခုကဲ့သို့ အောင်မြင်ရခြင်းမှာ ဈေးကွက်ချဲ့ထွင်ရေး၊ ကုန်သွယ်မှုလွယ်ကူချောမွေ့စေရေးနှင့် ထုတ်ကုန်စံချိန်စံညွှန်းများ ထိန်းသိမ်းရေးတို့တွင် အစိုးရဌာနများ၊ ပုဂ္ဂလိကလုပ်ငန်းများနှင့် တောင်သူလယ်သမားများအကြား ပူးပေါင်းဆောင်ရွက်မှုကြောင့် ဖြစ်ကြောင်း Suphajee က ပြောကြားခဲ့သည်။

ကူးသန်းရောင်းဝယ်ရေး ဝန်ကြီးဌာနအနေဖြင့် ပို့ကုန်ပမာဏ ပိုမိုတိုးတက်လာစေရန် အထူးသဖြင့် လက်ရှိအချိန်မှာ ဈေးကွက်ထဲ စတင်ဝင်ရောက်လာပြီဖြစ်သည့် တောင်ပိုင်းဒေသထွက် ဒူးရင်းသီးများကို ဖြန့်ဖြူးပေးနိုင်ရန်အတွက် ကဏ္ဍအသီးသီးဖြင့် ဆက်လက်ပူးပေါင်း ဆောင်ရွက် သွားမည် ဖြစ်ကြောင်းမှတ်ချက်ပြုခဲ့သည်။

၂၀၂၆ ခုနှစ်တွင် ထိုင်းနိုင်ငံ၏ ဒူးရင်းသီး ထုတ်လုပ်မှုသည် ၃၀ ရာခိုင်နှုန်းခန့် တိုးတက်လာမည်ဟု ခန့်မှန်းထားသည်။ ထို့ကြောင့် ဝန်ကြီးဌာနက DITP အား တရုတ်နိုင်ငံအတွင်း ဈေးကွက်မဟာဗျူဟာကို အရှိန်မြှင့်ရန်၊ ရောင်းချသည့် လမ်းကြောင်းများကို ချဲ့ထွင်ရန်နှင့် လတ်ဆတ်သောဒူးရင်းသီး အနည်းဆုံး တန်ချိန် ၁ သန်း တင်ပို့နိုင်ရေး အကောင်အထည်ဖော်ရန် ညွှန်ကြားခဲ့ခြင်းဖြစ်သည်။

ထို့အပြင် ဝန်ကြီးဌာနသည် ထုတ်လုပ်သူများနှင့် ပြည်တွင်းဝယ်ယူသူများကို ချိတ်ဆက်ပေးခြင်း၊ ပြည်ပဈေးကွက်များကို ချဲ့ထွင်ခြင်းနှင့် တန်ဖိုးမြှင့် ထုတ်ကုန်များဖြစ်အောင် ပြုပြင်မွမ်းမံခြင်းများကို အားပေးခြင်းဖြင့် သစ်သီးဝလံ စီမံခန့်ခွဲမှုဆိုင်ရာ ဟန်ချက်ညီ ဘက်စုံချဉ်းကပ်မှု နည်းလမ်းကို ကျင့်သုံးလျက်ရှိသည်။ အဆိုပါ စီမံဆောင်ရွက်ချက်များသည် ထိုင်းသစ်သီးများကို ဈေးကွက်များသို့ ပိုမိုထိရောက်စွာ ရောက်ရှိစေရန် ကူညီပေးနိုင်ရန် ရည်ရွယ်ခြင်းဖြစ်ကြောင်း သိရှိရပါသည်။

Source : Nation Thailand

DOCA (ရန်ကုန်)

ဒူးရင်းနှင့် အခြားစိုက်ပျိုးရေး ထွက်ကုန် ပို့ကုန်များအတွက် အခွန်ကောက်ခံမှု အမြန်ဆောင်ရွက်ရန် အကောက်ခွန်ဌာန ညွှန်ကြား

ပြည်ပကုန်သွယ်မှုသတင်းများ

ဗီယက်နမ်နိုင်ငံ အကောက်ခွန်ဦးစီးဌာနသည် နယ်စပ်ဂိတ်များတွင် စိုက်ပျိုးရေး ပို့ကုန်များ၊ အထူးသဖြင့် ဒူးရင်းသီး တင်ပို့မှုများကို အမြန်ဆုံး အကောက်ခွန် ပေးဆောင်နိုင်အောင် ဆောင်ရွက် ပေးရန် ဒေသဆိုင်ရာ အကောက်ခွန်ဌာနခွဲများကို ညွှန်ကြားလိုက်သည်။

