ပြည်မြို့၏ ဈေးကွက်တွင် သံပုရာသီးများဈေးနှုန်းမြင့်တက်လျက်ရှိပါသည်။ သံပုရာသီးမှာ နွေသီးနှင့် မိုးသီးဟူ၍ (၂)ရာသီသီးပြီး ယခုအချိန်တွင် နွေသံပုရာသီးများ ဈေးကွက်တွင် အရောင်းအဝယ်ကောင်းသဖြင့် ဈေးနှုန်းများ မြင့်တက်လာကြောင်း သိရပါသည်။ ပြည်ဈေးကွက်သို့ ဝင်ရောက်လာသော သံပုရာသီးများမျာ ပြည်မြို့အနီး ပတ်ဝန်းကျင်ရှိ ကျေးရွာများနှင့် ပေါက်ခေါင်း၊ ပေါင်းတလည်ဘက်ရှိ သံပုရာစိုက်ပျိုးသော ကျေးရွာများမှ လာရောက်ရောင်းချကြောင်း သိရပါသည်။ သံပုရာပင်မှာ နှစ်ရှည်ပင်ဖြစ်၍ တစ်ပင်စိုက်ပျိုးထားလျင် နှစ်ပတ်လည် စားသုံးရောင်းချနိုင်သောအပင် ဖြစ်ပါသည်။ သံပုရာပင်တစ်ပင်ကို စိုက်ပျိုးထားလျင် သံပုရာသီးထွက်ပေါ်ချိန်တွင် (၁၀)ရက် တစ်ခါ သို့မဟုတ် (၁၅)ရက်တစ်ခါ ခူးဆွတ်ရပါသည်။ တစ်ခါခူးလျှင် သီးနှုန်းအားကောင်းလျှင် (၅၀၀) လုံးကျော်ထိ ခူးဆွတ်ရရှိကြောင်း သိရပါသည်။ သံပုရာသီးဈေးနှုန်းများမှာ ယခုအချိန်တွင် သီးသော အသီးမှာ နွေသီးဖြစ်၍ တစ်လုံးလျှင် လက်ကားဈေး (၂၀၀)ကျပ်အထိရောင်းချကြပြီး လက်လီဈေးမှာ တစ်လုံးလျှင် (၂၅၀/၃၀၀)ကျပ်အထိ ရောင်းချကြောင်း သိရပါသည်။ နွေရာသီတွင် သီးသော သံပုရာသီးမှာ အထွက်နှုန်းနည်းသော်လည်း ယခုနှစ်တွင် သီးနှုန်းအားကောင်းသဖြင့် သံပုရာပင် စိုက်ပျိုးသူများအနေဖြင့် ယခုနှစ်တွင် တွက်ခြေကိုက်သော နှစ်ဖြစ်ပါသည်။ သံပုရာပင်မှာ စိုက်ပျိုးရာတွင် အရင်းအနှီးနည်းပြီး တစ်ခါစိုက်ပျိုးလျှင် နှစ်ရှည်စားသုံးနိုင်သောအပင်ဖြစ်၍ စိုက်ပျိုးသင့်သော သီးနှံတစ်မျိုးဖြစ်ပါသည်။
DOCA(ပဲခူး)