“ ခရမ်းမြို့နယ်၌ ဆောင်းသီးနှံ ကုန်းပဲ၊ ပဲတီစိမ်းများ စတင်ထွက်ပေါ်ခြင်း ”

   ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ တောင်ပိုင်းခရိုင်မှ တာဝန်ရှိသူများ၊ ခရမ်းမြို့နယ်၌ ယခုနှစ် ဆောင်းသီးနှံစိုက်ပျိုးရာသီတွင် ဒေသခံတောင်သူလယ်သမားများက သီးနှံဝင်ငွေ တိုးပွားစေရန်၊ ဒေသတွင်းစားနပ်ရိက္ခာဖူလုံစေရန်နှင့် ပြည်ပသို့တင်ပို့နိုင်ရန် အားထားစိုက်ပျိုးသည့် ဆောင်းသီးနှံ၊ ပဲတီစိမ်းစိုက်ပျိုးရေးကို တစ်မြို့နယ်လုံး ၂၀၂၃-၂၀၂၄ခုနှစ်၊ စိုက်ဧက (၁၀၅၀၁၇)အား လျာထားစိုက်ပျိုးရာမှာ ရာနှုန်းပြည့်ဖြစ်ထွန်းအောင်မြင်စွာ စိုက်ပျိုးနိုင်ခဲ့ကြောင်း သိရပါသည်။

   ခရမ်းမြို့နယ်အတွင်းရှိ ဒေသခံတောင်သူများသည် စိုက်ပျိုးရေးအဆင်ပြေမှုနှင့် စိုက်ပျိုး မြေ ကောင်းမွန်မှုတို့ကြောင့် နွေ၊ မိုး၊ ဆောင်း တစ်နှစ်ပတ်လုံး စိုက်ပျိုးရေးလုပ်ငန်းကို စီးပွားဖြစ် စိုက်ပျိုး လုပ်ကိုင်ကြပြီး နှစ်စဉ်ဆောင်းသီးနှံစိုက်ပျိုးရာသီချိန်တွင် သီးနှံဝင်ငွေတိုးပွားစေရန်နှင့် စားနပ်ရိက္ခာ ဖူလုံစေရေးအတွက် ပဲတီစိမ်းသီးနှံကို အဓိကအားထားစိုက်ပျိုးခဲ့ရာ ယခုအခါတွင် ခရမ်းမြို့နယ်ရှိ ကျေးရွာအချို့မှ လယ်ကန်သင်းရိုးပေါ်တွင် စိုက်ပျိုးထားသော ပဲတီစိမ်း ကုန်းပဲများမှာလည်း မြို့နယ်၏ အနောက်ခြမ်းကျေးရွာများဖြစ်သော မောင်းမ၊ ကမာမတ်၊ ပိန်းကန်၊ ကြူတော၊ မင်းစံ ကျေးရွာများတွင် စတင်ထွက်ပေါ်လျက်ရှိပြီး ၎င်းပဲတီစိမ်းများအား ၅.၁.၂၀၂၄ ရက်နေ့မှ စတင်ဝယ်ယူလျက်ရှိရာ ပဲတီစိမ်းတစ်တင်းလျှင် အဖွင့်ဈေးမှာ (၉၀၀၀၀) ကျပ်ဖြစ်ကြောင်း သိရပါသည်။

   ယခုနှစ်ကုန်းပဲ၊ ပဲတီစိမ်းတစ်တင်း၏ အဖွင့်ဈေးမှာ ယခင်နှစ်ကုန်းပဲ၊ ပဲတီစိမ်း စတင်ထွက်ရှိချိန် အဖွင့်ဈေးပဲတစ်တင်းလျှင် (၅၅၀၀၀)ကျပ်နှင့် နှိုင်းယှဉ်ကြည့်ပါက ယခင်နှစ်ထက် ယခုနှစ်က ဈေးပိုလာသဖြင့် ဆောင်းသီးနှံကုန်းပဲ၊ ပဲတီစိမ်းစိုက်တောင်သူများမှာ သီးနှံဝင်ငွေ ပိုမိုတိုးပွားရရှိလာခဲ့ပြီဖြစ်ကြောင်း သိရှိရပါသည်။

DOCA(ရန်ကုန်)