ဇူလိုင်လ ၁၆ ရက်နေ့ ထုတ်ပြန်ခဲ့သည့် ညွှန်ကြားချက်တစ်ခုတွင် အကောက်ခွန်ဦးစီးဌာနသည် ပုံမှန်ရုံးချိန်ပြင်ပ အပါအဝင် တင်ပို့သည့် စိုက်ပျိုးရေး၊ သစ်တောနှင့် ရေထွက်ကုန် ပစ္စည်းများအတွက် အကောက်ခွန်ရှင်းလင်းရေးကို တစ်ရက်တည်းဖြင့်ပြီးစီးအောင် အပြည့်အဝ ကူညီ ဆောင်ရွက်ပေးရန် ဒေသဆိုင်ရာ အကောက်ခွန်ဌာနခွဲများသို့ တောင်းဆိုထားသည်။ ထို့ပြင် ညနေပိုင်း၊ စနေ၊ တနင်္ဂနွေနှင့် အစိုးရရုံးပိတ်ရက်များတွင်ပါ ပို့ကုန်တင်ပို့မှုများကို အကောက်ခွန် လုပ်ထုံးလုပ်နည်းများ ဆောင်ရွက်ရန်နှင့် ကြီးကြပ်ရန် အရာရှိများ တာဝန်ပေးအပ်သွားရန် ညွှန်ကြားထားကြောင်း သိရသည်။

ဒေသဆိုင်ရာ ဌာနခွဲများအနေဖြင့် ပို့ကုန်အကောက်ခွန် ရှင်းလင်းရေးကာလအတွင်း ကြုံတွေ့ရသည့် မည်သည့်ပြဿနာကိုမဆို ချက်ချင်းဖြေရှင်းပေးရန် လိုအပ်သည်။ မိမိတို့၏ လုပ်ပိုင်ခွင့်အာဏာထက် ကျော်လွန်သောကိစ္စရပ်များကို လမ်းညွှန်မှုခံယူနိုင်ရန် ဦးစီးဌာနသို့ ကြန့်ကြာမှုမရှိဘဲ သတင်းပို့ရမည်ဖြစ်သည်။

စိုက်ပျိုးရေး၊ သစ်တောနှင့် ရေထွက်ကုန်ပစ္စည်းများ၏ အရည်အသွေးကို ထိန်းသိမ်းရာတွင် အထောက်အကူဖြစ်စေရန်အတွက် တင်ပို့ရန် စောင့်ဆိုင်းနေသည့် ကုန်ပစ္စည်းများကို သိုလှောင်ရန်နှင့် အမျိုးအစားခွဲခြားရန် သင့်တော်သော အဆောက်အအုံများ စီစဉ်ပေးနိုင်ရေး နယ်စပ်ဂိတ်များရှိ ဂိုဒေါင်နှင့် ကုန်သိုလှောင်ရုံ လုပ်ငန်းရှင်များနှင့် ညှိနှိုင်းဆောင်ရွက်ရမည်ဖြစ်သည်။

၎င်းတို့အနေဖြင့် မိမိတို့နယ်မြေအတွင်းရှိ စိုက်ပျိုးရေး၊ သစ်တောနှင့် ရေထွက်ကုန်များ တင်ပို့မှု တိုးတက်ဖြစ်ထွန်းမှုကို ပုံမှန်စောင့်ကြည့်ရန်၊ ဒေသတွင်း နယ်စပ်ဂိတ်များကို အသုံးပြုနေသည့် ပို့ကုန်တင်ပို့သူများထံ အချိန်မီ သတင်းအချက်အလက်နှင့် အကြံပြုချက်များပေးပို့ရန်၊ ယာဉ်ကြော ပိတ်ဆို့မှုကြောင့် အကောက်ခွန်ရှင်းလင်းရေး ထိခိုက်မှုမရှိစေရန် သက်ဆိုင်ရာ အာဏာပိုင်များနှင့် နီးကပ်စွာ ပူးပေါင်းဆောင်ရွက်ရန်လည်း ညွှန်ကြားထားသည်။

အကောက်ခွန် ရှင်းလင်းရေး ကာလအတွင်း ဖြစ်ပေါ်လာသော ပြဿနာများကို အချိန်နှင့် တပြေးညီ ဖြေရှင်းနိုင်ရန် သက်ဆိုင်ရာ တရုတ်နယ်စပ်ဂိတ်ရှိ အကောက်ခွန် အာဏာပိုင်များနှင့် ပုံမှန်ဆက်သွယ်သွားရမည်ဖြစ်ပြီး၊ ဗီယက်နမ် ပို့ကုန်လုပ်ငန်းရှင်များအနေဖြင့် စည်းမျဉ်းစည်းကမ်းများနှင့် ညီညွတ်မှုရှိစေရန်အတွက် တရုတ်နိုင်ငံ၏ အကောက်ခွန်စီမံခန့်ခွဲမှုနှင့် စစ်ဆေးရေး မူဝါဒဆိုင်ရာ အပြောင်းအလဲများကို အသိပေးအကြောင်းကြားသွားရမည်ဖြစ်ကြောင်း သိရှိရပါသည်။

Source : VN Express

DOCA (ရန်ကုန်)

၂၀၂၆ ခုနှစ် ပထမခြောက်လအတွင်း တရုတ်နိုင်ငံ၏ စက်ကိရိယာထုတ်လုပ်မှုက ပို့ကုန်တိုးတက်မှုကို ဦးဆောင်

