ပြည်ပကုန်သွယ်မှုသတင်းများ

         အင်ဒိုနီးရှားနိုင်ငံ၏ ရိုးရာအထည်အလိပ်အမွေအနှစ်များသည် ကုန်သွယ်မှုသံတမန်ရေး ဆောင်ရွက်မှုများနှင့် နိုင်ငံတကာဈေးကွက် ၃၂ ခုသို့ ဈေးကွက်ဝင်ရောက်ခွင့် တိုးချဲ့ပေးမှုများကြောင့် ကမ္ဘာ့တင်ပို့မှုအလားအလာ အမေရိကန်ဒေါ်လာ ၂၅၁.၃၄ သန်းခန့်ရှိကြောင်း အင်ဒိုနီးရှား ကုန်သွယ်ရေးဝန်ကြီးဌာနက ပြောကြားခဲ့ပါသည်။ ကုန်သွယ်ရေးဒုတိယဝန်ကြီး Dyah Roro Esti Widya Putri က ဂျကာတာမြို့တွင် ဇူလိုင်လ ၂၉ ရက်နေ့က ကျင်းပသည့် BTN Indonesia Fashion Week (IFW) ၂၀၂၆ ဖွင့်ပွဲအခမ်းအနား၌ ယခုနှစ် ဇန်နဝါရီလမှ ဇွန်လအထိ ကာလ အတွင်း စီးပွားရေးလုပ်ငန်းချိတ်ဆက်ပွဲ (Business Matching) ၄၂၄ ကြိမ်နှင့် ထုတ်ကုန်မိတ်ဆက် တင်ပြပွဲ (Product Pitching) များကို စီစဉ်ဆောင်ရွက်ပေးခဲ့ကြောင်း ပြောကြားခဲ့ပါသည်။ အဆိုပါအစီအစဉ်များတွင် ပြည်တွင်းစီးပွားရေးလုပ်ငန်းရှင် ၁,၁၄၈ ဦး ပါဝင်ခဲ့ပြီး အင်ဒိုနီးရှား ကုန်သွယ်မှုမြှင့်တင်ရေးစင်တာ (Indonesia Trade Promotion Center-ITPC) များ၊ ကုန်သွယ်ရေးသံမှူးများ၏ ကွန်ရက်နှင့် “MSMEs Can Export” အမျိုးသားအစီအစဉ်တို့၏ ပံ့ပိုးကူညီမှုဖြင့် အကောင်အထည်ဖော်ခဲ့ခြင်းဖြစ်ကြောင်း သိရပါသည်။ ကုန်သွယ်ရေးဝန်ကြီးဌာနသည် ဗဟိုနှင့် ဒေသဆိုင်ရာသက်ဆိုင်သူများနှင့် ပူးပေါင်း၍ အင်ဒိုနီးရှားရိုးရာအထည်အလိပ်များကို သမိုင်းကြောင်းနက်ရှိုင်းသည့် ယဉ်ကျေးမှုသင်္ကေတများအဖြစ် နိုင်ငံတကာဈေးကွက်တွင် စိတ်ဝင်စားမှုရရှိစေရန် မြှင့်တင်ပေးသည့် အဓိကပွဲများကို ဆက်လက်ပံ့ပိုးဆောင်ရွက်လျက်ရှိကြောင်း Roro က ပြောကြားခဲ့ပါသည်။ ယခုနှစ် Indonesia Fashion Week ကို ဇူလိုင် ၂၉ ရက်မှ သြဂုတ် ၁ ရက်အထိ ကျင်းပလျက်ရှိပြီး “Ulos Simetria” ဟူသော ခေါင်းစဉ်ဖြင့် မြောက်ဆူမားတြားပြည်နယ်ရှိ Batak လူမျိုးတို့၏ ရိုးရာလက်ယက်အထည် “Ulos” ကို အဓိကထား ဖော်ပြလျက်ရှိကြောင်း သိရပါသည်။ သမိုင်းအစဉ်အလာအရ Ulos အထည်ကို အရေးပါသည့်အခမ်းအနားများတွင် ဝတ်ဆင်လေ့ရှိပြီး ဆုတောင်းမေတ္တာ၊ ချစ်ခင်ကြင်နာမှုနှင့် မျိုးဆက်တစ်ဆက်မှ တစ်ဆက်သို့လက်ဆင့်ကမ်းသည့် ပညာအမွေအနှစ်တို့ကို ကိုယ်စားပြုကြောင်း သိရပါသည်။ တစ်ဖက်တွင် “Simetria” (ညီမျှဟန်ချက်) ဆိုသည့် အယူအဆမှာ ယဉ်ကျေးမှု အမွေအနှစ် ထိန်းသိမ်းရေးနှင့် ခေတ်မီစီးပွားရေးဆိုင်ရာ တီထွင်ဆန်းသစ်မှုတို့အကြား ဟန်ချက်ညီမျှမှုကို ရည်ညွှန်းခြင်းဖြစ်ကြောင်း သိရပါသည်။ Roro က Ulos ကို ဟန်ချက်ညီမျှမှုဆိုသည့် အယူအဆနှင့် ပေါင်းစပ်လိုက်သည့်အခါ ထိုခေါင်းစဉ်က အင်ဒိုနီးရှားဖက်ရှင်လုပ်ငန်းအတွက် အရေးပါသည့် သတင်းစကားတစ်ခုကိုပေးပို့ကြောင်း၊ ယဉ်ကျေးမှုအမွေအနှစ်များကို တီထွင်ဆန်းသစ်မှုများနှင့် ဆက်စပ်ထိန်းသိမ်းသွားရန်၊ ယဉ်ကျေးမှုတန်ဖိုးများကို စီးပွားရေးတန်ဖိုးမြင့် ထုတ်ကုန်များအဖြစ် ဖော်ဆောင်ရန်နှင့် မြောက်ဆူမားတြားဒေသ၏ ဒေသဆိုင်ရာဉာဏ်ပညာကို ကမ္ဘာ့အဆင့်သို့ မြှင့်တင်ရန်ဖြစ်ကြောင်းနှင့် အဆိုပါခေါင်းစဉ်သည် ယဉ်ကျေးမှုအမွေအနှစ်များကို ထိန်းသိမ်းရုံသာမက ပြည်တွင်းနှင့် နိုင်ငံတကာဈေးကွက်များတွင် ယှဉ်ပြိုင်နိုင်သည့် တန်ဖိုးမြင့် ကုန်စည်များ အဖြစ်လည်း ရှုမြင်နိုင်ရန် ပြည်သူများကိုအားပေးတိုက်တွန်းခြင်းဖြစ်ကြောင်း ပြောကြားခဲ့ပါသည်။ ထို့ပြင် ဖက်ရှင်ကဏ္ဍသည် ယဉ်ကျေးမှုသံတမန်ရေးအတွက် ထိရောက်သည့် ကိရိယာတစ်ရပ်ဖြစ်ပြီး အင်ဒိုနီးရှားရိုးရာအထည်အလိပ်များ၏ လက်မှုပညာနှင့် ယဉ်ကျေးမှုအမွေအနှစ်များကို ကမ္ဘာတစ်ဝန်းရှိ စားသုံးသူများထံ မျှဝေပေးခြင်းအားဖြင့် နှစ်နိုင်ငံအကြား ပူးပေါင်းဆက်ဆံရေးကို ပိုမိုခိုင်မာစေကြောင်း ကုန်သွယ်ရေးဒုတိယဝန်ကြီးက ပြောကြားခဲ့ကြောင်း သိရှိရပါသည်။

