အိန္ဒိယနိုင်ငံ၏ စားသောက်ကုန်အမျိုးမျိုး တင်ပို့မှုအပေါ် ချမှတ်ထားသော မူဝါဒကန့်သတ်ချက်များနှင့် ပြည်တွင်း နိုင်ငံရေးပြဿနာများကြောင့် အိန္ဒိယထံမှ ဆန်နှင့် သကြား တင်သွင်းရာ တွင် အဟန့်အတားဖြစ်ပေါ်နေကြောင်း အင်ဒိုနီးရှား အမျိုးသားစားနပ်ရိက္ခာအေဂျင်စီ (Bapanas) ၏ အကြီးအကဲဖြစ်သူ Arief Prasetyo Adi က ၂၂-၁၂-၂၀၂၃ နေ့တွင် ပြောကြားခဲ့ပါသည်။
အစောပိုင်းကာလတွင် အိန္ဒိယသံတမန်တစ်ဦးသည် အင်ဒိုနီးရှားကုန်သွယ်ရေးဝန်ကြီး Zulkifli Hasan နှင့် တွေ့ဆုံခဲ့ပြီး အင်ဒိုနီးရှားအတွက် ဆန်တန်ချိန်တစ်သန်းထောက်ပံ့ပေးမည်ဟု ကတိပြုခဲ့ကြောင်း၊ သို့သော် နောက်ပိုင်း၌ အိန္ဒိယဘက်မှ နိုင်ငံရေး အကြောင်းပြချက်များအရ ဆန်တင်ပို့မှုကို ပိတ်ပင်ခဲ့ရာ အခြားနိုင်ငံများမှ ဝယ်ယူနိုင်ရေးကို ရွေးချယ်ဆောင်ရွက်ခဲ့ရကြောင်း၊ အယ်လ်နီညို ရာသီဥတုဖြစ်စဉ်ကြောင့် ပြည်တွင်း စိုက်ပျိုးထုတ်လုပ်မှု လျော့နည်းလာသဖြင့် စားနပ်ရိက္ခာ လိုအပ်ချက်အတွက် ဆန်တန်ချိန် ၂ သန်းကို ဖြည့်တင်းရန် သမ္မတဂျိုကိုဝီဒိုဒိုက နိုင်ငံပိုင် ထောက်ပံ့ပို့ဆောင်ရေးကုမ္ပဏီဖြစ်သော PT Bulog အား တာဝန်ပေးအပ်ခဲ့ကြောင်း၊ ဗီယက်နမ်၊ ထိုင်း၊ ပါကစ္စတန်နှင့် ကမ္ဘောဒီးယားနိုင်ငံတို့ထံမှ ဆန်တင်သွင်းမှုများဖြင့် အဆိုပါ တာဝန်ပေးအပ်ချက်ကို ဖြည့်ဆည်းနိုင်ခဲ့ကြောင်းဖြင့် Adi က မှတ်ချက်ပြု ပြောကြားခဲ့သည်။
Adi ၏ ပြောဆိုမှုအရ အင်ဒိုနီးရှားနိုင်ငံအနေဖြင့် ပြည်တွင်း စားနပ်ရိက္ခာဖူလုံမှုရှိစေရေးအတွက် ဆန်တင်သွင်းရာတွင် ပင်ရင်းနိုင်ငံ တသမတ်တည်းမထားပဲ အရင်းအမြစ်များစွာထံရ ရယူမည်ဖြစ်ကြောင်း၊ ထို့အပြင် ၂၀၁၂ ခုနှစ် စားနပ်ရိက္ခာ ဥပဒေအမှတ် ၁၈ ၌ ပြဋ္ဌာန်းထားသည့်အတိုင်း စားနပ်ရိက္ခာဖူလုံရေး ဖြည့်ဆည်းရာတွင် ပြည်တွင်းထုတ်လုပ်မှုကို ဦးစားပေး လုပ်ဆောင်မည်ဖြစ်ကြောင်း သိရှိရသည်။
Source: Antara News, 22 Dec 2023(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)