၂၀၂၄ ခုနှစ်၊ ဇူလိုင်လ ၂ ရက်နေ့ နေ့လယ် (၁၄:၀၀) နာရီအချိန်တွင် ရှမ်းပြည်နယ်(တောင်ပိုင်း) စားသုံးသူရေးရာဦးစီးဌာန၊ တောင်ကြီးခရိုင်ဦးစီးမှူးရုံးမှ စစ်ဆေးရေးမှူးနှင့် ဝန်ထမ်းများသည် မြို့နယ်စည်ပင်သာယာရေးဌာန၊ ဗဟိုစာရင်းအင်းဦးစီးဌာန၊ အထွေထွေအုပ်ချုပ်ရေးဦးစီးဌာန၊ အထူးစုံစမ်းစစ်ဆေးရေးဦးစီးဌာန၊ ပြည်နယ်ဆန်စပါးအသင်းတို့နှင့်ပူးပေါင်း၍ တောင်ကြီးမြို့ပေါ်ရှိ ဆန်အရောင်းဆိုင်(၅) ဆိုင်နှင့် စားသုံးဆီအရောင်းဆိုင် (၅)ဆိုင်များကို ရောင်းချနေသော ဆန်များနှင့် စားသုံးဆီများ ဈေးနှုန်းမြှင့်တင် ရောင်းချခြင်း ရှိ/ မရှိ ကွင်းဆင်း စစ်ဆေးခဲ့ပါသည်။
ထိုသို့ကွင်းဆင်းစစ်ဆေးဆောင်ရွက်ရာတွင် ဈေးကွက်အတွင်း ရောင်းချနေသော ဆန်များနှင့် စားသုံးဆီများ ဈေးနှုန်းမြှင့်တင်ရောင်းချမှုမရှိစေရေး၊ ဈေးကွက်လိုအပ်ချက် အပေါ်မူတည်၍ ဆန်များအား သိုလှောင်ပြီး ဈေးကစားမှု မပြုလုပ်ရန်နှင့် ဈေးကွက်အတွင်း ဖြန့်ဖြူးရောင်းချလျက်ရှိသော စားအုန်းဆီများ သတ်မှတ်ရည်ညွှန်းဈေးနှုန်းဖြင့် ရောင်းချမှုရှိ/မရှိ၊ စားအုန်းဆီဖြန့်ဖြူး ရောင်းချရာတွင် ဈေးနှုန်းမြှင့်တင်ရောင်းချခြင်း သို့မဟုတ် ဈေးနှုန်းမြှင့်တင်ရန် ရည်ရွယ်ချက်ဖြင့် သိုလှောင်ခြင်းများမရှိစေရေး စိစစ်ဆောင်ရွက်ခဲ့ပါသည်။ ထို့ပြင် ဈေးကွက်အတွင်း ရောင်းချသော ဆန်ဆိုင်နှင့် စားသုံးဆီအရောင်းဆိုင်များ သင့်တင့်မျှတသော ဈေးနှုန်းများဖြင့် ရောင်းချလျက်ရှိကြောင်း သတင်းရရှိပါသည်။
DOCA(ရှမ်း)