ပြည်ပကုန်သွယ်မှုသတင်းများ

၂၀၂၆ ခုနှစ် ပထမခြောက်လအတွင်း တရုတ်နိုင်ငံ၏ စက်ကိရိယာထုတ်လုပ်မှု ကဏ္ဍသည် ပို့ကုန်တိုးတက်မှု၏ အဓိကမောင်းနှင်အား ဖြစ်လာခဲ့ပြီး စက်ကိရိယာစက်မှုလုပ်ငန်း၏ ပို့ကုန်ပစ္စည်း တင်ပို့မှုတန်ဖိုးမှာ ယခင်နှစ် ကာလတူထက် ၁၈.၂ ရာခိုင်နှုန်း မြင့်တက်ခဲ့ကာ စက်မှုပို့ကုန် တိုးတက်မှု၏ နီးပါး ၅၀ ရာခိုင်နှုန်းကို ပါဝင်ပံ့ပိုးပေးခဲ့ကြောင်း တရားဝင်အချက် အလက်များက ဇူလိုင်လ ၂၀ ရက်နေ့တွင် ဖော်ပြခဲ့သည်။

ယခုနှစ် ပထမခြောက်လအတွင်း တရုတ်နိုင်ငံ၏ လေအားလျှပ်စစ် တာဘိုင်ဂျင်နရေတာ နှင့် lithium batteries တင်ပို့မှုသည် ယခင်နှစ် ကာလတူထက် အသီးသီး ၃၅.၆ ရာခိုင်နှုန်းနှင့် ၃၇.၆ ရာခိုင်နှုန်း စီ တိုးတက်ခဲ့ပြီး မော်တော်ယာဉ်တင်ပို့မှုမှာ စီးရေ ၅.၀၉၆ သန်းအထိ ရောက်ရှိခဲ့ကာ ယခင်နှစ်ထက် ၆၅.၃ ရာခိုင်နှုန်း မြင့်တက်လာကြောင်း စက်မှုနှင့် သတင်းအချက်အလက် နည်းပညာဝန်ကြီးဌာနမှ တာဝန်ရှိသူ Wang Weiming ၏ ပြောကြားချက်အရ သိရသည်။

တရုတ်နိုင်ငံ၏ သင်္ဘောတည်ဆောက်ရေးကဏ္ဍသည်လည်း ကမ္ဘာ့ယှဉ်ပြိုင်နိုင်စွမ်းကို ဆက်လက်မြှင့်တင်နိုင်ခဲ့သည်။ ၂၀၂၆ ခုနှစ် နှစ်စပိုင်းကတည်းက တရုတ်နိုင်ငံ၏ စက်ကိရိယာ ထုတ်လုပ်မှု စက်မှုလုပ်ငန်းသည် ခိုင်မာသောအုတ်မြစ်ရှိခြင်း၊ တိုးတက်မှုများပြားခြင်းနှင့် ပြင်ပ ဝယ်လိုအား အားကောင်းခြင်း စသည့် လက္ခဏာများကိုပြသခဲ့သည်ဟု Wang က ပြောကြားခဲ့သည်။

ယင်းကဏ္ဍ၏ (value-added) ထုတ်လုပ်မှုမှာ ပထမခြောက်လအတွင်း ယခင်နှစ် ကာလတူထက် ၆.၄ ရာခိုင်နှုန်း တိုးတက်ခဲ့ပြီး သတ်မှတ်ပမာဏထက်ကျော်လွန်သော စက်မှုလုပ်ငန်းများ စုစုပေါင်းထုတ်လုပ်မှုပမာဏ၏ ၂၀ ရာခိုင်နှုန်းအထိရှိခဲ့သည်။ ယင်းသည် စက်မှုလုပ်ငန်း ထပ်ဆောင်းတန်ဖိုး ထုတ်လုပ်မှုတိုးတက်မှု၏ ၂၃.၅ ရာခိုင်နှုန်းကို ပါဝင်ပံ့ပိုးပေးခဲ့ပြီး စက်မှုလုပ်ငန်းငြိမ်ဝပ်စွာ တိုးတက်ရေးအတွက် အားကောင်းသော အထောက်အပံ့ပေးခဲ့ကြောင်း Wang က မှတ်ချက်ပြုခဲ့သည်။

ထို့ပြင် အရည်အသွေးမြင့် ထုတ်လုပ်မှုစွမ်းအားသစ်များလည်း ဆက်လက်တိုးချဲ့နိုင်ခဲ့ရာ စက်မှုလုပ်ငန်းသုံး စက်ရုပ်များနှင့် ဝန်ဆောင်မှုသုံးစက်ရုပ်များ ထုတ်လုပ်မှုသည် ယခင်နှစ် ကာလတူထက် အသီးသီး ၂၈ ရာခိုင်နှုန်းနှင့် ၁၁.၉ ရာခိုင်နှုန်း တိုးတက်ခဲ့သည်။

စက်ကိရိယာထုတ်လုပ်မှုနှင့် အဆင့်မြင့်နည်းပညာ ထုတ်လုပ်မှုများအားကောင်းစွာ တိုးတက်ခဲ့ခြင်းကြောင့် ၂၀၂၆ ခုနှစ် ပထမခြောက်လအတွင်း တရုတ်နိုင်ငံ၏ စက်မှုထုတ်လုပ်မှု ထပ်ဆောင်းတန်ဖိုးမှာ ခိုင်မာသောနှုန်းထားဖြင့် တိုးတက်ခဲ့ကြောင်း အစောပိုင်း အချက်အလက်များက ဖော်ပြခဲ့ကြောင်း သိရှိရပါသည်။

