ပြည်ပကုန်သွယ်မှုသတင်းများ

       အင်ဒိုနီးရှားနိုင်ငံ၏ အစားအသောက်လုပ်ငန်းများ နိုင်ငံတကာဈေးကွက်သို့ တိုးချဲ့ဝင်ရောက်နိုင်ရေးနှင့် နိုင်ငံ၏ ရိုးရာအစားအစာများကို ကမ္ဘာတစ်ဝန်း မိတ်ဆက်နိုင်ရေးအတွက် ပြည်ပ၌ အင်ဒိုနီးရှားစားသောက်ဆိုင်များ တိုးချဲ့ဖွင့်လှစ်ရန် ကုန်သွယ်ရေးဝန်ကြီးဌာနက ပံ့ပိုးဆောင်ရွက်သွား မည်ဖြစ်ကြောင်း သိရသည်။

       အင်ဒိုနီးရှားကုန်သွယ်ရေးဝန်ကြီး Budi Santoso က Banten ပြည်နယ်၊ Tangerang မြို့တွင် အောက်တိုဘာလ ၉ ရက်နေ့က ကျင်းပသည့် Franchise and License Expo အခမ်းအနား၌ ပြောကြားရာတွင် နိုင်ငံပေါင်း ၃၃ နိုင်ငံ၌ ဖွင့်လှစ်ထားသည့် ကုန်သွယ်ရေးသံမှူးရုံးများနှင့် အင်ဒိုနီးရှားကုန်သွယ်မှုမြှင့်တင်ရေးစင်တာများ (ITPCs) ၏ ကွန်ရက်ကို အသုံးချ၍ အဆိုပါလုပ်ငန်းများကို ကူညီပံ့ပိုးသွားမည်ဖြစ်ကြောင်း ပြောကြားခဲ့ကြောင်း သိရသည်။

      လက်ရှိတွင် နိုင်ငံပေါင်း ၃၃ နိုင်ငံ၌ ကိုယ်စားလှယ်ရုံး ၄၆ ရုံးရှိပြီး ယင်းရုံးများ၏ တာဝန်တစ်ရပ်အနေဖြင့် ပြည်ပ၌ အင်ဒိုနီးရှားစားသောက်ဆိုင်များ တိုးချဲ့ဖွင့်လှစ်နိုင်ရေးကို ကူညီဆောင်ရွက်ပေးသွားမည်ဖြစ်ကြောင်း ၎င်းက ဆိုသည်။

        ထို့ပြင် ယခုလအတွင်း ကျင်းပမည့် Trade Expo Indonesia (TEI) 2026 ကုန်စည်ပြပွဲ၌ ပြည်ပနိုင်ငံများတွင် စားသောက်ဆိုင်အသစ် (၅)ဆိုင်ဖွင့်လှစ်နိုင်ရေး သဘောတူညီချက်များ လက်မှတ်ရေးထိုးသွားမည်ဖြစ်ကြောင်း သိရသည်။ စားသောက်ဆိုင်လုပ်ငန်းများ ပြည်ပသို့ တိုးချဲ့ခြင်းသည် လုပ်ငန်းများ ပိုမိုကြီးထွားလာစေရန်နှင့် ဈေးကွက်သစ်များသို့ ဝင်ရောက်နိုင်ရန် ထိရောက်သည့် နည်းလမ်းတစ်ရပ်ဖြစ်ကြောင်း ဝန်ကြီးက ပြောကြားခဲ့ကြောင်း သိရသည်။

        အဆိုပါအစီအစဉ်သည် အင်ဒိုနီးရှားနိုင်ငံ၏ အစားအသောက်သံတမန်ရေးရာ အစီအစဉ်ဖြစ်သည့် S’RASA နှင့်လည်း ကိုက်ညီလျက်ရှိသည်။ ယင်းအစီအစဉ်သည် အင်ဒိုနီးရှားနိုင်ငံ၏ အမွှေးအကြိုင်ကြွယ်ဝသော ရိုးရာအစားအစာများကို နိုင်ငံတကာဈေးကွက်သို့ မိတ်ဆက်မြှင့်တင်ရန် ရည်ရွယ်ခြင်းဖြစ်ကြောင်း သိရသည်။

