မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် စိုက်ပျိုးရေးကို အဓိကထား၍ လုပ်ကိုင်ကြပြီး ဆိပ်ဖြူမြို့ ရွာသစ်အနောက်ပိုင်းရပ်ကွက်ရှိ တောင်သူများသည် ကိုင်းကျွန်းမြေ၊ ကုလားပဲခင်းကျွတ် စိုက်ခင်းများတွင် သီးထပ်သီးနှံအဖြစ် နွေနှမ်း(ဂျပန်နှမ်းဖြူ)မျိုးကို စိုက်ဧက (၂၀)ခန့် စိုက်ပျိုးထားရှိပြီး ရေသွင်း၍စိုက်ပျိုးရကြောင်း သိရှိရသည်။ ဂျပန်နှမ်းဖြူကို မတ်လတွင် စတင်စိုက်ပျိုးပြီး ဇွန်လဆန်းပိုင်းတွင် ရိတ်သိမ်းကြောင်း၊ စိုက်ပျိုးကုန်ကျစရိတ်အနေဖြင့် တစ်ဧက လျှင် ကျပ်(၅)သိန်းခန့်ကုန်ကျပြီး တောင်သူတစ်ဦးလျှင် နှမ်းဖြူပျမ်းမျှ(၁၀)တင်းခန့် ထွက်ရှိကြောင်း သိရှိရသည်။
ယခုနှစ်သီးနှံစိုက်ပျိုးချိန်တွင် ရာသီဥတုပူပြင်းခြင်းကြောင့် သီးနှံအထွက်နှုန်းနည်းသော်လည်း ဒေသတွင်းဈေးကွက်အနေဖြင့် နှမ်းဖြူတစ်တင်းလျှင် ကျပ် (၁၃၀၀၀၀)ဈေးဖြင့် ရောင်းချရ၍ အကျိုးအမြတ်အနေဖြင့် တစ်ဧကလျှင် ကျပ်(၈)သိန်းခန့်ရရှိကြောင်း၊ ယခင်နှစ်သီးနှံပေါ်ချိန်တွင် တစ်တင်းလျှင် ကျပ်(၉၀၀၀၀)ဈေးဖြင့် အရောင်းအဝယ်ဖြစ်ခဲ့ကြောင်း၊ ယခုနှစ်တွင် ပြည်ပအဝယ် လိုက်၍ ဈေးနှုန်းမြင့်တက်ကြောင်း၊ စိုက်တောင်သူများအနေဖြင့် စိုက်ပျိုးမှုဧကများလျှင် များသလို အကျိုးအမြတ်ပိုမိုရရှိကြောင်း၊ ဒေသတွင်းထွက်ရှိသည့် နှမ်းဖြူများကို မြို့ပေါ်ရှိ ဆီစက်လုပ်ငန်းရှင်များ၊ ချောက်မြို့နှင့်စလင်းမြို့သို့ ရောင်းချလျက်ရှိကြောင်း၊ ယခုနှစ်တွင် ဈေးကွက်ဝင် ဂျပန်နှမ်းဖြူစိုက်ပျိုးခြင်းဖြင့် စိုက်တောင်သူများ အကျိုးအမြတ်ရရှိလျက်ရှိကြောင်း ဒေသခံတောင်သူများထံမှ သိရှိရသည်။
DOCA(မကွေး)