Antara News                                                                             

DOCA (ရန်ကုန်)

    အိန္ဒိယအစိုးရသည် ပွဲတော်ရာသီမတိုင်မီ သကြားသိုလှောင်မှုကို တားဆီးရန်အတွက် နိုင်ငံ တစ်ဝန်းရှိ ပုဂ္ဂလိက သကြားကုန်သည်များနှင့် ဖြန့်ချိရောင်းချသူများအပေါ် သကြားလက်ကျန် ပမာဏကန့်သတ်ချက်ကို သတ်မှတ်လိုက်ကြောင်း၊ စားသုံးသူရေးရာ၊ အစားအသောက်နှင့် အများ ပြည်သူဖြန့်ဖြူးရေးဝန်ကြီးဌာနက အဆိုပါကန့်သတ်ချက်သည် ဩဂုတ်လ ၁ ရက်မှ နိုဝင်ဘာလ ၃၀ ရက်အထိ အကျိုးသက်ရောက်မည်ဖြစ်ကြောင်း ၂၀၂၆ ခုနှစ် ဇူလိုင်လ ၂၈ ရက် အင်္ဂါနေ့က ကြေညာခဲ့ကြောင်းသိရသည်။

    ET သတင်းဌာနက သကြားဈေးနှုန်းများ စံချိန်တင်မြင့်တက်လာပြီးနောက် အစိုးရက သကြားလက်ကျန်ပမာဏ ကန့်သတ်ရန် စဉ်းစားနေကြောင်းကို ပထမဆုံး ဖော်ပြခဲ့သည်။ Sugar (Control) Order, 2025 အရ မည်သည့်ကုန်သည်မဆို တစ်နေရာတည်းတွင် သကြား ၄,၀၀၀ Quintals (တန်ချိန် ၄၀၀ ခန့်) ထက်ပို၍ သိုလှောင်ခြင်းမပြုရန်နှင့် လက်ခံရရှိသော သကြားများကို ရက်ပေါင်း ၃၀ အတွင်း ရောင်းချခြင်း သို့မဟုတ် လည်ပတ်ဖြန့်ချိခြင်း ပြုလုပ်ရမည်ဖြစ်သည်။ ပြည်နယ် အစိုးရများသည် ဗဟိုအစိုးရက သတ်မှတ်ထားသည့် အဆိုပါလမ်းညွှန်ချက်များကို လျှော့ပေါ့ခွင့်မရှိဘဲ လိုအပ်ပါက ပိုမိုတင်းကျပ်သော ကန့်သတ်ချက်များ ချမှတ်နိုင်ပါသည်။ ကုန်သည်များသည် မိမိတို့၏ သကြားလက်ကျန် အခြေအနေကို အစားအသောက်နှင့် အများ ပြည်သူဖြန့်ဖြူးရေးဌာန (Department of Food and Public Distribution) ၏ Portal တွင် မဖြစ်မနေ ကြေညာရမည်ဖြစ်ပြီး၊ ပုံမှန် အချိန်နှင့်တပြေးညီလည်း အချက်အလက်များကို မွမ်းမံ တင်ပြရမည်ဖြစ်သည်။

    အစိုးရသည် ၂၀၂၆ ခုနှစ် ဩဂုတ်လအတွက် သကြားထုတ်လုပ်ခွင့် (Quota) ကို တန်ချိန် ၂.၂၅ သန်း သတ်မှတ်ထားကြောင်း ကြေညာခဲ့သည်။ သကြားဈေးနှုန်းများ စံချိန်တင် မြင့်မားနေ သော်လည်း ယခုနှစ် Quota ကို မနှစ်ကနှင့် တူညီစွာ သတ်မှတ်ထားကြောင်း ကျွမ်းကျင်သူများက သုံးသပ်သည်။ ထို့အပြင် အစိုးရသည် သကြားစက်ရုံများရှိ သကြားလက်ကျန်များကို ဩဂုတ်လ ၁ ရက်မှ ၁၄ ရက်အတွင်း ကွင်းဆင်းစစ်ဆေးမည် ဖြစ်ကြောင်း ပြီးခဲ့သည့်အပတ်က ကြေညာခဲ့ ကြောင်းသိရပါသည်။

Source – The Hindu Business Line, 28 July 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

   အမေရိကန်-အစ္စရေးနှင့် အီရန်စစ်ပွဲကြောင့် ပင်လယ်ကွေ့ဒေသ အဓိကဈေးကွက်နှင့် ကုန်သွယ်မှုများ ကမောက်ကမဖြစ်ပေါ်ပြီး အိန္ဒိယ၏ ဘာစမာတီ (Basmati) ဆန်တင်ပို့မှု ကျဆင်း သွားခဲ့သော်လည်း ဘာစမာတီမဟုတ်သော (Non-Basmati) ဆန်တင်ပို့မှု ပိုမိုမြင့်တက်လာခြင်း ဖြင့် အစားထိုးနိုင်ခဲ့သည်။ ၂၀၂၆ ခုနှစ် ပထမနှစ်ဝက်အတွင်း အိန္ဒိယနိုင်ငံ၏ ဆန်တင်ပို့မှုပမာဏ သည် ယခင်နှစ် အလားတူကာလထက် ၅ ရာခိုင်နှုန်း မြင့်တက်လာခဲ့ကြောင်း အစိုးရအရာရှိများက ပြောကြားခဲ့သည်။

    ကမ္ဘာ့ဆန်တင်ပို့မှု စုစုပေါင်း၏ ၄၀ ရာခိုင်နှုန်းကျော်ကို တာဝန်ယူထားသည့် အိန္ဒိယနိုင်ငံ သည် ပုံမှန်အားဖြင့် ဒုတိယ၊ တတိယနှင့် စတုတ္ထ အကြီးဆုံး ဆန်တင်ပို့သည့် ထိုင်း၊ ဗီယက်နမ်နှင့် ပါကစ္စတန် သုံးနိုင်ငံ၏ စုစုပေါင်းတင်ပို့မှုထက်ပင် ပိုမိုများပြားစွာ တင်ပို့လေ့ရှိသည်။

    အယ်လ်နီညိုရာသီဥတုဖြစ်စဉ်ကြောင့် ထုတ်လုပ်မှုကို ထိခိုက်နိုင်ဖွယ်ရှိသော်လည်း ယခု ကဲ့သို့ အိန္ဒိယ၏ ဆန်တင်ပို့မှု ပိုမိုများပြားလာခြင်းသည် ကမ္ဘာ့ဆန်ဈေးနှုန်း အဆမတန် မြင့်တက် ခြင်း မရှိစေရန် ထိန်းထားပေးနိုင်ဖွယ်ရှိပြီး အာဖရိကနှင့် အာရှရှိ ဈေးနှုန်းအပြောင်းအလဲသည် ဝယ်ယူသူများအတွက် သက်သာသောဈေးနှုန်းဖြင့် ရရှိနိုင်ရန် အာမခံချက်ပေးလျက်ရှိသည်။