Source : Xinhua

DOCA (ရန်ကုန်)

ဗီယက်နမ်တွင်စပါးခွံတန်ချိန် ၁ သန်းကိုအသုံးပြု၍ Ferrosilicon သတ္တုစပ်ထုတ်လုပ်မည့် စက်ရုံစီမံကိန်းကို ဆွေးနွေးခဲ့သည့် ကာဇတ်စတန်သံအမတ်ကြီး

ပြည်ပကုန်သွယ်မှုသတင်းများ

ဗီယက်နမ်နိုင်ငံ Dong Thap ပြည်နယ် ပြည်သူ့ကော်မတီသည် ဇူလိုင် ၁၈ ရက်တွင် ဗီယက်နမ်နိုင်ငံဆိုင်ရာ ကာဇက်စတန်သံအမတ်ကြီးနှင့်တွေ့ဆုံကာ မဲခေါင်မြစ်ဝကျွန်းပေါ်ဒေသမှ စပါးခွံတန်ချိန် ၁ သန်းကိုအသုံးပြု၍ လျှပ်စစ်ဓာတ်အားနှင့် သံချေးတက်မှုကာကွယ်ရေးလုပ်ငန်း များတွင်အသုံးပြုသည့် Ferrosilicon သတ္တုစပ် ထုတ်လုပ်မည့်စက်ရုံ တည်ဆောက်ရေးစီမံကိန်း ကို ဆွေးနွေးခဲ့ကြောင်း သိရပါသည်။ ကာဇက်စတန်သံအမတ်ကြီး Kanat Tumysh က အဆိုပါ စီမံကိန်းသည် စွမ်းအင်၊ စိုက်ပျိုးရေးနှင့် အဆင့်မြင့်နည်းပညာကဏ္ဍများတွင် စီးပွားရေးဖွံ့ဖြိုး တိုးတက်မှုကိုမြှင့်တင်ရန် ရည်ရွယ်ထားကြောင်း ပြောကြားခဲ့ပါသည်။ စီမံကိန်းအရ နှစ်စဉ် စိုက်ပျိုးရေးဘေးထွက်ပစ္စည်းဖြစ်သည့် စပါးခွံ တန်ချိန် ၁ သန်းကိုအသုံးပြုကာ လျှပ်စစ်ဓာတ်အားနှင့် Ferrosilicon သတ္တုစပ်များ ထုတ်လုပ်သွားမည်ဖြစ်ကြောင်း သိရပါသည်။ စပါးခွံ ကုန်ကြမ်းကို Quang Ninh၊ Can Tho၊ An Giang နှင့် Dong Thap ဒေသလေးခုမှ ရယူသွားမည် ဖြစ်ကြောင်း သိရပါသည်။ စီမံကိန်း အောင်မြင်စွာအကောင်အထည်ဖော်နိုင်ရန် Can Tho၊ An Giang နှင့် Dong Thap ဒေသများရှိ တောင်သူလယ်သမားများ၊ သမဝါယမအသင်းများ၊ သယ်ယူပို့ဆောင်ရေးလုပ်ငန်းရှင်များနှင့် ဒေသဆိုင်ရာအာဏာပိုင်များအကြား နီးကပ်စွာ ပူးပေါင်း ဆောင်ရွက်ရန်လိုအပ်ကြောင်း သံအမတ်ကြီးက ပြောကြားခဲ့ပါသည်။ ရင်းနှီးမြှုပ်နှံသူဘက်မှ အဆိုပြုထားသည့် စက်ရုံတည်နေရာသည် အဓိကသတ်မှတ်ချက်သုံးရပ်နှင့် ကိုက်ညီရမည် ဖြစ်ကြောင်း သိရပါသည်။ ၎င်းတို့မှာ စပါးခွံအမြောက်အမြားသယ်ယူနိုင်ရန် အတွင်းရေကြောင်း သယ်ယူပို့ဆောင်ရေးလွယ်ကူသည့်နေရာဖြစ်ရန်၊ ထုတ်လုပ်မည့်လျှပ်စစ်ဓာတ်အား ၁၆၀ မဂ္ဂါဝပ် အထိကို အမျိုးသားဓာတ်အားလိုင်းသို့ပို့လွှတ်နိုင်ရန်အတွက် ဗို့အားမြင့်ဓာတ်အားလိုင်းအနီးတွင် တည်ရှိရန်နှင့် Dong Thap၊ An Giang နှင့် Can Tho