        S’RASA အစီအစဉ်အရ ကမ္ဘာတစ်ဝန်းရှိ အင်ဒိုနီးရှားစားသောက်ဆိုင်များတွင် နိုင်ငံ၏ ရိုးရာဟင်းလျာများကို မိတ်ဆက်ပေးရုံသာမက ယင်းအစားအစာများနှင့် ဆက်စပ်သည့် ယဉ်ကျေးမှု အမွေအနှစ်များ၊ သမိုင်းကြောင်းနှင့် အမှတ်သညာတို့ကိုပါ ဖော်ပြသွားမည်ဖြစ်သည်။ ကနဦးစမ်းသပ်စီမံကိန်းအဖြစ် ဂျပန်နိုင်ငံ တိုကျိုမြို့၊ ဩစတြေးလျနိုင်ငံ ဆစ်ဒနီမြို့၊ နယ်သာလန်နိုင်ငံ အမ်စတာဒမ် မြို့၊ ဗြိတိန်နိုင်ငံလန်ဒန်မြို့နှင့် အမေရိကန်နိုင်ငံ နယူးယောက် မြို့တို့ရှိ ရွေးချယ်ထားသော စားသောက်ဆိုင်များတွင် အဆိုပါအစီအစဉ်ကို စတင်အကောင် အထည်ဖော်သွားမည်ဖြစ်ကြောင်း သိရသည်။

      တစ်ဖက်တွင်လည်း ကုန်သွယ်ရေးဝန်ကြီးဌာနသည် ပြည်တွင်းထုတ်ကုန်များ၏ ပို့ကုန်မြှင့်တင်ရေးကို ဆောင်ရွက်လျက်ရှိပြီး အထူးသဖြင့် အသေးစား၊ ငယ်စားနှင့် အလတ်စားစီးပွားရေး လုပ်ငန်းများ (MSMEs) ၏ ထုတ်ကုန်များကို ပြည်ပဈေးကွက်သို့ တင်ပို့နိုင်ရေးအတွက် ပြည်တွင်းထုတ်လုပ်သူများနှင့် ပြည်ပဝယ်လက်များကို ချိတ်ဆက်ပေးသည့် စီးပွားရေးချိတ်ဆက်မှု အစီအစဉ်များကို အကောင်အထည်ဖော်လျက်ရှိကြောင်း သိရသည်။

         ပို့ကုန်လုပ်ငန်းသို့ ပထမဆုံးအကြိမ် ဝင်ရောက်လိုသည့် လုပ်ငန်းများအပါအဝင် MSMEs များ ပြည်ပဈေးကွက်သို့ ဝင်ရောက်နိုင်ရေးအတွက် လိုအပ်သည့် အကူအညီများကို ဆက်လက်ပံ့ပိုးပေးသွားမည်ဖြစ်ကြောင်း ကုန်သွယ်ရေးဝန်ကြီးဌာနက အတည်ပြုပြောကြားခဲ့ကြောင်း သိရှိရသိပါသည်။

Antara News                                                                             

DOCA (ရန်ကုန်)

         ကမ္ဘောဒီးယားနှင့် ဗီယက်နမ်နိုင်ငံတို့သည် လာမည့်နှစ်များအတွင်း နှစ်နိုင်ငံအပြန်အလှန် ကုန်သွယ်မှုပမာဏကို အမေရိကန်ဒေါ်လာ ဘီလီယံ ၂၀ အထိ တိုးမြှင့်သွားရန် ကတိပြုခဲ့ကြောင်း ကမ္ဘောဒီးယားနိုင်ငံခြားရေးနှင့် နိုင်ငံတကာပူးပေါင်းဆောင်ရွက်ရေးဝန်ကြီးဌာနက အောက်တိုဘာလ ၁၀ ရက်နေ့တွင် ထုတ်ပြန်သော ကြေညာချက်အရ သိရသည်။

       အဆိုပါ ကြေညာချက်သည် ဗီယက်နမ်ဝန်ကြီးချုပ် Le Minh Hung ၏ ကမ္ဘောဒီးယားနိုင်ငံသို့ နှစ်ရက်ကြာ တရားဝင်ခရီးစဉ် ပြီးဆုံးပြီးနောက် ထွက်ပေါ်လာခြင်းဖြစ်သည်။ ဖနွမ်းပင်မြို့တွင် ရှိနေစဉ်အတွင်း ဗီယက်နမ်ဝန်ကြီးချုပ် Le Minh Hung သည် ကမ္ဘောဒီးယားဝန်ကြီးချုပ် Hun Manet နှင့် နှစ်နိုင်ငံဆိုင်ရာ တွေ့ဆုံဆွေးနွေးမှုများ ပြုလုပ်ခဲ့ကြောင်း သိရသည်။

