![](http://www.doca.gov.mm/sites/default/files/styles/consumer_inner_image__847x424_/public/90_5.jpg?itok=gjHVbU8m)
SUZUKI မော်တော်ကားကော်ပိုရေးရှင်းသည် လျှပ်စစ်နှင့် Hybrid မော်တော်ယာဉ်များထုတ်လုပ်မှုကို အာရုံစိုက်နိုင်ရန်အတွက် ထိုင်းနိုင်ငံတွင် ကားများထုတ်လုပ်မှုကို ၂၀၂၅နှစ်ကုန်တွင် ရပ်တော့မည်ဖြစ်ကြောင်း ၇-၆-၂၀၂၄ ရက်နေ့က ပြောကြားခဲ့ပါသည်။ သို့သော် ဂျပန်ကားကုမ္ပဏီကြီးသည် ဂျပန်၊ အိန္ဒိယနှင့် အခြားအရှေ့တောင်အာရှနိုင်ငံများရှိ စက်ရုံများမှထုတ်လုပ်သည့် မော်တော်ကားများ၊ လျှပ်စစ်ကားများနှင့် Hybrid ကားများကို ထိုင်းနိုင်ငံသို့တင်သွင်းပြီး ရောင်းချခြင်းနှင့် ရောင်းချပြီးနောက် ဝန်ဆောင်မှုပေးခြင်းများ ဆက်လက်ပြုလုပ်သွားရန်စီစဉ်ထားကြောင်းသိရပါသည်။ ကမ္ဘာလုံးဆိုင်ရာ လျှပ်စစ်ကဏ္ဍကူးပြောင်းလာမှုနှင့် လေထုထဲတွင် ကာဗွန်မျှခြေရှိမှုကိုမြှင့်တင်ရန်အတွက် SUZUKI သည် တစ်ကမ္ဘာလုံးဆိုင်ရာထုတ်လုပ်မှုကို အကောင်းဆုံးဖြစ်စေရန် စီစဉ်သည့်အနေဖြင့် ထိုင်းနိုင်ငံရှိစက်ရုံကို ၂၀၂၅ခုနှစ်အကုန်တွင် ပိတ်ရန်ဆုံးဖြတ်လိုက်ခြင်းဖြစ်ကြောင်း ကုမ္ပဏီ၏ထုတ်ပြန်ချက်အရသိရပါသည်။ ထိုင်းနိုင်ငံ ရယောင်တွင် ဖွင့်လှစ်ထားသည့် (၁၂)နှစ်သက်တမ်းရှိပြီဖြစ်သည့် အဆိုပါစက်ရုံသည် နှစ်စဉ်ကားအစီးရေ ၆၀၀၀၀ထုတ်လုပ်နိုင်ပြီး လူဦးရေ အယောက် ၈၀၀ကို အလုပ်အကိုင်ဖန်တီးပေးထားပါသည်။ SUZUKI ကုမ္ပဏီသည် ထိုင်းနိုင်ငံ၌ လျှပ်စစ်နှင့် Hybrid မော်တော်ယာဉ်ထုတ်လုပ်မှု၌ တရုတ်ကားကုမ္ပဏီများ၏ ယှဉ်ပြိုင်မှုနှင့်ရင်ဆိုင်နေရကြောင်းသိရပါသည်။ SUZUKI သည် (၂၀၃၀-၂၀၃၁) ခုနှစ်ရောက်သောအခါ လျှပ်စစ်ကားမော်ဒယ် ၆မျိုးကိုပိုင်ဆိုင်ထားရန် ရည်ရွယ်ထားကြောင်းသိရပါသည်။ ၎င်းတို့သည် ပထမဆုံးလျှပ်စစ်ကားကို လာမည့်နှစ်တွင် အိန္ဒိယနိုင်ငံ၌ စတင်မိတ်ဆက်ပြသရန်စီစဉ်ထားပြီး ဂျပန်နှင့်ဥရောပဈေးကွက်သို့တင်ပို့ရန် ရည်ရွယ်ထားကြောင်းသိရပါသည်။ စီးပွားရေးနှေးကွေးမှု၊ စရိတ်စကကုန်ကျမှုမြင့်တက်လာမှု၊ ကုမ္ပဏီများပူးပေါင်းရန်စီစဉ်မှုများကြောင့် ထိုင်းနိုင်ငံတွင် စက်ရုံများပိတ်သိမ်းမှုများ တဖြည်းဖြည်းမြင့်တက်လာပြီး ယခုနှစ်အစတွင် စက်ရုံ ၁၆၀၀မှ ၁၇၀၀ကြားပိတ်သိမ်းပြီးဖြစ်ကြောင်း ထိုင်းနိုင်ငံစက်မှုအသင်းချုပ်၏အဆိုအရသိရပါသည်။ ထိုင်းနိုင်ငံစက်မှုအသင်းချုပ်ဥက္ကဋ္ဌက ပြည်တွင်းရောင်းချမှုများနှေးကွေးလာမှုနှင့် ပြည်ပသို့တင်ပို့မှုများလည်း အရှိန်လျော့လာမှုကြောင့် ထိုင်းနိုင်ငံကားလောကသည် အခက်အခဲနှင့်ရင်ဆိုင်နေရကြောင်းနှင့် မလေးရှားနိုင်ငံသည် ထိုင်းနိုင်ငံ၏နေရာကို အစားထိုးဝင်ရောက်သွားကြောင်းပြောကြားခဲ့ပါသည်။
Source: Bangkok Post
DOCA(ရန်ကုန်)