အိန္ဒိယသို့ မတ်ပဲနှင့် ပဲစင်းငုံတင်ပို့နိုင်ရေး ဘရာဇီးနိုင်ငံ ကြိုးပမ်း

   နှစ်နိုင်ငံအကြား ပဲမျိုးစုံကုန်သွယ်မှုမြှင့်တင်ရာတွင် အထူးသဖြင့် မတ်ပဲနှင့် ပဲစင်းငုံတို့ကို တိုးမြှင့်တင်ပို့နိုင်ရန်အတွက် ဘရာဇီးနိုင်ငံနှင့် အိန္ဒိယနိုင်ငံတို့ ပူးပေါင်းဆောင်ရွက်မည့် အစီအမံတစ်ရပ်ကို ဖော်ဆောင်လျက်ရှိသည်ဟု နယူး‌ဒေလီမြို့ရှိ ဘရာဇီးသံရုံးမှ စိုက်ပျိုးရေးသံမှူးက ပြောကြားခဲ့ကြောင်း သိရှိရပါသည်။

     အိန္ဒိယအနေဖြင့် ဘရာဇီးနိုင်ငံအား ပဲမျိုးစုံပေးသွင်းနိုင်မည့် အားထားရသော မိတ်ဖက်နိုင်ငံ တစ်ခုအဖြစ် မှတ်ယူထားကြောင်းဖြင့် မကြာသေးမီက ကျင်းပခဲ့သော အစည်းအဝေးတစ်ခုတွင် အိန္ဒိယအစိုးရ အရာရှိများက ဘရာဇီးသံရုံးမှ တာဝန်ရှိသူများသို့ ပြောဆိုခဲ့သည်။  အဆိုပါတွေ့ဆုံမှု တွင် နှစ်နိုင်ငံဘက်မှ တာဝန်ရှိသူများသည် နှစ်နိုင်ငံအကြား ပဲမျိုးစုံ ကုန်သွယ်မှု၊ အထူးသဖြင့် မတ်ပဲနှင့် ပဲစင်းငုံ တို့နှင့်စပ်လျဉ်း၍ ပဲမျိုးစုံဆိုင်ရာ စားနပ်ရိက္ခာဖူလုံရေးအတွက် နှစ်နိုင်ငံအကြား ပူးပေါင်းဆောင်ရွက်မှုကို မြှင့်တင်နိုင်မည့် မဟာဗျူဟာများ၊ ကုန်သွယ်မှု တိုးချဲ့ရေးနှင့် ပူးပေါင်း ဆောင်ရွက်ရေးတို့ကို တွန်းအားပေးမည့် ဖြစ်တန်ခြေရှိသော ယန္တရားစနစ်များ တည်ထောင်မှု ကိစ္စရပ်များအပေါ် ဆွေးနွေးခဲ့ကြကြောင်း ဘရာဇီးသံရုံးမှ စိုက်ပျိုးရေးသံမှူး Angelo de Queiroz Mauricio က ပြောကြားပါသည်။

    အိန္ဒိယ စားသုံးသူရေးရာအတွင်းဝန် Rohit Kumar Singh က အိန္ဒိယနိုင်ငံအနေဖြင့် ၂၀၂၃ ခုနှစ်အတွင်း ဘရာဇီးထံမှ မတ်ပဲ တန်ချိန် ၃၀၀၀ ကို ဝယ်ယူတင်သွင်းနိုင်ခဲ့ကြောင်း၊ ပြည်တွင်း၌ ဝယ်လိုအားမြင့်တက်နေမှုအရ ယခုနှစ်တွင်လည်း ဘရာဇီးနိုင်ငံထံမှ နောက်ထပ် မတ်ပဲတန်ချိန် ၂၀၀၀၀ ကို တင်သွင်းရယူနိုင်ဖွယ်ရှိကြောင်းဖြင့် ပြီးခဲ့သော သီတင်းပတ်၌ ပြောကြားထားသည်။

