ပြည်ခရိုင်၊ ပေါက်ခေါင်းမြို့နယ်တွင် ယခုဖေဖော်ဝါရီလမှစ၍ မန်ကျည်းသီးမှည့်အသစ်များ စတင်ထွက်ပေါ်လာပြီဖြစ်ပါသည်။ ပေါက်ခေါင်းမြို့ရှိကျေးရွာများတွင် မန်ကျည်းပင်များ အများအပြားပေါက်ရောက်လျက်ရှိပြီး တချို့မှာ အိမ်ခြံဝန်းအတွင်း စိုက်ပျိုးထားကြကာ နှစ်စဉ်နှစ်တိုင်း မန်ကျည်းသီးများကိုခူးယူရောင်းချသဖြင့် အပိုဝင်ငွေများရရှိလျက်ရှိပါသည်။ မန်ကျည်းရွက်နုများပေါ်စတွင်လည်း ၎င်းကိုခူးယူ၍ ရောင်းချကြပြီး မန်ကျည်းသီးစိမ်းများထွက်ပေါ်လျှင်လည်း ခူးဆွတ်ရောင်းချကြပါသည်။ ယခုအချိန်သည် မန်ကျည်းမှည့်ပေါ်ချိန်ဖြစ်၍ မန်ကျည်းမှည့်များကို ရောင်းချကြပါသည်။ ထိုသို့ရောင်းချသော မန်ကျည်းမှည့်ဈေးနှုန်းများမှာ ပေါ်ခါစတွင် တစ်ပိဿာလျှင် အစေ့ပါ ၃၀၀၀ကျပ်ခန့်ရှိပြီး ယခုအချိန်ဖြစ်သော ဖေဖော်ဝါရီလ နောက်ဆုံးပတ်တွင် မန်ကျည်းမှည့်ပေါက်ဈေးမှာ အစေ့ပါတစ်ပိဿာလျှင် (၂၄၀၀-၂၅၀၀) ကျပ်ဖြင့်ရောင်းချကြောင်းသိရှိရပါသည်။ ယခင်နှစ် မန်ကျည်းသီးမှည့်ပေါ်ခါစတွင် အစေ့ပါတစ်ပိဿာလျှင် ၂၀၀၀ကျပ်ခန့်ရှိခဲ့ပြီး လှိုင်လှိုင်ထွက်ပေါ်ချိန်တွင် အစေ့ပါတစ်ပိဿာလျှင် ၁၂၅၀ကျပ်ဖြင့်ရောင်းချခဲ့ပြီး မန်ကျည်းမှည့် အစေ့မပါဈေးနှုန်းမှာ တစ်ပိဿာလျှင် ၅၀၀၀ကျပ်ဖြင့် အရောင်းအဝယ်ဖြစ်ခဲ့ကြောင်းသိရှိရပါသည်။
DOCA(ပဲခူး)