မန္တလေးတိုင်းဒေသကြီး ၊ ကျောက်ဆည်ခရိုင်တွင် ဆီထွက်သီးနှံမျိုးစုံစိုက်ပျိုးလျှက်ရှိရာ နေကြာသီးနှံကိုလည်း တောင်သူများမှ သီးထပ်သီးညှပ်စိုက်ပျိုးသည့်အပြင် သီးသန့်ဧကအလိုက် စိုက်ပျိုးလျက်ရှိပါသည်။ခရိုင်အတွင်းတွင် မိုးနေကြာစိုက်ဧက (၅၀၃၁)ဧက စိုက်ပျိုးထားရှိပြီး ယခုအချိန်ထိ ရိတ်သိမ်းဧက(၅၀၀၈)ဧက ရိတ်သိမ်းပြီးစီးကြောင်း၊ အထွက်နှုန်းအနေဖြင့် (၁)ဧကလျှင် (၂၇-၂၉)တင်းအထိထွက်ရှိကြောင်း၊ ဆောင်းနေကြာစိုက်ပျိုးမှုအနေဖြင့် ၂၀၂၃ခုနှစ်၊ ဒီဇင်ဘာလကုန်အထိ (၂၉၄၂)ဧကစိုက်ပျိုးထားရှိပြီး ကျောက်ဆည်မြို့နယ်တွင် (၁၁၆၅)ဧက၊ စဉ့်ကိုင်မြို့နယ်တွင် (၁၅၁၇) ဧက ၊ မြစ်သားမြို့နယ်တွင် (၂၆၀)ဧက စိုက်ပျိုးထားရှိကြောင်း ခရိုင်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၏စာရင်းများအရ သိရှိရပါသည်။ ဆောင်းနေကြာစိုက်ပျိုးမှုတွင် ကုန်ကျစရိတ်အနေဖြင့် မျိုး၊သွင်းအားစု၊လုပ်သားခအပါအဝင်(၂၅၀၀၀၀)ကျပ်ခန့်ကုန်ကျကြောင်း၊နေကြာစျေးနှုန်း များအနေဖြင့် ယခင်နေကြာ(၁)တင်းလျှင်(၄၅၀၀၀)ကျပ်ဖြစ်ပြီး နေကြာဆီ(၁)ပိဿာလျှင်(၁၆၅၀၀) ကျပ် ၊ ယခုလက်ရှိပေါက်စျေးအနေဖြင့် နေကြာ (၁)တင်းလျှင်(၃၈၀၀၀)ကျပ် ၊ နေကြာဆီ (၁)ပိဿာ လျှင်(၁၃၀၀၀)ကျပ် တို့ဖြင့် ရောင်းဝယ်လျက်ရှိပါသည် ။ နေကြာများ ဖြိုင်ဖြိုင်ပေါ်ချိန်တွင် စျေးနှုန်း အနည်းငယ်ကျဆင်းကြောင်း ၊ စျေးနှုန်းကျဆင်းသော်လည်း အကျိုးအမြတ်များရရှိကြောင်း၊ ဆောင်းနေကြာထွက်ပေါ်ချိန်တွင် စျေးနှုန်းများကောင်းမွန်ပါက အကျိုးအမြတ်များ ပိုမိုရရှိနိုင်မည်ဖြစ်ပါ ကြောင်း နေကြာအများဆုံးစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)