     ပဲမျိုးစုံကဏ္ဍ၌ ပူးပေါင်းဆောင်ရွက်မှုသည် နှစ်နိုင်ငံအကြား လယ်ယာထွက်ကုန်ပစ္စည်းများ ကုန်သွယ်မှုကို တိုးချဲ့ရန်အတွက် အရေးပါသည့် အခွင့်အလမ်းနယ်ပယ်တစ်ရပ်ကို ကိုယ်စားပြု လျက်ရှိကြောင်း၊ ဘရာဇီးနိုင်ငံသည် အိန္ဒိယအတွက် မဟာဗျူဟာမြောက် ကုန်စည်ပံ့ပိုးသူ အဖြစ် ရပ်တည်နိုင်မည့် အနေအထားရှိကြောင်း၊ ယေဘုယျအားဖြင့် နှစ်နိုင်ငံဘက်ရှိ လယ်ယာကဏ္ဍများ အားလုံးသည် ပူးပေါင်းဆောင်ရွက်ရန် စိတ်အားထက်သန်မှုရှိကြောင်း၊ အိန္ဒိယနှင့် ဘရာဇီး နှစ်နိုင်ငံ အစိုးရများအနေဖြင့် အပြန်အလှန် အကျိုးဖြစ်ထွန်းစေမည့် သွင်းကုန်မူဝါဒများနှင့် တည်ငြိမ်မှုရှိပြီး နှစ်နိုင်ငံကုန်သွယ်မှုကို အကောင်းဆုံးဖြစ်စေမည့် ကြိုတင်မှန်းဆနိုင်သော ကာလရှည် အနာဂတ် ဖြစ်နိုင်ခြေများကို ဖော်ဆောင်နိုင်ရေးအတွက် စည်းချက်ညီညွတ်စွာ အတူတကွလုပ်ဆောင်နိုင် မည်ဟု မျှော်လင့်ရကြောင်းဖြင့် Mr. Mauricio က ပြောဆိုခဲ့သည်။

    အိန္ဒိယ စားသုံးသူရေးရာ၊ စားနပ်ရိက္ခာနှင့် ပြည်သူ့ဖြန့်ဖြူးမှုရေးရာ ဝန်ကြီးဌာနဘက်ကမူ စုံစမ်းမေးမြန်းချက်အပေါ် တစ်စုံတစ်ရာ ပြန်ကြားမှုမရှိကြောင်း၊ အတွင်းဝန် Mr. Singh က အိန္ဒိယ နိုင်ငံ၏ အဓိက စားသုံးကုန်စည်များဖြစ်သော ပဲစင်းငုံနှင့် မတ်ပဲတို့ကို ဈေးကွက်ဖြန့်ကျက်ရယူနိုင် မည့် အရင်းအမြစ်တစ်ခုအဖြစ် စိုက်ပျိုးထုတ်လုပ်သင့်သည်ဟု ယခင်နှစ် နိုဝင်ဘာလတွင် ဘရာဇီး နိုင်ငံရှိ စီးပွားရေးလုပ်ငန်းရှင်များနှင့် အစိုးရအရာရှိများသို့ တိုက်တွန်းပြောဆိုထားကြောင်း၊ ယခင် ရက်သတ္တပတ်၌ နယူး‌‌ဒေလီမြို့တွင် ကျင်းပခဲ့သော ကမ္ဘာလုံးဆိုင်ရာ ပဲမျိုးစုံညီလာခံ ဆွေးနွေးပွဲ၌ လည်း အိန္ဒိယ၏ လူဦးရေ ၁.၄ ဘီလီယံရှိသော စားသုံးသူများအတွက် သက်သာသော ဈေးနှုန်းဖြင့် အဆိုပါ ပဲမျိုးများ ရရှိနိုင်မှု သေချာခိုင်မာအောင် လုပ်ဆောင်ရမည်ဟု ၎င်းက ပြောဆိုခဲ့ကြောင်း အိန္ဒိယ Mint သတင်းဝက်ဘ်ဆိုက်၌ ဖော်ပြပါသည်။

    အိန္ဒိယသည် သက်သတ်လွတ်စားသုံးမှု များပြားသည့် နိုင်ငံတစ်ခုဖြစ်ပြီး ဝင်ငွေအဆင့် အတန်း မြင့်မားလာသည်နှင့်အမျှ ပရိုတင်းပါဝင်မှုရှိသော ပဲမျိုးစုံကို စားသုံးမှုသည် တိုးတက်လျက် ရှိကြောင်း၊ ဝယ်လိုအားမြင့်တက်မှုကို ဖြည့်ဆည်းနိုင်ရန်အတွက် မြန်မာနိုင်ငံတစ်ခုတည်းအပေါ် အမှီပြုရန် မဖြစ်နိုင်ကြောင်း၊ ဘရာဇီးနှင့် အာဂျင်တီးနားတို့၏ စိုက်ပျိုးထုတ်လုပ်နိုင်မှုကို ထည့် သွင်း စဉ်းစားလျက် အိန္ဒိယ၏ ဘေးအန္တရာယ်စွန့်စားရမှုကို ခွဲထုတ်လုပ်ဆောင်ရမည်ဖြစ်ကြောင်း ဖြင့် Mr. Singh က ယခင်သီတင်းပတ်တွင် ပြောဆိုခဲ့ခြင်းဖြစ်သည်။

