အိန္ဒိယပြည်တွင်း၌ ဝယ်လိုအား ဆက်လက်မြင့်မားနိုင်မှုနှင့် ဈေးနှုန်းများ ထိန်းသိမ်းရန် လိုအပ်သည့် အခြေအနေများအရ ၃၁-၃-၂၀၂၄ နေ့တွင် သက်တမ်းပြည့်မြောက်မည်ဖြစ်သော ပဲစင်းငုံနှင့် မတ်ပဲအား အရေအတွက်ကန့်သတ်ချက်မရှိပဲ လွတ်လပ်စွာ တင်သွင်းခွင့်ပြုထားသည့် မူဝါဒကို ၂၀၂၅ ခုနှစ် မတ်လ ၃၁ ရက်နေ့အထိ တိုးမြှင့်သတ်မှတ်ကြောင်း အိန္ဒိယအစိုးရက ၂၈-၁၂-၂၀၂၃ နေ့တွင် အမိန့်ကြော်ငြာစာ ထုတ်ပြန်ခဲ့ပါသည်။
အိန္ဒိယအစိုးရသည် ကန့်သတ်တင်သွင်းခွင့်ပြုသည့် ကုန်စည်အဖြစ် ယခင်က သတ်မှတ် ထားခဲ့သော ပဲစင်းငုံ၊ မတ်ပဲနှင့် ပဲတီစိမ်းတို့ကို ၁၅-၅-၂၀၂၁ ရက်နေ့မှစတင်၍ လွတ်လပ်စွာ တင်သွင်းခွင့်ရှိသော ကုန်စည်အဖြစ်သို့ ကာလအပိုင်းအခြား သတ်မှတ်ချက်ဖြင့် ဖြေလျှော့ပေးခဲ့ပြီး အဓိကစိုက်ပျိုးထုတ်လုပ်သော ပြည်နယ်များတွင် မိုးရေချိန်လျော့နည်းရရှိမှုအရ ပဲမျိုးစုံ ထုတ်လုပ် မှုကျဆင်းခဲ့သဖြင့် နောက်ပိုင်းနှစ်များတွင် အိန္ဒိယ ပြည်ပကုန်သွယ်ရေးညွှန်ကြားမှု ဦးစီးဌာနက အမိန့်ကြော်ငြာစာများ ထုတ်ပြန်လျက် ဆက်လက်၍ သက်တမ်းတိုးမြှင့်ဆောင်ရွက်ခဲ့သည်။
အိန္ဒိယ စိုက်ပျိုးရေးဝန်ကြီးဌာန၏ ကနဦးခန့်မှန်းချက်များအရ ယခုနှစ် မိုးသီးနှံရာသီ၌ စိုက်ပျိုးထုတ်လုပ်မှုမှ မတ်ပဲထွက်ရှိနိုင်မှုမှာ တန်ချိန် ၁၅.၀၅ သိန်းရှိပြီး ယခင်နှစ် ထွက်ရှိမှု တန်ချိန် ၁၇.၆၈ သိန်းအောက် လျော့ကျမည်ဖြစ်သည်။ ပဲစင်းငုံထွက်ရှိနိုင်မှုမှာ ယခင်နှစ် ထုတ်လုပ်မှု တန်ချိန် ၃၃.၁၂ သိန်းထက် ကျော်လွန်လျက် ယခုနှစ်တွင် တန်ချိန် ၃၄.၂ သိန်း အထိ ထွက်ရှိနိုင်မည်ဟု အစိုးရက ခန့်မှန်းထားသော်လည်း ကျွမ်းကျင်သူများက စိုက်ဧကကျဆင်းမှုကြောင့် အဆိုပါခန့်မှန်းချက်မှာ သံသယဖြစ်ဖွယ်ရှိကြောင်း ပြောဆိုလျက်ရှိသည်။
Source: The Hindu Business Line, 28 Dec 2023(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)