    ဇန်နဝါရီလမှ ဇွန်လအထိ အိန္ဒိယ၏ ဆန်တင်ပို့မှုသည် ယခင်နှစ် အလားတူကာလက တန်ချိန် ၁၁.၆၈ သန်း ရှိခဲ့ရာမှ ယခုအခါ တန်ချိန် ၁၂.၂၇ သန်းအထိ မြင့်တက်လာခဲ့သည်။ အီရန်အပါအဝင် ဈေးကွက်များသို့ တင်ပို့မှု ကျဆင်းသွားခဲ့သဖြင့် ထိုကာလအတွင်း ဘာစမာတီ ဆန် တင်ပို့မှုသည် ၅.၅ ရာခိုင်နှုန်း ကျဆင်းကာ တန်ချိန် ၃.၃၆ သန်းသာ ရှိခဲ့သည်။ သို့သော် အာဖရိကနိုင်ငံများမှ ဝယ်လိုအား ပိုမိုမြင့်တက်လာမှုကြောင့် ဘာစမာတီမဟုတ်သော ဆန်တင်ပို့ မှုသည် ၉.၆ ရာခိုင်နှုန်းအထိ မြင့်တက်သွားခဲ့ပြီး တန်ချိန် ၈.၉ သန်း ရှိခဲ့သည်။

    အိန္ဒိယတွင် ရောင်းလိုအား မြင့်မားနေခြင်းသည် အိန္ဒိယဆန်၏ ဈေးနှုန်းကို အဓိက တင်ပို့ သူများဖြစ်ကြသည့် ထိုင်း၊ ဗီယက်နမ်နှင့် မြန်မာနိုင်ငံတို့ထက် အလွန်ပင် သက်သာသောဈေးနှုန်း ဖြင့် ရောင်းချနိုင်ခြင်းကြောင့်ဖြစ်ကြောင်း အိန္ဒိယအလယ်ပိုင်း Chhattisgarh ပြည်နယ် Raipur မြို့မှ ဆန်တင်ပို့သူ Mukesh Jain က ပြောကြားခဲ့သည်။

    အိန္ဒိယသည် ဘာစမာတီမဟုတ်သော ဆန်များကို ဘင်္ဂလားဒေ့ရှ်၊ ဘီနင်၊ အိုင်ဗိုရီကိုစ့်၊ ဂီနီ နှင့် ကင်မရွန်း ဈေးကွက်များသို့ အဓိက တင်ပို့ပြီး အရည်အသွေးမြင့် ဘာစမာတီ ဆန်များကိုမူ ဆော်ဒီအာရေးဗီးယား၊ အီရတ်၊ အီရန်နှင့် အာရပ်စော်ဘွားများပြည်ထောင်စု (ယူအေအီး) ရှိ ဝယ်ယူသူများထံ အဓိက တင်ပို့ခြင်းဖြစ်သည်။

    အိန္ဒိယနိုင်ငံသည် ပြောင်းကို စံချိန်တင် ထုတ်လုပ်နိုင်ခဲ့မှုကြောင့် ပြည်တွင်းဈေးနှုန်းများ ကျဆင်းသွားပြီး ဗီယက်နမ်၊ ဘင်္ဂလားဒေ့ရှ်နှင့် မလေးရှားနိုင်ငံတို့ထံမှ ဝယ်လိုအား မြင့်တက် လာခဲ့ပြီး ၂၀၂၆ ခုနှစ် ပထမနှစ်ဝက် အတွင်း အိန္ဒိယ၏ ပြောင်းတင်ပို့မှုသည် ယခင်နှစ် အလားတူ ကာလထက် ၄၀၀ ရာခိုင်နှုန်းအထိ အဆမတန် မြင့်တက်ခဲ့ပြီး တန်ချိန် ၁.၄၂ သန်း ရှိခဲ့သည်။

    အိန္ဒိယဘက်မှ ဂျုံတင်ပို့မှု ကန့်သတ်ချက်များကို ဖယ်ရှားပေးခဲ့ပြီးနောက် နီပေါနိုင်ငံမှ စတင် ဝယ်ယူခဲ့ခြင်းကြောင့် ပထမနှစ်ဝက်အတွင်း ဂျုံတင်ပို့မှုသည် ယခင်နှစ်တွင် တန်ချိန် ၁,၄၆၃ တန်သာ ရှိခဲ့ရာမှ ယခုအချိန်၌ တန်ချိန် ၁၆၁,၁၈၇ တန်အထိ မြင့်တက်လာခဲ့သည်။

Source: The Economic Times, Jul 28, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

