ပြည်ထောင်စုဝန်ကြီး၏ လမ်းညွှန်မှာကြားချက်အရ ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးဦးလှစိုးနှင့် ဝန်ထမ်းများသည် မြောက်ဒဂုံမြို့နယ် အထွေထွေအုပ်ချုပ်ရေးဦးစီးဌာနမှ ဦးစိုးဝင်းထွန်း၊ မြို့နယ်ပြည်သူ့ကျန်းမာရေးဦးစီးဌာနမှ ဒေါက်တာတင်မူမြင့်၊ ဆေးအသင်းမှဒေါက်တာဝင်းမာဖြိုးတို့နှင့် ပူးပေါင်း၍ ၁၂.၆.၂၀၂၄ ရက် နေ့လယ် (၁၂:၃၀) နာရီတွင် အမှတ် (၂၁၃/၂၁၄)၊ (၄၁)ရပ်ကွက်၊ မင်းရဲကျော်စွာလမ်း၊ မြောက်ဒဂုံ မြို့နယ်ရှိ Warehouse ရှိ ဆေးနှင့်ဆေးပစ္စည်းများကိုစစ်ဆေးရန် တာဝန်ခံနှင့် သွားရောက်တွေ့ဆုံ ၍ စစ်ဆေးမှုများ ပြုလုပ်ခဲ့ကြောင်းသိရှိရပါသည်။
ထိုသို့စစ်ဆေးရာတွင် Ware House အတွင်းရှိ ဆေးဝါးများသည် AA, Mega စသည့် ဆေးကုမ္ပဏီများမှ ဝယ်ယူပြီး ၅ % အမြတ်တင်၍ ဈေးကွက်အတွင်းဖြန့်ချိရောင်းချပါကြောင်း၊ အသည်းဆေး၊ ဆီးချိုဆေး၊ အားဆေး၊ ဟော်မုန်းဆေး၊ ကိုယ်ဝန်ဆောင်အားဆေး၊ သွေးတိတ်ဆေး၊ အအန်ပျောက်ဆေး၊ သွေးကျဆေး၊ နှလုံးဆေး၊ အစာအိမ်ဆေး၊ သံဓာတ်အားဆေး၊ အကိုက်အခဲ ပျောက်ဆေးများကို အများဆုံးဖြန့်ချိရကြောင်း၊ ပစ္စည်းပြတ်လပ်မှုမရှိပါကြောင်း ဖြေကြားခဲ့ရာ ဖြစ်သင့်ဖြစ်ထိုက်သည့် ဈေးနှုန်းထက်ဈေးနှုန်းမြှင့်တင်ရောင်းချမှုကို စစ်ဆေးတွေ့ရှိပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူခံရမည်ဖြစ်ကြောင်း အသိပညာပေးပြောကြားခဲ့ကြောင်း သတင်းရရှိပါသည်။
DOCA(ရန်ကုန်)