အင်ဒိုနီးရှားနိုင်ငံ၏ အရန်ဆန်သိုလှောင်မှု ခိုင်မာစေရေးအတွက် နိုင်ငံပိုင် ထောက်ပံ့ ပို့ဆောင်ရေး အဖွဲ့အစည်းဖြစ်သော Bulog ၏ မကြာသေးမီက ဆောင်ရွက်ခဲ့သည့် ကမ္ဘောဒီးယား နိုင်ငံရှိ ဆန်ကုမ္ပဏီများအား ရယူပိုင်ဆိုင်မည့် အစီအစဉ်နှင့် ပတ်သက်၍ ပြဿနာတစ်စုံတစ်ရာ မရှိဟု စိုက်ပျိုးရေးဝန်ကြီး Andi Amran Sulaiman က ပြောကြားခဲ့သည်။
လက်ရှိကာလတွင် အရေးကြီးဆုံးမှာ ပြည်တွင်းစီးပွားရေးကို လှုံ့ဆော်တွန်းအားပေးရန် အလားအလာကောင်းမွန်မှုကို အကောင်းဆုံးဖြစ်အောင် လုပ်ဆောင်ရမည်ဖြစ်ကြောင်း၊ ပြည်တွင်း စားနပ်ရိက္ခာ အရင်းအမြစ်များ ကောင်းစွာရရှိရန် စပါးစိုက်ခင်းအသစ်များ ဖန်တီးခြင်း၊ ရှိပြီးသား စပါးခင်းများကို ပိုမိုကောင်းမွန်အောင် ပြုပြင်ခြင်းနှင့် ရေပေးဝေရေးစနစ်များ မြှင့်တင်ခြင်း စသည့် ကြိုးပမ်းအားထုတ်မှုများနှင့်အတူ အဆိုပါ ဆန်ကုမ္ပဏီများ ရယူပိုင်ဆိုင်မည့် အစီအစဉ်ကို ဆောင် ရွက်သင့်ကြောင်း၊ အင်ဒိုနီးရှားသည် ယခင်က ဆန်တင်သွင်းမှုပမာဏ သုညဖြင့် ဆန်ဖူလုံမှုရရှိခဲ့ ကြောင်း၊ လက်ရှိတင်သွင်းမှု အနေအထားအရ ၎င်းကိန်းဂဏန်းသည် ၁၀ ရာခိုင်နှုန်းထက် မပိုသင့် ကြောင်း Mr. Sulaiman က အလေးအနက် ပြောကြားခဲ့သည်။
လာမည့် ဇူလိုင်လမှ အောက်တိုဘာလအထိ ရာသီဥတုခြောက်သွေ့မှုကြောင့် အရန် စားနပ် ရိက္ခာသိုလှောင်မှု ကျဆင်းနိုင်မည့်အခြေအနေကို သက်သာစေရေးအတွက် ကာလတို ဖြေရှင်းမှု နည်းလမ်းအဖြစ် ပြည်နယ်အားလုံးသို့ ရေစုပ်စက်များဖြန့်ဖြူးခြင်းကို ဆောင်ရွက်မည်ဖြစ်ကြောင်း၊ ထိုသို့ ဆောင်ရွက်ခြင်းသည် မိုးခေါင်ခြောက်သွေ့မှုနှင့် အယ်လ်နီညို၏ သက်ရောက်မှုများကို လျော့ပါးစေရန်အတွက် အသင့်လျော်ဆုံး နည်းလမ်းတစ်ခုဖြစ်ကြောင်း ၎င်းက ပြောဆိုသည်။
ရေကြောင်းပို့ဆောင်မှုနှင့် ရင်းနှီးမြှုပ်နှံမှုဆိုင်ရာ ပေါင်းစပ်ညှိနှိုင်းရေးဝန်ကြီး Mr. Luhut Binsar Pandjaitan က Bulog အဖွဲ့သည် ပြည်တွင်း အရန်ဆန်သိုလှောင်မှု ဖူလုံစေရန်အတွက် ကမ္ဘောဒီးယားထံမှ ဆန်ရင်းမြစ်များစွာကို သိမ်းသွင်းရယူမည်ဖြစ်ကြောင်း အစောပိုင်းကာလတွင် အတည်ပြုပြောကြားထားသည်။
Bulog ၏ အမှုဆောင်အရာရှိချုပ်ဖြစ်သူ Mr. Bayu Krisnamurthi က စီးပွားရေးနှင့် စားနပ်ရိက္ခာဆိုင်ရာ ရင်းနှီးမြုပ်နှံမှုတွင် အခြားမိတ်ဖက်များ အထူးသဖြင့် ကမ္ဘောဒီးယားနှင့် ပူးပေါင်း ဆောင်ရွက်နိုင်မည့် အလားအလာများကို ရှာဖွေနိုင်ရေးအတွက် အစိုးရ၏ညွှန်ကြားချက်ကို လိုက် နာရန် အသင့်ရှိကြောင်း၊ Bulog အဖွဲ့သည် ၂၀၂၃ ခုနှစ်နှင့် ၂၀၂၄ ခုနှစ်အစောပိုင်း၌ စီးပွားရေး လုပ်ငန်းအချင်းချင်း ချိတ်ဆက်မှုနှင့် အစိုးရချင်းညှိနှိုင်းမှု အစီအစဉ်များမှတစ်ဆင့် ကမ္ဘောဒီးယား နှင့် ပူးပေါင်းဆောင်ရွက်ထားပြီးဖြစ်ကြောင်း ဇွန်လ ၁၂ ရက်နေ့တွင် ပြောကြားခဲ့သည်။
Source: Antara News, 20 Jun 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)