         အတင်းအဓမ္မ စေခိုင်းထားသော လုပ်အားများကို အသုံးပြု၍ ထုတ်လုပ်ထားသည့် ကုန်ပစ္စည်းများ တင်သွင်းမှုကို ပိတ်ပင်တားဆီးသည့် စည်းမျဉ်းများကို ထိုကုန်သွယ်ဖက် နိုင်ငံများက ပြဋ္ဌာန်းခြင်း သို့မဟုတ် ထိရောက်စွာ အကောင်အထည်ဖော်ခြင်းမရှိဟု ဝါရှင်တန်က စွပ်စွဲပြောဆိုထားကြောင်း သိရသည်။

         ယာယီကမ္ဘာလုံးဆိုင်ရာ ၁၀ ရာခိုင်နှုန်း သွင်းကုန်အခွန် သက်တမ်းကုန်ဆုံးပြီး မကြာမီ အမေရိကန်စံတော်ချိန် ဇူလိုင် ၂၄ ရက်တွင် အခွန်တိုးမြှင့်ကောက်ခံမှုအသစ်များ စတင်သက်ရောက်မည်ဖြစ်သည်။ ယခုလှုပ်ရှားမှုသည် မကြာသေးမီက ဥပဒေကြောင်းအရ စိန်ခေါ်မှုများနှင့် ရင်ဆိုင်ခဲ့ ရပြီးနောက်ပိုင်း ကျယ်ပြန့်သော သွင်းကုန်အခွန် မူဝါဒကို ဆက်လက်ထိန်းသိမ်းရန် အိမ်ဖြူတော်၏ နောက်ဆုံးကြိုးပမ်းမှုတစ်ခုလည်း ဖြစ်ကြောင်း သိရသည်။

        ပြီးခဲ့သည့် ဖေဖော်ဝါရီလအတွင်းက အမျိုးသား အရေးပေါ်အခြေအနေ ပြဋ္ဌာန်းချက်ဥပဒေကို အခြေခံ၍ ထရန့်အစိုးရအဖွဲ့က လွန်ခဲ့သည့်နှစ်တွင် စတင်ကောက်ခံခဲ့သော ၁၀ ရာခိုင်နှုန်းမှ ၅၀ ရာခိုင်နှုန်းအထိရှိသည့် သွင်းကုန်အခွန်များကို အမေရိကန် တရားလွှတ်တော်ချုပ်က ပယ်ဖျက်ခဲ့သည်။ အဆိုပါ မူဝါဒကို အမေရိကန်၏ ကုန်သွယ်ရေး လိုငွေပြမှုကို လျှော့ချရန်နှင့် ကုန်ထုတ်လုပ်မှုများကို အမေရိကန်သို့ ပြန်လည်ယူဆောင်လာရန် ယခင်က အကောင်အထည်ဖော်ခဲ့ခြင်းဖြစ်ကြောင်း သိရသည်။

       ဇူလိုင် ၂၃ ရက်တွင် Federal Register ၌ ထုတ်ပြန်ခဲ့သည့် ကြေညာချက်အရ အခွန်တိုးမြှင့်ကောက်ခံမှု အသစ်များသည် အမေရိကန် သွင်းကုန်၏ ၉၉.၄ ရာခိုင်နှုန်း အပေါ်သက်ရောက်မည် ဖြစ်သည်။ သို့သော် ရေနံနှင့် သဘာဝဓာတ်ငွေ့၊ ဓာတ်မြေဩဇာနှင့် အချို့သော အစားအသောက် ထုတ်ကုန်များအပါအဝင် ပစ္စည်းအမြောက်အမြားကိုမူ သွင်းကုန်အခွန် ကင်းလွတ်ခွင့်ပေးထားကြောင်း သိရသည်။

        အမေရိကန်သည် အာဂျင်တီးနား၊ ဘင်္ဂလားဒေ့ရှ်၊ ဗြိတိန်၊ ကမ္ဘောဒီးယား၊ ကနေဒါ၊ အီကွေဒေါ၊ အိန္ဒိယ၊ အင်ဒိုနီးရှား၊ ဂျော်ဒန်၊ မလေးရှား၊ မက္ကဆီကိုနှင့် သီရိလင်္ကာ အပါအဝင် ကုန်သွယ်ဖက် ၁၇ နိုင်ငံ မှ တင်သွင်းလာသော ကုန်ပစ္စည်းများအပေါ် အပိုဆောင်း ၁၀ ရာခိုင်နှုန်း အခွန် ကောက်ခံမည်ဖြစ်ကြောင်း သိရသည်။