        ခေါင်းဆောင်နှစ်ဦးသည် နှစ်နိုင်ငံအကြား စီးပွားရေးဖြည့်ဆည်းမှုနှင့် အပြန်အလှန်အကျိုး ဖြစ်ထွန်းမှုကို မြှင့်တင်ရန်အတွက် ယဉ်ကျေးမှု၊ ခရီးသွားလုပ်ငန်း၊ စွမ်းအင်၊ စိုက်ပျိုးရေး၊ စိုက်ပျိုးရေးထွက်ကုန် ပြုပြင်ထုတ်လုပ်ရေး၊ သတင်းအချက်အလက်နှင့် ဆက်သွယ်ရေးနည်းပညာ၊ ဒစ်ဂျစ်တယ် စီးပွားရေး စသည့် အဓိကကဏ္ဍများတွင် ပူးပေါင်းဆောင်ရွက်မှုကို အားကောင်းလာစေရန် သဘောတူညီခဲ့ကြကြောင်း သိရသည်။

       ထောက်ပံ့ပို့ဆောင်ရေးနှင့် နယ်စပ်ဖြတ်ကျော် သယ်ယူပို့ဆောင်ရေး ဆက်သွယ်မှုများ တိုးတက်ကောင်းမွန်လာစေရန် နှစ်နိုင်ငံသည် Meun Chey – Tan Nam အပြည်ပြည်ဆိုင်ရာ နယ်စပ်စစ်ဆေးရေးဂိတ်ကို လက်ရှိအသုံးပြုနေသော ဖြတ်သန်းသွားလာရေးနှင့် ကုန်းလမ်းသယ်ယူပို့ဆောင်ရေး သဘောတူညီချက်များအတွင်း ပေါင်းစည်းရေးကို အရှိန်မြှင့်တင်ရန် သဘောတူခဲ့ကြကြောင်း သိရသည်။

      ထို့အပြင် Phnom Penh – Bavet အမြန်လမ်းနှင့် ဟိုချီမင်းမြို့–မော့ဘိုင် အမြန်လမ်းတို့ကို ချိတ်ဆက်ပေးမည့် လမ်းဆုံနေရာ တည်ဆောက်ရေးကိုလည်း အမြန်ဆုံးဆောင်ရွက်သွားရန် ကတိပြုခဲ့ကြောင်း ထုတ်ပြန်ချက်တွင် ဖော်ပြထားသည်။ ဝန်ကြီးချုပ်နှစ်ဦးသည် ပညာရေး၊ ကုန်သွယ်ရေး၊ ကာကွယ်ရေးနှင့် လုံခြုံရေးကဏ္ဍများနှင့် သက်ဆိုင်သည့် စာရွက်စာတမ်းအများအပြား လက်မှတ်ရေးထိုးခြင်းကိုလည်း တက်ရောက်ကြည့်ရှုခဲ့ကြောင်း ထုတ်ပြန်ချက်အရ သိရသည်။ နှစ်နိုင်ငံစီးပွားရေး ပေါင်းစည်းဆောင်ရွက်မှု ပိုမိုနက်ရှိုင်းလာစေရန် ကြိုးပမ်းမှုသည် ကုန်သွယ်မှု တဖြည်းဖြည်း တိုးတက်လာနေသည့် အခြေအနေတွင် ထွက်ပေါ်လာခြင်းဖြစ်ကြောင်း သိရသည်။

         ကမ္ဘောဒီးယားကုန်သွယ်ရေးဝန်ကြီးဌာန၏ အချက်အလက်များအရ ၂၀၂၆ ခုနှစ် ပထမ ကိုးလအတွင်း ကမ္ဘောဒီးယားနှင့် ဗီယက်နမ်နိုင်ငံတို့၏ နှစ်နိုင်ငံကုန်သွယ်မှုပမာဏသည် အမေရိကန် ဒေါ်လာ ၆.၅၈ ဘီလီယံအထိ ရောက်ရှိခဲ့သည်။ ယင်းပမာဏသည် ယခင်နှစ် အလားတူကာလနှင့် နှိုင်းယှဉ်ပါက ၈.၇ ရာခိုင်နှုန်း မြင့်တက်လာခြင်းဖြစ်ကြောင်း သိရှိရပါသည်။

Source : Xinhua                                                                                   

DOCA (ရန်ကုန်)

