ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့သည် ခရိုင်ရုံးစိုက်ရာမြို့ဖြစ်ပြီး ရန်ကုန်-မန္တလေး လမ်းမကြီးပေါ်တွင်တည်ရှိသော မြို့တစ်မြို့ဖြစ်သည့်အပြင် အရှေ့ရိုးမ၊ တောင်ပေါ်ဒေသဖြစ်သော ကရင်ပြည်နယ်မြောက်ပိုင်း၊ သံတောင်ကြီးမြို့နယ်၊ ထိုမှတစ်ဆင့် ကယားပြည်နယ်သို့ဝင်ထွက်ရာ လမ်းဆုံမြို့ဖြစ်သဖြင့် တောင်ပေါ်ဒေသထွက်ကုန်ဖြစ်သော ကော်ဖီစေ့၊ နနွင်း၊ ချဉ်ပေါင်ဖာလာနှင့် ကွမ်းသီးတို့မှာ အရောင်းအဝယ်ဖြစ်၍ စည်ကားလျက်ရှိပါသည်။
ယခုအခါ မိုးကုန်၍ ပွင့်လင်းရာသီသို့ရောက်ရှိလာပြီဖြစ်သဖြင့် ဇန်နဝါရီလအတွင်း တောင်ငူမြို့ရှိရဲပွဲရုံသို့ တစ်ရက်လျှင် ကော်ဖီစေ့ပိဿာ၅၀၀ခန့်၊ ချဉ်ပေါင်ဖာလာပိဿာ၈၀၀ခန့်၊ နနွင်းတက်ပိဿာ၁၀၀၀ခန့်ဝင်ရောက်လျက်ရှိကြောင်းသိရပါသည်။
ဈေးနှုန်းအနေဖြင့် ကော်ဖီစေ့ (အခွံချွတ်ပြီး) တစ်ပိဿာလျှင် ၁၂၀၀၀ကျပ်၊ နနွင်းတက်တစ်ပိဿာလျှင် ၅၀၀၀ကျပ်နှင့် ချဉ်ပေါင်ဖာလာတစ်ပိဿာလျှင် ၁၃၀၀၀ကျပ်ရှိကြောင်းသိရှိရပါသည်။
DOCA(ပဲခူး)