          ဥရောပသမဂ္ဂ (EU)၊ ထိုင်ဝမ်၊ ဂျပန်၊ တောင်ကိုရီးယားနှင့် ဆဗစ်ဇာလန်တို့အတွက်မူ သီးခြားတွက်ချက်မှု နည်းလမ်းများကို အသုံးပြုမည်ဖြစ်သည်။ EU နှင့် ထိုင်ဝမ်တို့မှ ကုန်ပစ္စည်းများအတွက် အမေရိကန်သည် လက်ရှိအထူးအခွင့်အရေးပေး ကုန်သွယ်ခွင့် (MFN) အခွန်အပါအဝင် စုစုပေါင်း အခွန်နှုန်းထား ၁၀ ရာခိုင်နှုန်း ပြည့်မီစေရန် အပိုဆောင်း အခွန်များ စည်းကြပ်မည် ဖြစ်သည်။ ဂျပန်၊ တောင်ကိုရီးယားနှင့် ဆဗစ်ဇာလန်တို့မှ ကုန်ပစ္စည်းများအတွက် အဆိုပါ သတ်မှတ်ချက်မှာ ၁၂.၅ ရာခိုင်နှုန်း ဖြစ်သည်။ အကယ်၍ လက်ရှိ MFN အခွန်နှုန်းထားသည် သတ်မှတ်ထားသော သတ်မှတ်ချက်နှင့် ညီမျှနေပါက သို့မဟုတ် ပိုမိုမြင့်မားနေပါက ပုဒ်မ ၃၀၁ အရ အပိုဆောင်းအခွန်များ ကောက်ခံမည် မဟုတ်ပါ။ တရုတ်နိုင်ငံ အပါအဝင် ကျန်ရှိသော ကုန်သွယ်ဖက် ၃၈ နိုင်ငံမှ ကုန်ပစ္စည်းများသည် အပိုဆောင်း ၁၂.၅ ရာခိုင်နှုန်း အခွန်ကောက်ခံခြင်း ခံရမည်ဖြစ်ကြောင်း သိရှိရပါသည်။

Source : Nation Thailand                                                                   

DOCA (ရန်ကုန်)