       ကမ္ဘောဒီးယားနိုင်ငံ၏ အထည်ချုပ်၊ အထည်အလိပ်၊ ဖိနပ်နှင့် ခရီးသွားသုံးပစ္စည်းများ တင်ပို့မှုတန်ဖိုးသည် ၂၀၂၆ ခုနှစ် ပထမကိုးလအတွင်း အမေရိကန်ဒေါ်လာ ၁၃.၁၅ ဘီလီယံအထိ ရောက်ရှိခဲ့ပြီး ယခင်နှစ် အလားတူကာလနှင့် နှိုင်းယှဉ်ပါက ၇.၇ ရာခိုင်နှုန်း မြင့်တက်လာကြောင်း အောက်တိုဘာလ ၉ ရက်နေ့တွင် ထုတ်ပြန်သည့် တရားဝင်အစီရင်ခံစာအရ သိရသည်။

    ကမ္ဘောဒီးယား ကုန်သွယ်ရေးဝန်ကြီးဌာန၏ အစီရင်ခံစာအရ ၂၀၂၆ ခုနှစ် ဇန်နဝါရီလမှ စက်တင်ဘာလအထိ ကာလအတွင်း အထည်ချုပ်ပစ္စည်း တင်ပို့မှုတန်ဖိုးသည် အမေရိကန်ဒေါ်လာ ၉.၂၃ ဘီလီယံရှိခဲ့ပြီး ယခင်နှစ် အလားတူကာလထက် ၆.၉ ရာခိုင်နှုန်း မြင့်တက်ခဲ့သည်။ အထည်အလိပ် တင်ပို့မှုတန်ဖိုးမှာလည်း ၂၁.၅ ရာခိုင်နှုန်း သိသိသာသာ မြင့်တက်လာကာ ဒေါ်လာ ၆၁၄ သန်းအထိ ရောက်ရှိခဲ့ကြောင်း သိရသည်။

         အလားတူ ဖိနပ်တင်ပို့မှုတန်ဖိုးသည် ၈ ရာခိုင်နှုန်း မြင့်တက်ပြီး ဒေါ်လာ ၁.၆၆ ဘီလီယံရှိ ခဲ့ကာ ခရီးသွားသုံးပစ္စည်းများ တင်ပို့မှုတန်ဖိုးမှာလည်း ၇.၆ ရာခိုင်နှုန်း မြင့်တက်ကာ ဒေါ်လာ ၁.၆၅ ဘီလီယံအထိ ရောက်ရှိခဲ့ကြောင်း သိရသည်။

        ကုန်ထုတ်လုပ်မှုကဏ္ဍသည် ကမ္ဘောဒီးယားနိုင်ငံ၏ အဓိကစီးပွားရေးမောင်းနှင်အားဖြစ်ပြီး နိုင်ငံခြားငွေ အများဆုံးရရှိစေသည့် ကဏ္ဍလည်းဖြစ်သည်။ အရှေ့တောင်အာရှနိုင်ငံဖြစ်သည့် ကမ္ဘောဒီးယား၏ စုစုပေါင်းပို့ကုန်တန်ဖိုးတွင် ကုန်ထုတ်လုပ်မှုကဏ္ဍက ၄၈ ရာခိုင်နှုန်းနီးပါး ပါဝင်လျက်ရှိကြောင်း သိရသည်။

         ကမ္ဘောဒီးယား နည်းပညာနှင့် သိပ္ပံတက္ကသိုလ်ရှိ တရုတ်-အာဆီယံလေ့လာရေးစင်တာ၏ ဒုတိယညွှန်ကြားရေးမှူး Thong Mengdavid က ယခုကဲ့သို့ တင်ပို့မှုတိုးတက်လာခြင်းမှာ ကမ္ဘောဒီးယားနိုင်ငံ၏ မဟာဗျူဟာမြောက် ကုန်သွယ်ရေးမိတ်ဖက်ဆက်ဆံမှုများကြောင့်ဖြစ် ကြောင်း သုံးသပ်ပြောကြားခဲ့သည်။ ဒေသတွင်း ဘက်စုံစီးပွားရေးပူးပေါင်းဆောင်ရွက်မှု သဘောတူညီချက် (RCEP) တွင် ပါဝင်ခြင်းအပြင် တရုတ်၊ တောင်ကိုရီးယားနှင့် အာရပ်စော်ဘွားများ ပြည်ထောင်စု (UAE) တို့နှင့် နှစ်နိုင်ငံ လွတ်လပ်သောကုန်သွယ်ရေး သဘောတူညီချက်များ ချုပ်ဆို ထားခြင်းကြောင့် ဈေးကွက်ဝင်ရောက်နိုင်မှုနှင့် ကုန်ပစ္စည်းထောက်ပံ့ရေးကွင်းဆက်၏ ထိရောက်မှု တို့ သိသိသာသာ တိုးတက်လာခဲ့ကြောင်း ၎င်းက ပြောကြားခဲ့ကြောင်း သိရသည်။

