စစ်ကိုင်းတိုင်းဒေသကြီး၊ ကန့်ဘလူခရိုင်၊ စားသုံးသူရေးရာဦးစီးဌာနမှ ကန့်ဘလူမြို့၊ အမှတ်(၂)ရပ်ကွက်တွင် တစ်နိုင်တစ်ပိုင်အနေဖြင့်လည်းကောင်း၊ မိသားစုအပိုဝင်ငွေရရှိရန်အတွက် လည်းကောင်း စားဖိုဆောင်သီးနှံဖြစ်သည့် ရုံးပတီသီးကိုစိုက်ပျိုးရောင်းချနေသည့် တောင်သူမဝင်းဝင်းမော်နှင့်သွားရောက်တွေ့ဆုံမေးမြန်းခဲ့ရာ ရုံးပတီသီးကိုစိုက်ပျိုးရာတွင် ရာသီမရွေး စိုက်ပျိုးကြပြီး စိုက်ပျိုးချိန် (၁)လကျော်လျှင် အသီးများစတင်ခူးဆွတ်ရပါသည်။ ရုံးပတီသီးကို စားသုံးသူပြည်သူများအတွက် စားအကောင်းဆုံးအချိန်မှာ ပန်းပွင့်ပွင့်ပြီး (၅/၆) ရက်ခန့်ဖြစ်သည့်အတွက် (၇)ရက်မြောက်လျှင် စတင်ခူးဆွတ်ရပါသည်။
ရုံးပတီသီးကို တခူးလ၌ စိုက်ပျိုးကာ ယခုလက်ရှိ ကဆုန်/နယုန်လများတွင် အသီးများသီးကာ စတင်ခူးဆွတ်ရောင်းချရပါသည်။ ရုံးပတီသီးကို မြေကျင်းတူးပြီး နွားချေးမြေဆွေးများထည့်ကာ တစ်ကျင်းလျှင် (၂/၃)ပင်ခန့်စိုက်ပျိုးပြီး အပင်ရေ (၁၅၀)ခန့်စိုက်ပျိုးထားပါသည်။ ရုံးပတီသီးကို မြေအောက်ရေတင်စနစ်ဖြင့်စိုက်ပျိုးကာ ရုံးပတီသီးပင်စတင်စိုက်ပျိုးရန် မျိုးစေ့ဖိုး၊ မြေပြုပြင်ခ၊ ဓာတ်မြေဩဇာနှင့် ရေသွင်းခြင်း စသည့်စုစုပေါင်းကုန်ကျစရိတ်မှာ ကျပ်(၅၀၀၀၀) ကျော်/ ကျပ်(၆၀၀၀၀)ခန့်ကုန်ကျပြီး တစ်ခါခူးဆွတ်လျှင် (၁၀)ပိဿာမှ (၁၅)ပိဿာအထိ ပုံမှန်ခူးဆွတ်ရပြီး ၂ရက်ခြားတစ်ကြိမ်ခူးဆွတ်ရပါသည်။
ထို့ကြောင့် ရုံးပတီသီးပင်သည် ရာသီအလိုက် စဉ်ဆက်မပြတ်စိုက်ပျိုးနိုင်ပြီး နေ့စဉ်ခူးဆွတ်ရောင်းချရသော သီးနှံပင်ဖြစ်၍ စီးပွားရေးအရ စိုက်ပျိုးသင့်သောသီးနှံပင်ဖြစ်ကြောင်းနှင့် ရုံးပတီသီးဈေးနှုန်းဈေးကွက်အနေဖြင့် တစ်ပိဿာလျှင် (၃၅၀၀/၄၀၀၀)ကျပ်ဈေးနှုန်းတို့ဖြင့်ရောင်းချရပြီး မြို့မစည်ပင်သာယာဈေးအတွင်းရှိ ဖောက်သည်များထံ ပို့ဆောင်ရောင်းချကာ အရောင်းအဝယ်ဖြစ်ပြီး မိသားစုဝင်ငွေရရှိကာ အဆင်ပြေလျက်ရှိကြောင်းသိရှိရပါသည်။
DOCA(စစ်ကိုင်း)