ကမ္ဘာ့ထိပ်တန်းစားသုံးဆီတင်သွင်းသည့် အိန္ဒိယနိုင်ငံ၌ အစိုးရသည် ရွေးကောက်ပွဲများ ကျင်းပပြုလုပ်သည့် ကာလမတိုင်မီ ပြည်ပမှစားသုံးဆီဝယ်ယူမှုများကို အထောက်အပံ့ပေးအပ်နိုင်ရန်နှင့် ဈေးနှုန်းများကို ထိန်းချုပ်နိုင်ရန်တို့အတွက် စားအုန်းဆီကြမ်း၊ ပဲပုပ်ဆီနှင့် နေကြာဆီများကို အခွန်လျှော့ချတင်သွင်းခွင့် ၁ နှစ်သက်တမ်းတိုးမြှင့်လိုက်ကြောင်း သိရှိရပါသည်။
ဘဏ္ဍာရေးဝန်ကြီးဌာန၏ ထုတ်ပြန်ကြေညာချက်အရ ၂ဝ၂၅ ခုနှစ် မတ်လအထိ ကုန်သည်များနှင့် ပြုပြင်ထုတ်လုပ်သည့်လုပ်ငန်းရှင်များသည် စားသုံးဆီအပေါ် သွင်းကုန်ခွန်ပေးဆောင်ရန် လိုအပ်မည် မဟုတ်ကြောင်းနှင့် လယ်ယာစိုက်ပျိုးရေးနှင့် လူမှုဖူလုံရေးဆိုင်ရာအခွန်အခများကဲ့သို့သော အခြားအခွန်အခများကိုမူ ပေးဆောင်သွားရမည်ဖြစ်ကြောင်း သိရှိရပါသည်။ သို့ဖြစ်ရာ သန့်စင်ပြီး စားအုန်းဆီ၊ ပဲပုပ်ဆီနှင့် နေကြာဆီ တို့အပေါ် ကောက်ခံသည့် အခြေခံအကောက်ခွန် နှုန်းထား ၁၂.၅% မှာ ဆက်လက်တည်ရှိနေမည် ဖြစ်ပါသည်။
အိန္ဒိယနိုင်ငံတွင် စားသောက်ကုန် ဈေးနှုန်းဖောင်းပွမှုနှုန်းမှာ ၂ဝ၂၃ ခုနှစ် နိုဝင်ဘာလတွင် ၈.၇% ရှိခဲ့ရာမှ ဒီဇင်ဘာလအတွင်း ၉.၅၃% သို့ တိုးမြင့်လာခဲ့ကြောင်းနှင့် လယ်ယာထွက်ကုန်များမှာ ယခင်နှစ်ထက် ဈေးပိုမိုမြင့်တက်လာခဲ့ပြီး ဒီဇင်ဘာလတွင် လေးလမြောက် မြင့်တက်လာခဲ့ ခြင်းကြောင့် အစိုးရက လက်လီကဏ္ဍတွင် ငွေကြေးဖောင်းပွမှုကို ထိန်းချုပ်နိုင်ရန် စားသုံးဆီများအပေါ် သွင်းကုန်ခွန်လျှော့ချပေးခဲ့ခြင်း ဖြစ်ပါသည်။
အိန္ဒိယဆီစက်လုပ်ငန်းရှင်များအသင်းမှ အမှုဆောင်ဒါရိုက်တာဖြစ်သူ B.V. Mehta က အစိုးရအနေဖြင့် ဈေးနှုန်းတည်ငြိမ်စေရန် ထိန်းသိမ်းဆောင်ရွက်ခြင်းဖြစ်သော်လည်း ကာလရှည်၌ ပြည်တွင်းဆီထွက်သီးနှံ စိုက်ပျိုးထုတ်လုပ်သူများအပေါ် အနုတ်လက္ခဏာဆောင်သော အကျိုးသက်ရောက်မှုများ ဖြစ်ပေါ်လာနိုင်ကြောင်း၊ ဈေးနှုန်းများအပေါ် ဖိအားများဖြစ်ပေါ်လာနိုင်ခြင်းကြောင့် လယ်သမားများအနေဖြင့် ပိုမိုစိုက်ပျိုးရန် အားလျော့လာကြမည်ဖြစ်ကြောင်း ပြောကြားခဲ့ ပါသည်။
စားသောက်ကုန်ဈေးနှုန်းများ မြင့်တက်နေမှုသည် ဝန်ကြီးချုပ် Narendra Modi ဦးဆောင်သည့် အစိုးရအပေါ် ရွေးကောက်ပွဲမတိုင်မီကာလတွင် ရိုက်ခတ်မှုများ ဖြစ်စေနိုင်ပါသည်။ သို့ဖြစ်ရာ စရိတ်များ လျော့နည်းသက်သာစေရန် အစိုးရသည် ကြက်သွန်နီ၊ ဂျုံ၊ ဆန်နှင့် သကြားအပါအဝင် ထုတ်ကုန်အမျိုးမျိုးတို့အပေါ် တင်ပို့မှုကို ကန့်သတ်ခဲ့သည်။ စားနပ်ရိက္ခာ ဝန်ကြီးဖြစ်သူ Piyush Goyal က အစိုးရအနေဖြင့် လက်ရှိကာလတွင်လည်း ထိန်းချုပ်ဆောင်ရွက်မှုများကို ဆက်လက် ဆောင်ရွက်သွားမည်ဖြစ်ကြောင်း ပြောကြားခဲ့ပါသည်။
မွန်ဘိုင်းမြို့ရှိ Kaleesuwari Intercontinental မှ ကုန်သွယ်မှုဆိုင်ရာ အကြီးအကဲတစ်ဦးဖြစ်သူ Gnanasekar Thiagarajan က ယခုနှစ်သည် ရွေးကောက်ပွဲကျင်းပမည့်နှစ်ဖြစ်သဖြင့် အစိုးရအနေဖြင့် မည်သည့်စွန့်စားမှုများကိုမျှ ပြုလုပ်မည်မဟုတ်ပဲ ငွေကြေးဖောင်းပွမှုကို ထိန်းချုပ်နိုင်ရန်သာ လိုလားမှုရှိကြောင်း ပြောကြားခဲ့ပါသည်။
Source: BNN Bloomberg, 16 January, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)