       တရုတ်၊ တောင်ကိုရီးယားနှင့် ဂျပန်နိုင်ငံတို့မှ ရင်းနှီးမြှုပ်နှံမှုအသစ်များ ဆက်လက်ဝင်ရောက်လာခြင်းနှင့် ပြည်ပဈေးကွက်ဝယ်လိုအား ခိုင်မာနေခြင်းတို့ကြောင့် အထည်ချုပ်နှင့် ဆက်စပ် ကုန်ထုတ်လုပ်မှုကဏ္ဍ၏ တိုးတက်မှုလမ်းကြောင်းသည် ဆက်လက်တည်ရှိနိုင်ခြေ မြင့်မားကြောင်း ၎င်းက Xinhua သတင်းဌာနသို့ ပြောကြားခဲ့ကြောင်း သိရသည်။

    ကမ္ဘောဒီးယား အလုပ်သမားနှင့် အသက်မွေးဝမ်းကျောင်းသင်တန်းပေးရေးဝန်ကြီးဌာန၏ အချက်အလက်များအရ အရေးပါသည့် အဆိုပါကုန်ထုတ်လုပ်မှုကဏ္ဍတွင် စက်ရုံနှင့် ဌာနခွဲပေါင်း ၁,၈၀၀ ကျော်ရှိပြီး အလုပ်သမား ၁.၁ သန်းခန့်ကို အလုပ်အကိုင်ပေးထားသည်။ ယင်းအလုပ်သမားများအနက် အများစုမှာ အမျိုးသမီးများဖြစ်ကြောင်း သိရှိရပါသည်။

Source : Xinhua                                                                                   

DOCA (ရန်ကုန်)

       အင်ဒိုနီးရှားနိုင်ငံတွင် ပြည်တွင်းနှင့် နိုင်ငံခြားရင်းနှီးမြှုပ်နှံမှုများကို ကာကွယ်စောင့်ရှောက်ခြင်းသည် နိုင်ငံ့ဂုဏ်သိက္ခာနှင့် သက်ဆိုင်သည့် ကိစ္စရပ်ဖြစ်ကြောင်း သမ္မတ Prabowo Subianto က ပြောကြားခဲ့ပြီး နိုင်ငံတကာစီးပွားရေးအသိုက်အဝန်းအား အာမခံချက်ပေးခဲ့ကြောင်း သိရသည်။

        North Maluku ပြည်နယ်၊ Central Halmahera ခရိုင်ရှိ Indonesia Weda Bay Industrial Park (IWIP) ၌ အောက်တိုဘာလ ၈ ရက်နေ့ကကျင်းပသည့် အခမ်းအနားတွင် သမ္မတက ရင်းနှီးမြှုပ်နှံသူများနှင့် ခိုင်မာသည့် မိတ်ဖက်ဆက်ဆံရေးများ ထိန်းသိမ်းထားခြင်းသည် နိုင်ငံ၏ ရေရှည်သာယာဝပြောရေးအတွက် မရှိမဖြစ်လိုအပ်ကြောင်း ပြောကြားခဲ့ကြောင်း သိရသည်။

     အင်ဒိုနီးရှားနိုင်ငံအတွင်း ရင်းနှီးမြှုပ်နှံထားသည့် မည်သည့်နိုင်ငံမှ ရင်းနှီးမြှုပ်နှံမှုကိုမဆို အစိုးရအနေဖြင့် လေးစားလိုက်နာပြီး ကာကွယ်စောင့်ရှောက်သွားမည်ဖြစ်ကြောင်း သမ္မတက ထပ်လောင်းအတည်ပြုပြောကြားခဲ့သည်။ ယင်းပြောကြားချက်ကို သမ္မတရုံးအတွင်းဝန်ရုံးက ထုတ်လွှင့်ခဲ့ကြောင်း သိရသည်။

