ဘားအံမြို့အနီးတဝိုက်ရှိ ကျေးရွာများဖြစ်သော ရွှေဂွန်း၊ မင်းဇီ၊ မိဇံ၊ ရေပေါ်သောင်ကျွန်း ဒေသများမှ ထွက်ရှိသော ဆောင်းပဲတီစိမ်း(ရွှေဝါ)အသစ်များ ဘားအံမြို့ ဈေးကွက်သို့ နေ့စဉ်ဝင်ရောက်လျက်ရှိရာ ပဲတီစိမ်း(ရွှေဝါ)ဈေးနှုန်းမှာ ၁ ပိဿာလျှင် ၃၅၀၀ ကျပ်ဖြင့် အရောင်းအဝယ်ဖြစ်လျက်ရှိပြီး (၂၀)ပိဿာဝင် တစ်တင်းလျှင် ၆၅၀၀၀ ကျပ်မှ ၆၈၀၀၀ ကျပ်အထိ ပဲအရည်အသွေးပေါ် မူတည်၍ ဈေးရရှိကာ ယခင်နှစ်ကုန်ပိုင်းကာလ၏ ဈေးနှုန်းထက် ဈေးနှုန်း ထပ်မံမြင့်တက်လာသည် ဟုသိရပါသည်။
၂၀၂၃ခုနှစ်ကုန်ပိုင်းကာလတွင် ပဲတီစိမ်း(ရွှေဝါ)သီးနှံ၏ ပေါက်ဈေးမှာ (၂၀)ပိဿာဝင် တစ်တင်းလျှင် ၆၃၀၀၀ ကျပ်ခန့်သာရှိကြောင်းနှင့် ယခုနှစ်တွင် ပဲတီစိမ်း ဝယ်လိုအားမှာလည်း မြင့်တက်ခဲ့သောကြောင့် ဝင်ရောက်လာသမျှ အရောင်းအဝယ်ဖြစ်ပြီး ဒေသတွင်း ရောင်းဝယ်ဖောက်ကားသည့်အပြင် မော်လမြိုင်၊ ပဲခူးနှင့် ရန်ကုန်မြို့များ သို့လည်း တင်ပို့ကြသည်ဟု ဈေးကွက်ကွင်းဆင်း စုံစမ်းမှုအရ သိရပါသည်။
DOCA(ကရင်)