        တူရကီနိုင်ငံသည် ဗီယက်နမ်နိုင်ငံ၏ အစားအစာ၊ အဖျော်ယမကာနှင့် စိုက်ပျိုးရေးထွက်ကုန်များအတွက် အလားအလာကောင်းသည့် ဈေးကွက်တစ်ခုအဖြစ် ပေါ်ထွက်လာနေသော်လည်း ဈေးကွက်ဝေစုတိုးချဲ့လိုသည့် စီးပွားရေးလုပ်ငန်းများအနေဖြင့် နည်းပညာဆိုင်ရာနှင့် ကုန်သွယ်ရေးဆိုင်ရာ အတားအဆီးများကို ကျော်လွှားရန်လိုအပ်နေကြောင်း ဇူလိုင် ၂၁ ရက်က ကျင်းပသည့်ဆွေးနွေးပွဲတွင် ပြောကြားခဲ့ကြပါသည်။ အဆိုပါဆွေးနွေးပွဲကို စက်မှုနှင့်ကုန်သွယ်ရေးဝန်ကြီးဌာနလက်အောက်ရှိ ဗီယက်နမ်ကုန်သွယ်မှုမြှင့်တင်ရေးအေဂျင်စီ (Vietrade) ၏ ကုန်သွယ်ရေးနှင့် ရင်းနှီးမြှုပ်နှံမှုမြှင့်တင်ရေး အထောက်အကူပြုဗဟိုဌာနက စီစဉ်ကျင်းပခဲ့ခြင်းဖြစ်ကြောင်း သိရပါသည်။ ဖွင့်ပွဲအခမ်းအနားတွင် ဗဟိုဌာနညွှန်ကြားရေးမှူး Ta Manh Cuong က ကမ္ဘာ့ကုန်သွယ်ရေးမတည်ငြိမ်မှုများ မြင့်တက်လာနေသည့်အခြေအနေတွင် တူရကီနိုင်ငံသည် အာရှ၊ ဥရောပနှင့် အာဖရိကတိုက်တို့ကိုချိတ်ဆက်ပေးသည့် မဟာဗျူဟာမြောက် ကုန်သွယ်ရေး အကူးအပြောင်းဗဟိုချက်တစ်ခုအဖြစ် ပိုမိုအရေးပါလာကြောင်း ပြောကြားခဲ့ပါသည်။ ၂၀၂၆ ခုနှစ် ပထမနှစ်ဝက်အတွင်း ဗီယက်နမ်နှင့် တူရကီနှစ်နိုင်ငံအကြား ကုန်သွယ်မှုပမာဏမှာ အမေရိကန် ဒေါ်လာ ၁.၃၉ ဘီလီယံရှိခဲ့ပြီး ဗီယက်နမ်၏ တင်ပို့မှုသည် ယခင်နှစ်တူညီသည့်ကာလထက် ၃၂ ရာခိုင်နှုန်း တိုးတက်ခဲ့ကြောင်း သိရပါသည်။ တူရကီနိုင်ငံသည် ၂၀၂၆ ခုနှစ်တွင် ကုန်စည်နှင့် ဝန်ဆောင်မှုတင်ပို့မှု စုစုပေါင်းတန်ဖိုးကို အမေရိကန်ဒေါ်လာ ဘီလီယံ ၄၀၀ ကျော်အထိ တိုးမြှင့် ရန်ရည်မှန်းထားသဖြင့် ဗီယက်နမ်၏ စိုက်ပျိုးရေးထွက်ကုန်များ၊ အစားအစာနှင့် အဖျော်ယမကာများအတွက် အခွင့်အလမ်းသစ်များ ပိုမိုဖန်တီးပေးနိုင်မည်ဖြစ်ကြောင်း သိရပါသည်။ ဗီယက်နမ်၏ အစားအစာနှင့် အဖျော်ယမကာလုပ်ငန်းသည် ကုန်ကြမ်းအရည်အသွေးမြှင့်တင်ခြင်းနှင့် တန်ဖိုးမြှင့်ပြုပြင်ထုတ်လုပ်ရေးနည်းပညာများ အသုံးပြုခြင်းတို့တွင် သိသာထင်ရှားစွာ တိုးတက်လာခဲ့ပြီး လက်ရှိတွင် ကမ္ဘာ့ထိပ်တန်းစိုက်ပျိုးရေးနှင့် အစားအစာထုတ်ကုန်တင်ပို့သည့် နိုင်ငံများထဲမှ တစ်နိုင်ငံအဖြစ် ရပ်တည်နေကြောင်း Cuong က ပြောကြားခဲ့ပါသည်။ ယခုနှစ် ဇန်နဝါရီလမှ ဇွန်လအထိ ကော်ဖီ၊ သီဟိုဠ်စေ့၊ ဆန်၊ ဟင်းခတ်အမွှေးအကြိုင်နှင့် ငရုတ်ကောင်းတို့၏ တင်ပို့မှုတန်ဖိုးမှာ အမေရိကန်ဒေါ်လာ ၉၅၀.၂ သန်းရှိခဲ့ပြီး ယခင်နှစ်ထက် ၁၂.