      အင်ဒိုနီးရှားနိုင်ငံအပေါ် ယုံကြည်မှုထားရှိသည့် စီးပွားရေးမိတ်ဖက်များနှင့် ချုပ်ဆိုထားသော ကတိကဝတ်များကို လေးစားလိုက်နာခြင်းသည် နိုင်ငံ၏ ဂုဏ်သိက္ခာနှင့် ဂုဏ်ယူဝင့်ကြွားမှုကို ဖော်ပြခြင်းဖြစ်ကြောင်း Prabowo Subianto က ပြောကြားခဲ့ကြောင်း သိရသည်။

       နိုင်ငံတစ်ဝန်းရှိ စက်မှုဇုန်များ ဖွံ့ဖြိုးတိုးတက်ရေးတွင် ပူးပေါင်းပါဝင်နေသည့် ရင်းနှီးမြှုပ်နှံသူများကို ညီအစ်ကိုများသဖွယ် သဘောထားကြောင်း၊ ၎င်းတို့နှင့် ပူးပေါင်းဆောင်ရွက်မှုကို ကာကွယ်စောင့်ရှောက်ခြင်းသည် အင်ဒိုနီးရှားနိုင်ငံ၏ ဂုဏ်သိက္ခာနှင့် သက်ဆိုင်ကြောင်း သမ္မတက အလေးထားပြောကြားခဲ့ကြောင်း သိရသည်။

        အဆိုပါပြောကြားချက်သည် အမေရိကန်ဒေါ်လာ ၁၀ ဒသမ ၂ ဘီလီယံတန်ဖိုးရှိ တန်ဖိုးမြှင့်ထုတ်လုပ်ရေး စီမံကိန်းကြီးတစ်ရပ် စတင်ဖွင့်လှစ်သည့် အခမ်းအနားတွင် ထွက်ပေါ်လာခြင်းဖြစ်သည်။ ယင်းအခမ်းအနား၌ အင်ဒိုနီးရှားနိုင်ငံတွင် ပြည်တွင်းထုတ်လုပ်သည့် လျှပ်စစ်မော်တော်ယာဉ် (EV) ဘက်ထရီများကို ပထမဆုံးအကြိမ် ပြည်ပတင်ပို့ခြင်း၊ စက်မှုလုပ်ငန်းစီမံကိန်း လေးခုကို စီးပွားဖြစ် စတင်လည်ပတ်ခြင်းနှင့် IWIP စက်မှုဇုန်အတွင်း စက်ရုံအသစ် ခုနစ်ရုံ တည်ဆောက်ရေး လုပ်ငန်းများ စတင်ခြင်းတို့ကို ဆောင်ရွက်ခဲ့ကြောင်း သိရသည်။

         ရင်းနှီးမြှုပ်နှံမှုနှင့် တန်ဖိုးမြှင့်ထုတ်လုပ်ရေးဝန်ကြီးဌာန၏ အစီရင်ခံစာများအရ IWIP စက်မှုဇုန်အတွင်း အမှန်တကယ်ဝင်ရောက်ထားသည့် ရင်းနှီးမြှုပ်နှံမှုပမာဏမှာ အမေရိကန်ဒေါ်လာ ဘီလီယံ ၂၀ ခန့်ရှိပြီး အနာဂတ်တွင် ဒေါ်လာ ခုနစ်ဘီလီယံ ထပ်မံရင်းနှီးမြှုပ်နှံရန် အစီအစဉ်ရှိကြောင်း သမ္မတက ပြောကြားခဲ့ကြောင်း သိရသည်။

     Central Halmahera ရှိ အဆိုပါစက်မှုဇုန်ကို တိုးချဲ့ဖွံ့ဖြိုးခြင်းကြောင့် အလုပ်အကိုင်အခွင့်အလမ်းများ တိုးပွားလာခဲ့ပြီး လက်ရှိတွင် အလုပ်သမား ၁၀၀,၀၀၀ ကျော်ကို အလုပ်အကိုင် ပံ့ပိုးပေးနိုင်ခဲ့ကြောင်း သိရသည်။