ဒေသများရှိ စပါးခွံထွက်ရှိမှုများသည့် ဧရိယာအတွင်းတည်ရှိရန်တို့ဖြစ်ကြောင်း သိရပါသည်။ ထို့အပြင် Dong Thap ပြည်နယ်ရှိ ဆန်ကြိတ်လုပ်ငန်းကြီးများနှင့် ချိတ်ဆက်ပေးရန်လည်း ဒေသအာဏာပိုင်များထံ အကူအညီ တောင်းခံထားပြီး စပါးခွံများကို မူလထုထည်၏ လေးပုံတစ်ပုံအထိ ဖိသိပ်ကာ အလေးချိန် ၄၀၀ ကီလိုဂရမ်ရှိအတုံးများအဖြစ်ပြုလုပ်နိုင်ပါက သယ်ယူပို့ဆောင်ရေးနှင့် ကိုင်တွယ်မှုပိုမိုထိရောက် လာမည်ဖြစ်ကြောင်း သိရပါသည်။ ထို့ပြင် ကုန်ကြမ်းသယ်ယူရန် အတွင်းရေကြောင်းကုန်တင် သင်္ဘောလုပ်ငန်းများနှင့်လည်း ချိတ်ဆက်ပေးစေလိုကြောင်း သံအမတ်ကြီးက ပြောကြားခဲ့ပါသည်။ Dong Thap ပြည်နယ်ပြည်သူ့ကော်မတီ ဒုတိယဥက္ကဋ္ဌ Nguyen Thanh Dieu က ပြည်နယ်တွင် နှစ်စဉ် စပါးစိုက်ဧက ၆၁၁,၀၀၀ ခန့်ရှိပြီး ဆန်ကြိတ်စက်လုပ်ငန်း ၆၈ ခုမှ ဆန် တန်ချိန် ၃ သန်းကျော်နှင့် စပါးခွံ တန်ချိန် ၆၀၀,၀၀၀ ခန့် ထွက်ရှိကြောင်း ပြောကြားခဲ့ပါသည်။ ၎င်းက ထွက်ရှိသည့်စပါးခွံများအနက် တန်ချိန် ၃၀၀,၀၀၀ ခန့်ကို ဆန်ကြိတ်စက်များက မိမိလုပ်ငန်းများအတွက် လောင်စာအဖြစ်နှင့် ဇီဝလောင်စာတောင့် (biomass pellets) ထုတ်လုပ်ရာတွင် အသုံးပြုနေပြီး ကျန်ရှိသည့်ပမာဏကို အကျိုးရှိစွာ အသုံးချနိုင်ရေး လိုအပ်နေကြောင်းနှင့် စက်ရုံတည်ဆောက်ရန် သင့်လျော်သည့်နေရာနှစ်ခုအဖြစ် ဧက ၂၆၀ ကျယ်ဝန်းသည့် Lai Vung စက်မှုဥယျာဉ်နှင့် ဧက ၄၉ ကျယ်ဝန်းသည့် Dinh An စက်မှုအစုအဖွဲ့တို့ကို အဆိုပြုခဲ့ကြောင်း ပြောကြားခဲ့ပါသည်။ သို့သော် Lai Vung စက်မှုဥယျာဉ်တွင် စပါးခွံကို တန်ဖိုးမြင့်စက်မှုထုတ်ကုန် များအဖြစ် ပြောင်းလဲထုတ်လုပ်သည့်လုပ်ငန်းမရှိသေးကြောင်း သိရပါသည်။ ထို့ကြောင့် ပြည်နယ် စိုက်ပျိုးရေးနှင့် သဘာဝပတ်ဝန်းကျင်ဦးစီးဌာနအား ရင်းနှီးမြှုပ်နှံသူသတ်မှတ်ထားသည့် အဓိက လိုအပ်ချက်သုံးရပ်နှင့်ကိုက်ညီသည့်နေရာကို ရွေးချယ်တင်ပြရန်တာဝန်ပေးအပ်ခဲ့ပြီး ဆောက်လုပ်ရေးဌာနအားလည်း စက်မှုဥယျာဉ်များနှင့် စက်မှုအစုအဖွဲ့များအတွင်းရရှိနိုင်သည့် မြေနေရာများကို စစ်တမ်းကောက်ယူကာ ရင်းနှီးမြှုပ်နှံမှုများကို အမြန်ဆုံးဆွဲဆောင်နိုင်ရေး ဆောင်ရွက်ရန် ညွှန်ကြားခဲ့ကြောင်း သိရှိရပါသည်။

