ယခုဇန်နဝါရီလ နောက်ဆုံးပတ်တွင် ပြည်မြို့ဈေးကွက်အတွင်း ဘူးညွန့်များဈေးကောင်း ရလျက်ရှိပြီး ဘူးပင်မှ ဘူးသီးများ သီးနိုင်ရန်အတွက် ဘူးညွန့်ခေါင်ကို ဖြတ်ပေးရသဖြင့် ဘူးသီး စိုက်ပျိုးသူ တောင်သူများမှ တစ်ချက်ခုတ်နှစ်ချက်ဖြတ်အနေဖြင့်ဘူးညွန့်များ အလကားမဖြစ်တော့ပဲ ယခုအချိန် နေ့စဉ် ဘူးညွန့်များခူးပြီး ရောင်းချရသောကြောင့် မီးဖိုဆောင် အသုံးစရိတ်အဖြစ်ဝင်ငွေ ရရှိလျက်ရှိပါသည်။ ပြည်ဈေးကွက်သို့ နဝင်းရပ်ကွက်ရှိ ချောင်းနားတန်းရွာ၊ ဖိုခေါင်ရွာတို့မှလည်း ပြည်မြို့၊ တစ်ဖက်ကမ်းရှိ ညောင်ပင်သာရွာ၊ စစ်တဝင်းရွာတို့မှလည်းကောင်း၊ ရွှေတောင်မြို့၊ လယ်ဘဲ့ရွာတို့မှလည်းကောင်း၊ အဓိကဝင်ရောက်မှုရှိပြီး တစ်ပတ်လျှင် ရက်ခြား ၃ ကြိမ်ခန့် ဝင်ရောက်မှုရှိပါသည်။ ယခုကာလ ဆောင်းရာသီတွင် တစ်ကြိမ်လျင် အစည်း ၁၅၀ ခန့်ဝင်ရောက်မှု ရှိပြီး မိုးရာသီပေါများချိန်တွင် ပိုမိုဝင်ရောက်မှုရှိကြောင်းသိရပါသည်။ ဈေးကွက်အတွင်း ဘူးညွန့် ၅ ညွန့် တစ်စည်းလျင် ကျပ် ၄၀၀ - ၅၀၀ ဖြင့် ရောင်းချလျက်ရှိပြီး မိုးရာသီလှိုင်လှိုင်ပေါ်ချိန်တွင် ကျပ် ၂၀၀ - ၂၅၀ နှုန်းတို့ဖြင့် ရောင်းချမှုရှိကြောင်း သိရပါသည်။
DOCA(ပဲခူး)