  အိန္ဒိယနိုင်ငံသည် ၂၀၂၂ ခုနှစ်၌ တင်သွင်းခဲ့သည့် တန်ချိန် ၂ သန်းကို ကျော်လွန်လျက် ၂၀၂၃ ခုနှစ်တွင် ပဲမျိုးစုံ တန်ချိန် ၃.၁ သန်းခန့်ကို ပြည်ပမှ တင်သွင်းခဲ့ရာ ပဲနီလေး၊ ပဲစင်းငုံနှင့် မတ်ပဲတို့မှာ အများဆုံးပါဝင်ခဲ့သည်။ လက်ရှိကာလ၌အဆိုပါပဲများကို မြန်မာနိုင်ငံ၊ အရှေ့အာဖရိကနိုင်ငံများ၊ ဩစတေးလျနိုင်ငံနှင့် ကနေဒါနိုင်ငံတို့ထံမှ အဓိက ဝယ်ယူတင်သွင်းလျက်ရှိသည်။

      အိန္ဒိယနိုင်ငံတွင် လူဦးရေတိုးတက်များပြားမှုနှင့်အတူ သက်သတ်လွတ်စားသုံးရန်အတွက် ပဲမျိုးစုံအပေါ် ဝယ်လိုအားသည်လည်း တိုးတက်လျက်ရှိကြောင်း၊ သို့သော် စားနပ်ရိက္ခာမူဝါဒသည် နှံစားသီးနှံများ ထုတ်လုပ်မှုကို အလေးပေးပြီး ပဲမျိုးစုံကဏ္ဍအား လျစ်လျူရှုခဲ့ခြင်းကြောင့် ပဲမျိုးစုံ စိုက်ပျိုးထုတ်လုပ်မှုမှာ သိသာစွာ ကျဆင်းခဲ့ကြောင်း၊ အိန္ဒိယအနေဖြင့် ပြည်တွင်းလိုအပ်ချက်ကို လုံလောက်စွာ ဖြည့်ဆည်းနိုင်ရန် ကြိုးပမ်းအားထုတ်နေရပြီး နှစ်စဉ် ပြည်ပမှ တင်သွင်းမှုအပေါ် အမှီပြုနေရဆဲဖြစ်ကြောင်း စသည်ဖြင့် Noida မြို့ရှိ Jaipuria စီမံခန့်ခွဲမှုတက္ကသိုလ်၊ စီးပွားရေး ဌာနမှ တွဲဖက်ပါမောက္ခ Amarnath Tripathi က ပြောကြားခဲ့သည်။

     ဘရာဇီးနိုင်ငံသည် လက်ရှိကာလတွင် ပဲမျိုးစုံ တန်ချိန် ၃ သန်းခန့်ကို စိုက်ပျိုးထုတ်လုပ် လျက်ရှိပြီး မတ်ပဲစိုက်ပျိုးထုတ်လုပ်မှုမှာ တန်ချိန် ၁၀၀၀၀ ခန့် ပါဝင်ကြောင်း၊ ကုလားပဲ၊ စားတော် ပဲနှင့် ပဲနီလေးတို့ကို တန်ချိန် ၃၀၀၀ အောက်သာ ထုတ်လုပ်မှုရှိကြောင်း၊ ဘရာဇီးနိုင်ငံအနေဖြင့် အိန္ဒိယနှင့် ပဲမျိုးစုံကုန်သွယ်မှုတွင် ပူးပေါင်းဆောင်ရွက်ရန် စိတ်ပါဝင်စားမှုရှိသော်လည်း အိန္ဒိယဘက်မှ ကုန်သွယ်မှု မူဝါဒများ တည်ငြိမ်စေရေးနှင့် ဈေးကွက်အခြေအနေ ခန့်မှန်းရလွယ်ကူမှုရှိရေး ဆောင်ရွက်ရန် လိုအပ်ချက်များအပေါ် စိုးရိမ်မကင်းဖြစ်လျက်ရှိကြောင်း သိရှိရသည်။

Source: livemint.com, 19 Feb 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)