ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ တောင်ပိုင်းခရိုင်ဦးစီးမှူးရုံးလက်အောက်ရှိ ခရမ်းမြို့နယ်၌ (၂၀၂၃-၂၀၂၄) ခုနှစ်၊ ဆောင်းသီးနှံဖြစ်သော ပဲတီစိမ်းနှင့် ပဲတီရွှေဝါသီးနှံစိုက်ခင်းများ စတင်ရိတ်သိမ်းခူးဆွတ်ချိန်ရောက်ရှိလာပြီဖြစ်သောကြောင့် ဒေသခံတောင်သူများအနေဖြင့် ပဲဆွတ်ခူးအလုပ်သမားများငှားရမ်းပြီး လှိုင်လှိုင်ရိတ်သိမ်းခူးဆွတ်လျက်ရှိရာ ယနေ့အထိ (၅၈၁၉၇)ဧကခူးဆွတ်နိုင်ခဲ့ပြီး တစ်ဧကအထွက်နှုန်းမှာ ပျမ်းမျှအားဖြင့် (၁၄)တင်းခန့်ထွက်ရှိကြောင်း လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနမှသိရှိရပါသည်။
ခရမ်းမြို့နယ်၌ (၂၀၂၃-၂၀၂၄) ခုနှစ်၊ ဆောင်းသီးနှံစိုက်ပျိုးရာသီတွင် ပဲတီစိမ်းနှင့် ပဲတီရွှေဝါမျိုးထုတ်လုပ်မှုကဏ္ဍဖွံ့ဖြိုးတိုးတက်စေရန်၊ ဒေသအတွင်းစားနပ်ရိက္ခာဖူလုံစေရန်နှင့် ပြည်ပသို့တင်ပို့နိုင်ရေးအတွက်ရည်ရွယ်၍ ဒေသခံတောင်သူများက တစ်မြို့နယ်လုံးရှိ ကျေးရွာပေါင်း (၆၄)အုပ်စုတွင် လျာထားစိုက်ဧက (၁၀၅၉၁၇)ဧကကို အောင်မြင်စွာစိုက်ပျိုးနိုင်ခဲ့ပြီး ဖေဖော်ဝါရီလ၏ ပထမအပတ်တွင် ကုန်းပဲ(ပဲတီစိမ်း)များကို ခရမ်းမြို့နယ်၊ အနောက်ခြမ်းကျေးရွာများတွင် စတင်ထွက်ပေါ်ခဲ့ပြီး ယခုဖေဖော်ဝါရီလ တတိယအပတ်တွင် တစ်မြို့နယ်လုံးနီးပါး ရိတ်သိမ်းခူးဆွတ်လျက်ရှိကြောင်းသိရပါသည်။ ထွက်ရှိလာသောပဲများအား Bright Light Co.,Ltd နှင့် တခြားပဲအဝယ်ဒိုင်များက ဒေသပေါက်ဈေးများဖြင့် ဝယ်ယူပေးလျက်ရှိကြောင်း၊ ခရမ်းပဲတီစိမ်း(ပဲတီရွှေဝါ)သည် EU နိုင်ငံများနှင့် ဂျပန်၊ တရုတ်၊ အိန္ဒိယနိုင်ငံများသို့ တင်ပို့ရောင်းချရသော နိုင်ငံတော်၏ ပြည်ပဝင်ငွေရရှိနေသည့် ဈေးကွက်ဝင်သီးနှံဖြစ်၍ တောင်သူများအားထားစိုက်ပျိုးနေသော သီးနှံဖြစ်ပြီး စိုက်ပျိုးထုတ်လုပ်မှုအနေဖြင့် ပဲတီစိမ်းတစ်ဧကလျှင် ကုန်ကျစရိတ်မှာ ယခုနှစ်တွင် (၆၅၀၀၀၀)ကျပ်ခန့်ရှိကြောင်းသိရှိရပြီး ပဲဆွတ်ခူးခမှာ တစ်အိတ်လျှင် (၂၀၀၀)ကျပ်ခန့်ရှိကြောင်း၊ ပဲတီစိမ်းတစ်တင်းလျှင် လက်ရှိပေါက်ဈေးမှာ (၈၀၀၀၀)ကျပ်ခန့်ရှိပြီး ပဲခူးဆွတ်လုပ်သားများအတွက် အလုပ်အကိုင်များရရှိပြီး ပဲစိုက်တောင်သူများအတွက်လည်း အကျိုးအမြတ်ရရှိသော ဈေးကွက်ဝင်သီးနှံဖြစ်ကြောင်းသိရှိရပါသည်။
DOCA(ရန်ကုန်)