မကွေးတိုင်းဒေသကြီး၊ ပခုက္ကူခရိုင်အတွင်းရှိ မြစ်ခြေ၊ ကမ္မနယ်များသည် ဆီးပင်များ အများဆုံး ပေါက်ရောက်ပြီး ဆီးသီးအစို၊ အခြောက်များထွက်ရှိသော နယ်များဖြစ်သည်။ မန်ကျည်းတစ်လှည့် ဆီးတစ်လှည့် ဆိုသည့် စကားရှိရာ ယခုနှစ်၊ ယခုအချိန်သည် ဆီးသီးလှိုင်လှိုင်ပေါသော အချိန်အခါဖြစ်၍ ပခုက္ကူမြို့ ဈေးကွက်အတွင်းသို့ နေ့စဉ်ဝင်ရောက်လျက်ရှိသည်။
ယခု ၂၀၂၄ခုနှစ်၊ ဖေဖေါ်ဝါရီလ(စတုတ္ထပတ်)တွင် ဆီးသီးအစို(၁)တင်းလျှင် လက်ကားဈေး ကျပ်(၁၀၀၀၀)၊ လက်လီဈေး ကျပ်(၁၂၀၀၀)၊ ဆီးသီးအခြောက်(၁)တင်းလျှင် ကျပ်(၁၄၀၀၀ - ၁၅၀၀၀)၊ ဆီးဆံတစ်ပိဿာ ကျပ်(၅၅၀၀၀)တို့ဖြင့် အရောင်းအဝယ်ဖြစ်လျက်ရှိပါသည်။ ဖေဖေါ်ဝါရီလ (ပထ မပတ်)တွင် ဆီးသီးအစို(၁)တင်းလျှင် ကျပ်(၁၃၅၀၀-၁၄၀၀၀)၊ ဆီးသီးခြောက်(၁)တင်းလျှင် ကျပ် (၁၄၀၀၀)၊ ဆီးဆံ(၁)ပိဿာလျှင် ကျပ်(၅၄၀၀၀)ဖြစ်ခဲ့သည်။ ယခုဖေဖော်ဝါရီလ(စတုတ္ထပတ်)တွင် ဈေးအနည်းငယ်တက် လာခြင်းမှာ ကုန်ပစ္စည်းဝင်ရောက်မှု နည်းလာခြင်းကြောင့်ဖြစ်ကြောင်း သိရပါသည်။
ဆီးသီးပေါ်ချိန်ဖြစ်၍ ဆီးခွဲစက်များလည်း လည်ပတ်လျက်ရှိပါသည်။ ဆီးခွဲစက်ပိုင်ရှင်မှ ပြောကြားချက်အရ (၁)နှစ်တွင် နိုဝင်ဘာလ မှ ဖေဖေါ်ဝါရီလအထိ ဆီးသီးများကြိတ်ခွဲပြီး ဆီးဆံများ အရောင်းရဆုံးအချိန်ဖြစ်ကြောင်း၊ ဆီးခွဲစက်(၅)လုံးရှိပြီး တစ်ပတ်လျှင်(၃)ရက်ကြိတ်ရကြောင်း၊ တစ်နေ့လျှင် ဆီးသီးခြောက်ပိဿာ (၅၀၀မှ၇၀၀)ကြားကြိတ်ရကြောင်း၊ ဆီးသီးခြောက်(၁)တင်းလျှင် ကျပ် (၁၅၀၀၀)ဖြင့် ဝယ်ရကြောင်း၊ ဆီးသီးခြောက်ပိဿာ(၁၀၀)ကြိတ်လျှင် ဆီးဆံ(၂၅)ပိဿာထွက်၍ ဆီးဆံ(၁)ပိဿာလျှင်(၅၅၀၀၀)ဈေးရှိသောကြောင့် အမြတ်အစွန်းများရရှိကြောင်း၊ ယခင်နှစ် ဇန်နဝါရီလ၊ ဖေဖော်ဝါရီလများက ဆီးသီးအစို(၁)တင်းလျှင် ကျပ်(၇၀၀၀)၊ ဆီးသီးခြောက်(၁)တင်းလျှင် ကျပ် (၁၁၀၀၀)၊ ဆီးဆံတစ်ပိဿာလျှင် ကျပ်(၂၆၀၀၀ - ၂၈၀၀၀)ဖြစ်၍ ယခင်နှစ်နှင့် နှိုင်းယှဉ်လျှင် ယခုနှစ်ပို၍ အမြတ်အစွန်းရရှိကြောင်း၊ ကြိတ်ခွဲရရှိလာသော ခွဲခြမ်းများကိုလည်း တစ်ပိဿာလျှင် ကျပ်(၅၀၀၀)ဈေး ရှိသောကြောင့် တွက်ချေကိုက်၍ ပို၍လည်ပတ်နိုင်ကြောင်း၊ အခြားဆီးခွဲစက်များလည်း အလားတူ လည်ပတ်လျက်ရှိကြောင်း သိရှိရပါသည်။
ဆီးပင်မှာ တစ်ပင်လုံးအသုံးဝင်သောကြောင့် ယခုအချိန်တွင် သဘာဝအလျောက် ပေါက်ရောက်သည့် အပင်များအပြင် လယ်မြေများတွင် တိုးချဲ့စိုက်ပျိုးလာကြသည်။ ဆီးဆံမှာ ဆေးဖက် ဝင်သောကြောင့် ပြည်ပသို့တင်ပို့နေရသောကြောင့် ကုန်ချောအဖြစ်ထုတ်လုပ်နိုင်ပါက ပြည်တွင်းကဏ္ဍဖွံ့ဖြိုးမှုအတွက် ပိုမိုအထောက်အကူပြုနိုင်ပါသည်။
DOCA(မကွေး)