Vietnam Plus

DOCA (ရန်ကုန်)

နို့စားနွားမွေးမြူရေးခြံတွင် ရင်းနှီးမြှုပ်နှံသူများအတွက် လိုင်စင်လွယ်ကူမြန်ဆန်စွာထုတ်ပေးမည့် အင်ဒိုနီးရှား

ပြည်ပကုန်သွယ်မှုသတင်းများ

အင်ဒိုနီးရှားနိုင်ငံ စိုက်ပျိုးရေးဝန်ကြီး Andi Amran Sulaiman က နိုင်ငံ၏ နို့ဖူလုံရေးအစီ အစဉ်ကိုအရှိန်မြှင့်တင်နိုင်ရန်နှင့် ပြည်ပမှနို့တင်သွင်းမှုအပေါ် မှီခိုနေရမှုကိုလျှော့ချနိုင်ရန် ခေတ်မီ နို့စားနွားမွေးမြူရေးခြံများတည်ဆောက်မည့် ရင်းနှီးမြှုပ်နှံသူများအတွက် လိုင်စင်ထုတ်ပေးရေး လုပ်ငန်းစဉ်များကို ပိုမိုလွယ်ကူမြန်ဆန်စွာ ဆောင်ရွက်ပေးမည်ဖြစ်ကြောင်း ပြောကြားခဲ့ပါသည်။ ဝန်ကြီးက အစိုးရအနေဖြင့် ရင်းနှီးမြှုပ်နှံမှုများကိုအားပေးကူညီရန်ကတိပြုထားပြီး လိုင်စင်ထုတ်ပေးရေးလုပ်ငန်းစဉ်အားလုံးကို အရှိန်မြှင့်ဆောင်ရွက်ပေးသွားမည်ဖြစ်သဖြင့် စီမံကိန်းများကို အချိန်မီအကောင်အထည်ဖော်နိုင်ကာ ပြည်သူများအတွက် အကျိုးဖြစ်ထွန်းစေမည်ဖြစ်ကြောင်း ဇူလိုင် ၂၁ ရက်တွင် ထုတ်ပြန်သော ကြေညာချက်၌ ဖော်ပြထားပါသည်။ ဝန်ကြီးက ရင်းနှီးမြှုပ်နှံ သူများအနေနှင့် စိုက်ပျိုးရေးဝန်ကြီးဌာနကခွင့်ပြုမိန့်လိုအပ်ပါက ၎င်းတို့ဝန်ထမ်းများကကိုယ်တိုင် ကူညီဆောင်ရွက်ပေးမည်ဖြစ်ကြောင်း ပြောကြားခဲ့ပါသည်။ ထို့ပြင် လျှောက်ထားသူများအနေဖြင့် လျှောက်လွှာစာရွက်စာတမ်းများကို WhatsApp သတင်းအချက်အလက်ဌာနသို့ ဒစ်ဂျစ်တယ်စနစ် ဖြင့်ပေးပို့နိုင်ပြီး ဦးစားပေးဆောင်ရွက်မှုရရှိမည်ဖြစ်ကြောင်း သိရပါသည်။ အစိုးရသည် ပြည်တွင်းနှင့် ပြည်ပရင်းနှီးမြှုပ်နှံသူများအား အင်ဒိုနီးရှား၏ နို့ထွက်လုပ်ငန်းကဏ္ဍ ဖွံ့ဖြိုးတိုးတက်ရေးတွင် ပူးပေါင်းရင်းနှီးမြှုပ်နှံရန် ဖိတ်ခေါ်ထားကြောင်း သိရပါသည်။ ဝန်ကြီး၏ပြောကြားချက်အရ ပြည်တွင်းနို့လိုအပ်ချက်ကို ဖြည့်ဆည်းနိုင်ရန် အကြီးစားခေတ်မီနို့စားနွားမွေးမြူရေးခြံ အနည်းဆုံး ၂၀ ခန့်လိုအပ်နေပြီး လက်ရှိတွင်အင်ဒိုနီးရှားသည် နို့တင်သွင်းမှုအပေါ်အားထားနေရဆဲဖြစ်ကြောင်း သိရပါသည်။ Amran သည် အလယ်ပိုင်းဂျာဗားပြည်နယ် brebes ခရိုင်၌ တစ်နှစ်လျှင် နို့စိမ်း တန်ချိန် ၁၈၀,၀၀၀ ထုတ်လုပ်နိုင်သည့် ပေါင်းစည်းစိုက်ပျိုးမွေးမြူရေးစီမံကိန်းကို ဖွင့်လှစ်ပေးခဲ့ကြောင်း သိရပါသည်။ အဆိုပါစီမံကိန်းသည် အင်ဒိုနီးရှား၏ နို့လိုအပ်ချက် ၂၀ ရာခိုင်နှုန်းခန့်ကို ဖြည့်ဆည်းပေးနိုင်မည်ဖြစ်ပြီး နိုင်ငံ၏ နို့ဖူလုံရေးအစီအစဉ်ကို အရှိန်မြှင့်တင်ရန်လိုအပ်သည့် ရင်းနှီးမြှုပ်နှံမှုပုံစံအတွက် စံပြစီမံကိန်းတစ်ခု ဖြစ်လာမည်ဟု မျှော်မှန်းထားကြောင်း သိရပါသည်။ အင်ဒိုနီးရှားသည် လက်ရှိတွင် နိုင်ငံ၏ နို့လိုအပ်ချက်၏ ၈၀ ရာခိုင်နှုန်းခန့်ဖြစ်သော တစ်နှစ်လျှင် တန်ချိန် ၃ ဒသမ ၆ သန်းမှ ၃ ဒသမ ၈ သန်းအထိကို ပြည်ပမှ တင်သွင်းနေရသေးသည့်အတွက် နို့ထွက်လုပ်ငန်းကဏ္ဍတွင် ရင်းနှီးမြှုပ်နှံမှုအခွင့်အလမ်းများ အလွန်ကြီးမားကြောင်း သိရပါသည်။ ထို့အပြင် နိုင်ငံ၏နို့ထွက်လုပ်ငန်းဂေဟစနစ် အားကောင်းလာစေရန် အသေးစားနို့စားနွားမွေး မြူရေးတောင်သူများကို ပိုမိုအားပေးမြှင့်တင်ရန်အရေးကြီးကြောင်း ဝန်ကြီးက ပြောကြားခဲ့ပါသည်။ လက်ရှိတွင် အင်ဒိုနီးရှား၌ နို့စားနွားမွေးမြူရေးတောင်သူ ၅၀,၀၀၀ ခန့်ရှိပြီး နို့ဖူလုံမှုရရှိရန် ထုတ်လုပ်မှုစွမ်းရည်ရှိသော တောင်သူ အနည်းဆုံး ၁၀၀,၀၀၀ ခန့် လိုအပ်မည်ဟု ခန့်မှန်းထား ကြောင်း သိရပါသည်။ အစိုးရ၊ ပုဂ္ဂလိကကဏ္ဍနှင့် နိုင်ငံပိုင်လုပ်ငန်းများ ပူးပေါင်းဆောင်ရွက်မှသာ နိုင်ငံ၏ နို့ဖူလုံရေးရည်မှန်းချက်ကို အောင်မြင်နိုင်မည်ဖြစ်ကြောင်းလည်း ၎င်းက အလေးပေး ပြောကြားခဲ့ပါသည်။ တစ်ဖက်တွင်လည်း Savoria Group ၏ အမှုဆောင်အရာရှိချုပ် Ihsan Mulia Putri က brebes ရှိ ပေါင်းစည်းစိုက်ပျိုးမွေးမြူရေးစီမံကိန်းသည် နိုင်ငံ၏ နို့ဖူလုံရေး ရည်မှန်းချက်ကို အကောင်အထည်ဖော်ရန် အစိုးရ၏ ကြိုးပမ်းအားထုတ်မှုကို ကုမ္ပဏီအနေဖြင့် အပြည့်အဝထောက်ခံကြောင်း ပြသခြင်းဖြစ်သည်ဟု ပြောကြားခဲ့ပါသည်။ ၎င်းက စိုက်ပျိုးရေး ဝန်ကြီးဌာန၊ အလယ်ပိုင်းဂျာဗားပြည်နယ်အစိုးရ၊ brebes ခရိုင်အစိုးရနှင့် သက်ဆိုင်သူအားလုံးနှင့် ပူးပေါင်းပြီး ကိုယ်ပိုင်ရပ်တည်နိုင်စွမ်းရှိကာ ယှဉ်ပြိုင်နိုင်စွမ်းမြင့်မားသည့် နို့ထွက်လုပ်ငန်းဂေဟ စနစ်ကို တည်ဆောက်သွားရန် အဆင်သင့်ဖြစ်နေကြောင်း ပြောကြားခဲ့ပါသည်။ အဆိုပါစီမံကိန်းအရ နို့စားနွားများအတွက် အစာစိုက်ပျိုးထုတ်လုပ်ပေးမည့် တောင်သူ ၅,၀၀၀ ခန့်နှင့် မိတ်ဖက် ပူးပေါင်းဆောင်ရွက်သွားမည်ဖြစ်ကြောင်း သိရပါသည်။ ထို့ပြင် နှစ်စဉ် နွားအထီး ၇,၀၀၀ ခန့်ကို အဆီတင်မွေးမြူရေးလုပ်ငန်းများတွင် ပူးပေါင်းဆောင်ရွက်သွားမည်ဖြစ်ပြီး နို့စားနွားမွေးမြူရေး တောင်သူ ၁,၀၀၀ မှ ၂,၀၀၀ အထိနှင့်လည်း မိတ်ဖက်ပူးပေါင်းဆောင်ရွက်သွားမည်ဖြစ်ကြောင်း သိရှိရပါသည်။

