မန္တလေးတိုင်းဒေသကြီး၊ ကျောက်ဆည်ခရိုင်၊ စားသုံးသူရေးရာဦးစီးဌာနမှ ဝန်ထမ်းများသည် အသေးစား၊ အလတ်စားလုပ်ငန်းများဖွံ့ဖြိုးတိုးတက်စေရေးအတွက် မြစ်သားမြို့နယ်၊ ကြောင်ပန်းကုန်းကျေးရွာအုပ်စု၊ ထနောင်းကုန်းကျေးရွာရှိ မြက်ဖျာလုပ်ငန်းအား ကွင်းဆင်းလေ့လာခဲ့ပါသည်။မြက်ဖျာရက်လုပ်ခြင်းလုပ်ငန်းတွင် အဓိကကုန်ကြမ်းမှာ ဒေသအခေါ် မြက်စလုံးမြက်ကိုအသုံးပြုကြောင်း၊ မြက်စလုံးမြက်မှာ အင်းနှင့်မြစ်ချောင်းကမ်းဘေးများတွင် အများဆုံးပေါက်ရောက်သော အပင်ဖြစ်ပါသည်။ မြက်စလုံးပင်မှာ ဝယ်စရာမလိုဘဲ အလေ့ကျပေါက်သောကြောင့် အရင်းအနှီးမလိုဘဲ ရက်လုပ်ရောင်းချရသဖြင့် အကျိုးအမြတ်ပိုမိုရရှိကြပါသည်။ မြက်ဖျာရက်လုပ်ရန်အတွက် မြက်စလုံးပင်ကိုနုတ်ပြီး အပင်မှပါလာသော ပန်းပွင့်များကိုဖယ်၍ အခွံများကိုသင်ကာ အခြောက်ခံထားရကြောင်း၊ အခြောက်ခံပြီးသောနှီးများကို ဆေးအနီ၊ အဝါ၊ အစိမ်းများထည့်၍ ရေနွေးဖြင့်(၁၅)မိနစ်ခန့်ပြုတ်ထားရကြောင်း၊ ပြုတ်ပြီးသားနှီးများကို လက်ကြိတ်စက်ဖြင့် ပြားအောင်ကြိတ်ရကြောင်း၊ ရရှိလာသောနှီးများကို ဖျာရက်လုပ်ရန်အတွက် လိုသလိုရက်လုပ်ကြကြောင်း၊ (၂)ယောက်အိပ်ဖျာတစ်ချပ်လျှင် နှီးပင်(၂၄၀)ပင်ရက်လုပ်ရကြောင်း၊ (၄)ယောက်အိပ်ဖျာတစ်ချပ်လျှင် နှီးပင်(၄၈၀)ပင်ရက်လုပ်ရကြောင်း၊ မြက်ဖျာစျေးနှုန်းအနေဖြင့် (၂)ယောက်အိပ်ဖျာတစ်ချပ်လျှင်(၁၁၀၀၀-၁၂၀၀၀)ကျပ် ၊ (၄)ယောက်အိပ်ဖျာတစ်ချပ်လျှင် (၁၅၀၀၀)ကျပ်အထိရောင်းချရကြောင်း၊ လူတစ်ဦးလျှင် တစ်နေ့ရက်လုပ်မှုအနေဖြင့် (၂)ယောက်အိပ်ဖျာနှစ်ချပ်ပြီးစီးကြောင်း၊ (၄)ယောက်အိပ်ဖျာရက်လုပ်မှုတွင် တစ်ချပ်သာပြီးစီးကြောင်း၊ ထနောင်းကုန်းကျေးရွာတွင် အိမ်ခြေ(၁၀၀)ခန့်ရှိပြီး မြက်ဖျာရက်လုပ်ခြင်းအား အိမ်ခြေ(၆၀)ခန့်ရက်လုပ်ကြကြောင်း၊ ရက်လုပ်ပြီးသားဖျာများကို ငွေကြေးတက်နိုင်သောသူများက ဖျာကိုဝယ်ယူပြီး အခြားမြို့များသို့သွားရောက်ရောင်းချကြကြောင်း၊ တချို့ ဖျာဝယ်ယူသူများမှာမူ နယ်လှည့်ရောင်းချလျက်ရှိကြောင်း၊ ဖောက်သည်စျေးအနေဖြင့် မြက်ဖျာတစ်ချပ်လျှင် (၁၀၀၀)ကျပ်ခွာ၍ရောင်းချရကြောင်း၊ မြက်ဖျာက်လုပ်သူများအနေဖြင့် အိတ်တွင် အိုးမကွာအိမ်မကွာနေပြီး အရင်းအနှီးမလိုသောကြောင့် မိသားစုအပိုဝင်ငွေမှ စီးပွားဖြစ်ရက်လုပ်ကြကြောင်း၊ မြက်ဖျာ၏အားသာချက်မှာ နွေအခါ၌ အေး၍ ဆောင်းအခါ၌ နွေးသောကြောင့် မြက်ဖျာကိုဝယ်ယူအသုံးပြုသင့်ကြောင်း၊ မြက်ဖျာတစ်ချပ်ဝယ်ယူပြီးပါက မိုးလုံလေလုံထဲတွင် ခင်းထားမည်ဆိုပါက (၇-၈)နှစ်အထိခံကြောင်း၊ မြက်ဖျာသည် စျေးနှုန်းချိုသာပြီး ရာသီဥတုနှင့်လိုက်လျောညီထွေရှိသောကြောင့် ဝယ်ယူသုံးစွဲသင့်ကြောင်း မြက်ဖျာရက်လုပ်သော ကြောင်ပန်းကုန်းကျေးရွာသူတစ်ဦး၏ ပြောပြချက်အရသိရှိရပါသည်။
DOCA(မန္တလေး)