        ပြည်တွင်းနှင့် နိုင်ငံတကာကုမ္ပဏီများအကြား ပူးပေါင်းဆောင်ရွက်မှုများ တိုးတက်လာခြင်းကို ကြိုဆိုကြောင်း သမ္မတက ပြောကြားခဲ့ပြီး ယင်းမိတ်ဖက်ဆက်ဆံရေးများမှတစ်ဆင့် နှစ်ဖက်အကျိုးဖြစ်ထွန်းစေရန်နှင့် မိတ်ဖက်နိုင်ငံများနှင့် နှစ်နိုင်ငံဆက်ဆံရေး ပိုမိုနက်ရှိုင်းခိုင်မာလာစေရန် မျှော်လင့်ကြောင်း ဖြည့်စွက်ပြောကြားခဲ့ကြောင်း သိရသည်။

       ရင်းနှီးမြှုပ်နှံသူများ၏ ပူးပေါင်းဆောင်ရွက်မှုနှင့် ယုံကြည်မှုအတွက် ကျေးဇူးတင်ရှိကြောင်း၊ နှစ်နိုင်ငံအကြား မိတ်ဖက်ဆက်ဆံရေးနှင့် ချစ်ကြည်ရင်းနှီးမှုများ ပိုမိုခိုင်မာလာပြီး နှစ်နိုင်ငံပြည်သူများအတွက် အကျိုးကျေးဇူးများ ပိုမိုရရှိလာစေရန် မျှော်လင့်ကြောင်း Prabowo Subianto က ပြောကြားခဲ့ကြောင်း သိရှိရပါသည်။

Antara News                                                                             

DOCA (ရန်ကုန်)

      အင်ဒိုနီးရှားနိုင်ငံတွင် ဆိုလာလျှပ်စစ်ဓာတ်အားပေးစက်ရုံများမှ လျှပ်စစ်ဓာတ်အား ၁၀၀ ဂီဂါဝပ်အထိ ထုတ်လုပ်နိုင်သည့် စီမံကိန်းကို အကောင်အထည်ဖော်ပြီးစီးပါက အစိုးရ၏ လျှပ်စစ်ထောက်ပံ့ကြေး ရူပီး ၇၃ ထရီလီယံ (အမေရိကန်ဒေါ်လာ လေးဘီလီယံ) အထိ လျှော့ချနိုင် မည်ဖြစ်ကြောင်း Downstreaming နှင့် စွမ်းအင်ကူးပြောင်းရေးဆိုင်ရာ ညှိနှိုင်းရေးဝန်ကြီးနှင့် စွမ်းအင်နှင့် သတ္တုသယံဇာတဝန်ကြီး Bahlil Lahadalia က ပြောကြားကြောင်း သိရသည်။

         အဆိုပါစီမံကိန်းကို West Java၊ East Java၊ Bangka Belitung နှင့် Riau Islands ဒေသတို့တွင် ဆိုလာလျှပ်စစ်ဓာတ်အားပေးစက်ရုံ ၁၄ ရုံ စတင်တည်ဆောက်ခြင်းဖြင့် အကောင်အထည်ဖော်သွားမည်ဖြစ်ကြောင်း ၎င်းက ပြောကြားခဲ့ကြောင်း သိရသည်။

         Jakarta မြို့တွင် အောက်တိုဘာလ ၇ ရက်နေ့ကျင်းပသည့် Investor Daily Summit အခမ်းအနား၌ Bahlil Lahadalia က စီမံကိန်းပြီးစီးပါက နိုင်ငံတော်ဘတ်ဂျက်မှ လျှပ်စစ်ထောက်ပံ့ ကြေးပေးအပ်ရသည့် ပမာဏကို ရူပီး ၇၀ ထရီလီယံမှ ၇၃ ထရီလီယံအထိ လျှော့ချနိုင်မည်ဟု မျှော်လင့်ထားကြောင်း ပြောကြားခဲ့ကြောင်း သိရသည်။

          အဆိုပါစီမံကိန်းသည် လျှပ်စစ်ထောက်ပံ့ကြေးအတွက် ရူပီး ၂၀၀ ထရီလီယံ ခွဲဝေသုံးစွဲထား ရသည့် နိုင်ငံတော်ဘတ်ဂျက်အပေါ် ဖိအားကို လျှော့ချနိုင်မည်ဖြစ်ကြောင်း ၎င်းက ဆိုသည်။ ယင်းပြဿနာကို ဖြေရှင်းရန် လျင်မြန်စွာ တုံ့ပြန်နိုင်သည့် ဆန်းသစ်တီထွင်မှုများ လိုအပ်ကြောင်းလည်း ၎င်းက အလေးထားပြောကြားကြောင်း သိရသည်။