Antara News

DOCA (ရန်ကုန်)

စား‌သောက်ကုန် ၈ မျိုးတွင် ကိုယ်ပိုင်ဖူလုံမှုရရှိပြီဖြစ်ကြောင်းပြောကြားခဲ့သည့် အင်ဒိုနီးရှားသမ္မတ

ပြည်ပကုန်သွယ်မှုသတင်းများ

အင်ဒိုနီးရှားနိုင်ငံသည် နိုင်ငံတော်ဆန်သိုလှောင်ပမာဏ သမိုင်းတစ်လျှောက် အမြင့်ဆုံးသို့ ရောက်ရှိလာခြင်းနှင့် စိုက်ပျိုးရေးကဏ္ဍရှိ တောင်သူလယ်သမားများ၏လူမှုစီးပွားဘဝ သိသာစွာ တိုးတက်ကောင်းမွန်လာခြင်းတို့ကိုအခြေခံ၍ အဓိကစားသောက်ကုန် ၈ မျိုးတွင် ကိုယ်ပိုင်ဖူလုံမှု ရရှိထားပြီဖြစ်ကြောင်း အင်ဒိုနီးရှားသမ္မတ Prabowo Subianto က ဇူလိုင် ၂၁ ရက်တွင် ပြောကြားခဲ့ပါသည်။ ဂျကာတာမြို့ရှိ နိုင်ငံတော်သမ္မတအိမ်တော်၌ကျင်းပသည့် အစိုးရအဖွဲ့ အစည်းအဝေးတွင် သမ္မတ Prabowo က ထိုအောင်မြင်မှုသည် ကမ္ဘာလုံးဆိုင်ရာ စားနပ်ရိက္ခာ အကျပ်အတည်းဖြစ်ပေါ်လာနိုင်သည့် အန္တရာယ်များကိုကာကွယ်နိုင်မည့် အရေးပါသော အခြေခံ အုတ်မြစ်ဖြစ်ကြောင်း ပြောကြားခဲ့ပါသည်။ ထို့ပြင် တောင်သူလယ်သမားများ၏ ဝယ်ယူနိုင်စွမ်း နှင့် စီးပွားရေးအခြေအနေကိုတိုင်းတာသည့် အရေးပါသောညွှန်းကိန်းဖြစ်သည့် တောင်သူလယ်သမား ဖလှယ်နှုန်း (Farmer’s Exchange Rate - NTP) သည်လည်း သမိုင်းတစ်လျှောက် အမြင့်ဆုံးအဆင့်သို့ရောက်ရှိလာကြောင်း သိရပါသည်။ သမ္မတ၏ မိန့်ခွန်းတွင် ကိုယ်ပိုင်ဖူလုံသည့် စားသောက်ကုန်များကို သီးခြားဖော်ပြထားခြင်းမရှိသော်လည်း အမျိုးသားစားနပ်ရိက္ခာအေဂျင်စီ (Bapanas) ၏ ၂၀၂၆ ခုနှစ် စားသောက်ကုန်ချိန်ခွင်လျှာ ခန့်မှန်းချက်အရ ပြည်တွင်းထုတ်လုပ်မှုနှင့် ရရှိနိုင်မှု ဝယ်လိုအားထက်ကျော်လွန်နေသည့် စားသောက်ကုန် ၈ မျိုးမှာ ဆန်၊ တိရစ္ဆာန် အစာအတွက်ပြောင်း၊ စားသုံးသကြား၊ ငရုတ်သီးအကြီး၊ ငရုတ်သီးစပ်၊ ကြက်သွန်နီ၊ ကြက်သားနှင့် ကြက်ဥတို့ဖြစ်ကြောင်း သိရပါသည်။ သို့ရာတွင် ပဲပုပ်၊ ကြက်သွန်ဖြူနှင့် အမဲသား/ကျွဲသားတို့မှာ ပြည်တွင်းလိုအပ်ချက်ကိုမပြည့်မီသေးဘဲ ရောင်းလိုအားလျော့နည်းမှု ဆက်လက်ရှိနေကြောင်း လည်း ဖော်ပြထားပါသည်။ ၎င်းအပြင် သမ္မတ Prabowo က နိုင်ငံ၏ စားနပ်ရိက္ခာဖူလုံရေးသည် စွမ်းအင်ကဏ္ဍမူဝါဒများနှင့် တိုက်ရိုက်ဆက်စပ်နေကြောင်း၊ အုန်းဆီကိုအခြေခံထုတ်လုပ်သည့် B50 ဇီဝဒီဇယ် အသုံးပြုမှုကို တိုးချဲ့ဆောင်ရွက်နေခြင်းသည် ပြည်ပမှဒီဇယ်လောင်စာ တင်သွင်းနေရမှုကိုလျှော့ချနိုင်မည့် အရေးပါသောအစီအစဉ်ဖြစ်ကြောင်းနှင့် စားနပ်ရိက္ခာကဏ္ဍနှင့် စွမ်းအင်ကဏ္ဍတို့ကို တစ်ပြိုင်နက်အားကောင်းစေရန်ဆောင်ရွက်ခြင်းသည် ကမ္ဘာ့စီးပွားရေး အပြောင်း အလဲများနှင့် ထိခိုက်မှုများကိုရင်ဆိုင်နိုင်ရေးအတွက် အင်ဒိုနီးရှားနိုင်ငံ၏ အဓိကမဟာဗျူဟာဖြစ်ကြောင်း ပြောကြားခဲ့သည်ဟု သိရှိရပါသည်။

Antara News

DOCA (ရန်ကုန်)

Languages

Main menu

ပြည်ပကုန်သွယ်မှုသတင်းများ

စင်ကာပူဈေးကွက်သို့တိုးချဲ့လျက်ရှိသည့် အင်ဒိုနီးရှားရိုးရာသရေစာ Tempeh chips

ထိုင်းနိုင်ငံ၏ တရုတ်နိုင်ငံသို့ ဒူးရင်းသီး တင်ပို့မှု တန်ချိန် ၁ သန်းကျော်အထိ စံချိန်တင်ခဲ့

၂၀၂၆ ခုနှစ် ပထမခြောက်လအတွင်း တရုတ်နိုင်ငံ၏ စက်ကိရိယာထုတ်လုပ်မှုက ပို့ကုန်တိုးတက်မှုကို ဦးဆောင်

စား‌သောက်ကုန် ၈ မျိုးတွင် ကိုယ်ပိုင်ဖူလုံမှုရရှိပြီဖြစ်ကြောင်းပြောကြားခဲ့သည့် အင်ဒိုနီးရှားသမ္မတ

Pages

You are here

ပြည်ပကုန်သွယ်မှုသတင်းများ

Pages