၁ ရာခိုင်နှုန်း တိုးတက် ခဲ့သည့်အပြင် နိုင်ငံတကာအစားအစာဘေးကင်းလုံခြုံရေး စံချိန်စံညွှန်းများနှင့်လည်း ပိုမိုကိုက်ညီလာကြောင်း သိရပါသည်။ သို့သော် တူရကီဈေးကွက်သို့ ပိုမိုနက်ရှိုင်းစွာဝင်ရောက်လိုသည့် စီးပွားရေးလုပ်ငန်းများအနေဖြင့် အပင်ကျန်းမာရေးဆိုင်ရာ စည်းမျဉ်းသတ်မှတ်ချက်များ (Phytosanitary Requirements)၊ အကောက်ခွန်လုပ်ထုံးလုပ်နည်းများနှင့် မွတ်စလင်စားသုံးသူ များအတွက်လိုအပ်သည့် ဟာလာလ် (Halal) အသိအမှတ်ပြုလက်မှတ်ဆိုင်ရာ သတ်မှတ်ချက်များကို ကျော်လွှားရမည်ဖြစ်ကြောင်း Cuong က သတိပေးပြောကြားခဲ့ပါသည်။ ထို့ပြင် နိုင်ငံတကာထောက်ပံ့ပို့ဆောင်ရေးကုန်ကျစရိတ်၊ ပင်လယ်ရေကြောင်းကုန်စည်ပို့ဆောင်ခနှင့် ငွေပေးချေမှုနည်းလမ်းများကိုလည်း ဂရုတစိုက်ထည့်သွင်းစဉ်းစားရန် လိုအပ်ကြောင်းလည်း သိရပါသည်။ ထိုဆွေးနွေးပွဲသည် စည်းမျဉ်းကြီးကြပ်ရေးအဖွဲ့များ၊ တူရကီနိုင်ငံဆိုင်ရာ ဗီယက်နမ် ကုန်သွယ်ရေးရုံး၊ လုပ်ငန်းအသင်းအဖွဲ့များ၊ ကျွမ်းကျင်ပညာရှင်များနှင့် စီးပွားရေးလုပ်ငန်းရှင်များအကြား ဈေးကွက်အချက်အလက်များ ဖလှယ်နိုင်ရေးနှင့် ပြည်ပတင်ပို့သူများ ကြုံတွေ့နေရသည့် အခက်အခဲများအတွက် ဖြေရှင်းနည်းများရှာဖွေနိုင်ရေးကို အထောက်အကူပြုခဲ့ကြောင်း သိရပါသည်။ Vietrade အနေဖြင့် ဈေးကွက်အချက်အလက်ဝန်ဆောင်မှုများ၊ ဈေးကွက်လေ့လာ ရေးခရီးစဉ်များ၊ စီးပွားရေးချိတ်ဆက်ပွဲများနှင့် နိုင်ငံတကာစံချိန်စံညွှန်းများနှင့် ကိုက်ညီစေရန် လေ့ကျင့်ရေးအစီအစဉ်များမှတစ်ဆင့် စီးပွားရေးလုပ်ငန်းများကို ဆက်လက်ပံ့ပိုးပေးသွားမည်ဖြစ်ကြောင်း Cuong က ပြောကြားခဲ့ပါသည်။ ၂၀၂၆ ခုနှစ် အမျိုးသားကုန်သွယ်မှုမြှင့်တင် ရေးအစီအစဉ်အရ Vietrade သည် ဩဂုတ် ၂၅ ရက်မှ စက်တင်ဘာ ၃ ရက်အထိ တူရကီနှင့် စပိန်နိုင်ငံများသို့ ကုန်သွယ်ရေးကိုယ်စားလှယ်အဖွဲ့ စေလွှတ်သွားမည်ဖြစ်ပြီး ထိုအစီအစဉ်မှတစ်ဆင့် ဗီယက်နမ်စီးပွားရေးလုပ်ငန်းများသည် ဈေးကွက်ကိုလေ့လာနိုင်သည့်အပြင် အလားအလာရှိသည့် မိတ်ဖက်လုပ်ငန်းရှင်များနှင့် တိုက်ရိုက်ချိတ်ဆက်နိုင်မည်ဖြစ်ကြောင်း သိရပါသည်။ တူရကီနိုင်ငံဆိုင်ရာ ဗီယက်နမ်ကုန်သွယ်ရေးအတိုင်ပင်ခံနှင့် ကုန်သွယ်ရေးရုံးအကြီးအကဲ Nguyen Viet Hang က တူရကီစားသုံးသူများ၏စားသုံးမှုပုံစံ၊ အစားအစာနှင့် အဖျော်ယမကာ တင်သွင်းမှုဝယ်လိုအားနှင့် ကုန်သွယ်ရေးမူဝါဒသစ်များကို ဆွေးနွေးတင်ပြခဲ့ကြောင်း သိရပါသည်။