        အင်ဒိုနီးရှားသမ္မတ Prabowo Subianto သည် ဆိုလာလျှပ်စစ်ဓာတ်အား ၁၀၀ ဂီဂါဝပ် ထုတ်လုပ်နိုင်ရေး မဟာဗျူဟာစီမံကိန်းကို ဩဂုတ် ၂၅ ရက်တွင် Bali ပြည်နယ်၊ Jembrana ရှိ Gilimanuk Operations Monument ၌ စတင်ကြေညာခဲ့ကြောင်း သိရသည်။

          စီမံကိန်းစတင်ခြင်းအခမ်းအနားကို Gilimanuk ၌ ကျင်းပခဲ့သည့်အပြင် Central Java ပြည်နယ်၊ Wonogiri ရှိ Gajah Mungkur ရေပေါ်ဆိုလာလျှပ်စစ်စက်ရုံ၊ Riau Islands ဒေသ၊ Batam ရှိ Sembur ကျေးရွာဆိုလာလျှပ်စစ်စက်ရုံနှင့် Bangka Belitung ဒေသရှိ Rengit ကျွန်းဆိုလာလျှပ်စစ်စက်ရုံတို့တွင်လည်း အွန်လိုင်းမှတစ်ဆင့် တစ်ပြိုင်နက် ကျင်းပခဲ့ကြောင်း သိရသည်။

    သုံးနှစ်အတွင်း ဆိုလာလျှပ်စစ်ဓာတ်အား ၁၀၀ ဂီဂါဝပ် ထုတ်လုပ်နိုင်ရန် ရည်မှန်းထားပြီး ယင်းလုပ်ငန်းကို အလေးအနက်ထား အကောင်အထည်ဖော်သွားမည်ဖြစ်ကြောင်း သမ္မတ Prabowo Subianto က ပြောကြားခဲ့ကြောင်း သိရသည်။

        ယင်းရည်မှန်းချက် ပြည့်မီပါက အင်ဒိုနီးရှားနိုင်ငံအနေဖြင့် စွမ်းအင်ဖူလုံမှုရရှိနိုင်မည်ဟု ယုံကြည်ကြောင်း ၎င်းက ပြောကြားသည်။ လက်ရှိတွင် နိုင်ငံ၏ လျှပ်စစ်ဓာတ်အားထုတ်လုပ်မှုမှာ ကျောက်မီးသွေး၊ ရေနံ၊ သဘာဝဓာတ်ငွေ့နှင့် ဘူမိအပူစွမ်းအင်တို့မှ စုစုပေါင်း ၈၈ ဂီဂါဝပ် ရှိကြောင်း သိရသည်။

        ဆိုလာလျှပ်စစ်စီမံကိန်းကို အကောင်အထည်ဖော်ရန် အစိုးရက ဆောင်ရွက်နေခြင်းမှာ အင်ဒိုနီးရှားနိုင်ငံတွင် ဆိုလာစွမ်းအင် ထုတ်လုပ်နိုင်သည့် အလားအလာ ၃,၂၉၄ ဂီဂါဝပ်အထိ ရှိနေကြောင်း အသိအမှတ်ပြုထားသည့်အတွက် ဖြစ်ကြောင်း သမ္မတက ရှင်းလင်းပြောကြားသည်။ ယင်းအစီအစဉ်သည် လက်ရှိ ၁ ဒသမ ၅ ဂီဂါဝပ်သာရှိသည့် တပ်ဆင်ပြီးဆိုလာလျှပ်စစ်ဓာတ်အား ထုတ်လုပ်နိုင်စွမ်းကို သိသိသာသာ တိုးမြှင့်ရန် ရည်ရွယ်ထားခြင်းဖြစ်ကြောင်း သိရသည်။

        ထို့ပြင် စွမ်းအင်ဖူလုံမှုရရှိရေး ရည်မှန်းချက် အောင်မြင်စေရန် Red and White Cabinet အဖွဲ့ဝင်များ၊ Danantara Indonesia၊ နိုင်ငံပိုင်လျှပ်စစ်လုပ်ငန်း PT PLN နှင့် နိုင်ငံပိုင်ရေနံကုမ္ပဏီ Pertamina တို့အနေဖြင့် အစိုးရ၏ ကြိုးပမ်းဆောင်ရွက်မှုများကို ပူးပေါင်းပံ့ပိုးပေးကြရန် သမ္မတ Prabowo Subianto က တိုက်တွန်းထားကြောင်း သိရှိရပါသည်။

Antara News                                                                             

DOCA (ရန်ကုန်)