![](http://www.doca.gov.mm/sites/default/files/styles/consumer_inner_image__847x424_/public/15.7_3.jpg?itok=YXQb-o0B)
မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၊ အမှတ်(၆)ရပ်ကွက်၊ ရုံးရပ်ကွက် တောင်ပိုင်း၊ ကွင်းအမှတ်(၈၆၁)- B၊ အင်းကွင်း၌ နိုင်ငံစီးပွားမြှင့်တင်ရေးစီမံကိန်းရန်ပုံငွေဖြင့် ဆိုလာ ရေတင်စနစ်(မြေအောက်ရေ)အသုံးပြု၍ နွေစပါးများစတင်စိုက်ပျိုးလျက်ကြောင်းသိရှိရပါသည်။
မင်းလှမြို့နယ်တွင်တောင်သူများအဆင်ပြေစေရေးအတွက် ရည်ရွယ်၍ နိုင်ငံ့စီးပွားမြှင့်တင်ရေးစီမံကိန်းရန်ပုံငွေဖြင့် တောင်သူ(၃)ဦးပါအဖွဲ့တစ်ဖွဲ့လျှင် ချေးငွေများထုတ်ချေးပေးခဲ့ခြင်းကြောင့် မိုးစပါးနှင့် နွေစပါးစိုက်ပျိုးခြင်း၊ ဥယျာဉ်ခြံမြေစိုက်ပျိုးခြင်းများ လုပ်ကိုင်ကြလျက်ရှိပါသည်။ နိုင်ငံစီးပွားမြှင့်တင်ရေးစီမံကိန်းရန်ပုံငွေဖြင့် မိုးစပါးစိုက်ပျိုးရာတွင် ဆိုလာ(၁)ချပ်လျှင် ကျပ်(၄၀၀၀၀၀) ခန့်ရှိပြီး ဆိုလာ(၃)ချပ်အသုံးပြုရကြောင်း၊မြေအောက်ရေတွင်းတူးစရိတ်မှာ ကျပ်(၅၅၀၀၀၀)ခန့် ကုန်ကျကြောင်း၊ မော်တာမှာ မြင်ကောင်ရေ 1.5phကို အသုံးပြုကြောင်း၊ သို့ဖြစ်ပါ၍ တွင်းတူးစရိတ်၊ ဆိုလာစရိတ်၊ ပိုက်ဖိုးစရိတ်အပါအဝင် စုစုပေါင်းကုန်ကျစရိတ်အားလုံးမှာ ကျပ်(၃၀၀၀၀၀၀)ကျော် ကုန်ကျကြောင်း၊ ၂၀၂၃ခုနှစ်၊ ဇွန်လတွင် မိုးစပါးအဖြစ် ဧရာမင်းနှင့်ဆာပိုးသာစပါးမျိုး ကို(၃)ဧကခန့် စိုက်ပျိုးခဲ့ပြီး အထွက်နှုန်းအနေဖြင့် (၁)ဧကလျှင် တင်း(၉၀)ခန့်ထွက်ရှိကြောင်း၊ ဈေးနှုန်းအနေဖြင့် လည်း (၁)တင်းလျှင် ကျပ်(၃၀၀၀၀-၃၅၀၀၀)ရရှိခဲ့ကြောင်း၊ ယခု၂၀၂၄ခုနှစ်၊ ဖေဖော်ဝါရီလတွင် နွေစပါးအဖြစ် ဆာပိုးသာစပါးမျိုးကို(၃)ဧကခန့်စိုက်ပျိုးရန်လျာထားကြောင်း၊ (၁)ဧကလျှင် မျိုး(၇) ပြည်ခွဲခန့် ကုန်ကျကြောင်း၊ မျိုးအနေဖြင့် မိုးစပါးစိုက်ပျိုးမှုမှထွက်ရှိသည့် ဆာပိုးသာစပါးစေ့များကို မျိုးအဖြစ် ဖယ်ချန်၍ စိုက်ပျိုးခြင်းဖြစ်ကြောင်း၊ ဖေဖော်ဝါရီလ(ပထမပတ်)တွင် နွေစပါး(၂)ဧကကို တိုက်ရိုက်မျိုးစေ့ချကိရိယာ (Seeder)စနစ်ဖြင့် စိုက်ပျိုးခဲ့ပြီးဖြစ်ကြောင်း၊ ကျန်(၁)ဧကအတွက်မျိုးကို ပျိုးထောင်ထားပြီး အထက်မင်းလှမြို့ စိုက်ပျိုးရေးဦးစီးဌာနအကူအညီရယူပြီး ကောက်စိုက်စက်ဖြင့် ဖေဖော်ဝါရီလ (တတိယပတ်)တွင် စိုက်ပျိုးမည်ဖြစ်ကြောင်း၊ စိုက်ပျိုးပြီး(၄)လခွဲအကြာတွင် ရိတ်သိမ်းရကြောင်း၊ နွေစပါးစိုက်ပျိုးမှုတွင် ကုန်ကျစရိတ်အနေဖြင့် (၁)ဧကလျှင် မြေပြုပြင်ခ၊ စိုက်ခ၊ လုပ်အားခအပါအဝင် စုစုပေါင်းကုန်ကျစရိတ်မှာ ကျပ်(၂၂၀၀၀၀)ခန့်ကုန်ကျကြောင်း၊ နိုင်ငံတော်မှ နိုင်ငံ့စီးပွားရေးမြှင့်တင်ရေး စီမံကိန်းရန်ပုံငွေဖြင့် ချေးငွေထုတ်ချေးပေးခြင်းကြောင့် တောင်သူများအနေဖြင့် မိုးစပါးစိုက်ပျိုးနိုင်ပြီး ထိုက်သင့်သည့်အကျိုးအမြတ်များရရှိခဲ့ကြောင်း၊ ဒုတိယအကြိမ် အဖြစ်လည်း နွေစပါးစိုက်ပျိုးနိုင်သည့်အပြင် ဆိုလာရေတင်စနစ်ဖြစ်သောကြောင့် နေရောင်ရသမျှ အချိန်တိုင်း ရေအမြဲရ၍ စပါးအပြင် နေကြာ၊ သခွား၊ ချဉ်ပေါင်၊ ပြောင်းနှင့် အခြားသီးပင်စားပင်များကိုလည်း ဧကအနည်းငယ်စီစိုက်ပျိုးနိုင်၍ မိမိတို့တောင်သူများအနေဖြင့် အဆင်ပြေလျက်ရှိကြောင်း မင်းလှမြို့၊ အမှတ်(၆)ရပ်ကွက်နေ တောင်သူ(၃)ဦးမှ အဖွဲ့ဝင်တစ်ဦးဖြစ်သည့် တောင်သူဦးခင်အောင်ဆွေထံမှ သိရှိရပါသည်။
DOCA(မကွေး)