မြန်မာ့ရိုးရာလက်မှုဖြစ်သော ပုသိမ်ထီးကို မြန်မာလူမျိုးတို့သည် မြန်မာ ဓလေ့ထုံးစံအရ အလှူမင်္ဂလာပွဲတိုင်းတွင် အသုံးပြုကြသည်ကိုတွေ့ရပါသည်။ ထီး၏လက်ကိုင်ကို ခရင် ဝါး၊ ထီး ခလုပ် နှင့် ခရိုင်များကို သရဂူဝါး တို့ကို အသုံးပြု ပြုလုပ် ထားပါသည်။ ထီးခေါင်းကို မအူသားနှင့်ပြုလုပ်ထားသည်။ ထီးလုပ်ရာတွင် အသုံးပြုသော ကော်အမျိုးအစားများမှာ ATM ကော် ၊ ပီလောပီနံကော်တို့ဖြစ်သည်။ ပုသိမ်ထီးအမျိုးအစား (၂)မျိုးရှိပြီး ဆီထီး (ချည်သား) ၊ ဖဲထီးဟူ၍ဖြစ်ပါသည်။ ထီးအရွယ်အစားများမှာ အကြီးဆုံး ၁၀ ပေ မှ အသေးဆုံး ၄ ပေနှင့် အကြီးဆုံး ၂၀ လက်မမှ အသေးဆုံး ၄ လက်မအထိအရွယ်အစား မျိုးစုံထုတ်လုပ်ကြသည်။ ၁၄ လက်မမှာ ပုံမှန်အများဆုံးအသုံးပြု ရောင်းချရသော အရွယ်အစားဖြစ်ပါသည်။
ဈေးကွက်ထဲတွင်လည်း နွေ ၊ မိုး ၊ ဆောင်း သုံးရာသီလုံးရောင်းချရပါသည်။ ဧရာဝတီတိုင်းဒေသကြီးအတွင်းသို့ ခရီးသွားအများဆုံးလာရောက်ကြသည့် နွေရာသီတွင် ပို၍ရောင်းအားကောင်းပါသည်။ ယခင်ကထီးတစ်ချောင်း၏ တန်ဖိုးမှာ မြန်မာငွေ ကျပ် ၄၃၀၀/- မှ ကျပ် ၅၅၀၀/-အထိရှိပြီး ၊ ယခုကုန်ကြမ်း ဝါး ဈေးနှုန်းမြင့်တက်သဖြင့် တန်ဖိုးမှာ ကျပ် ၆၅၀၀/- ၊ ၇၀၀၀/- ၊ ၇၅၀၀/- အထိ ဈေးကွက်အတွင်း ဖြန့်ဖြူးရောင်းချကြောင်း သိရှိရပါသည်။ မြန်မာ့ရိုးရာ လက်မှုပညာဖြစ်သော ပုသိမ်ထီးများကို မြန်မာပြည်အနှံ့ ပို့ဆောင် ရောင်းချပေးလျက်ရှိပြီး အမြန်ချောပို့ ဝန်ဆောင်မှုဖြင့်လည်း ရောင်းချပေးနေကြောင်း လေ့လာသိရှိရပါသည်။
DOCA(ဧရာဝတီ)