        ဗီယက်နမ်လူမှုသိပ္ပံအကယ်ဒမီလက်အောက်ရှိ တောင်အာရှ၊ အနောက်အာရှနှင့် အာဖရိက လေ့လာရေးဌာနမှ တွဲဖက်ပါမောက္ခ ဒေါက်တာ Dinh Cong Hoang က စိုက်ပျိုးရေးထွက်ကုန်၊ ရေထွက်ပစ္စည်း၊ ပြုပြင်ထုတ်လုပ်ထားသော အစားအစာနှင့် အဖျော်ယမကာများ တင်ပို့နိုင်မည့် အလားအလာများကို သုံးသပ်တင်ပြခဲ့ပြီး သင့်လျော်သည့် ဖြန့်ဖြူးရေးလမ်းကြောင်းများကိုလည်း အကြံပြုခဲ့ကြောင်း သိရပါသည်။ VIETTURK ကုမ္ပဏီလီမိတက်၏ ဒါရိုက်တာ Doan The Hop ကလည်း တူရကီစီးပွားရေးမိတ်ဖက်များနှင့် ဆောင်ရွက်ခဲ့သည့်အတွေ့အကြုံများ၊ စီးပွားရေးယဉ်ကျေးမှုနှင့် သွင်းကုန်၊ ထုတ်ကုန်လုပ်ငန်းများတွင် အရေးကြီးသည့်အချက်များကို မျှဝေတင်ပြခဲ့ကြောင်း သိရပါသည်။ အဆိုပါဆွေးနွေးပွဲမှတစ်ဆင့် ဗီယက်နမ်စီးပွားရေးလုပ်ငန်းများသည် တူရကီဈေးကွက်၏လိုအပ်ချက်များကို ပိုမိုရှင်းလင်းစွာနားလည်သဘောပေါက်လာပြီး အစားအစာ၊ အဖျော်ယမကာနှင့် ယှဉ်ပြိုင်နိုင်စွမ်းရှိသည့် စိုက်ပျိုးရေးထွက်ကုန်များကို ပြည်ပတင်ပို့မှု တိုးချဲ့နိုင်ရန် ပိုမိုထိရောက်သည့်မဟာဗျူဟာများ ချမှတ်နိုင်လိမ့်မည်ဟု ဆွေးနွေးပွဲစီစဉ်သူများက မျှော်လင့်ထားကြောင်း သိရှိရပါသည်။

Vietnam Plus                                                                            

DOCA (ရန်ကုန်)