ညောင်တုန်း ဆန်လက်လီအရောင်းဆိုင်များအား သတ်မှတ်ရည်ညွှန်းဈေးအတိုင်းရောင်းချမှုရှိ/ မရှိကွင်းဆင်းစစ်ဆေး

    ဧရာဝတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်၌ ၈.၇.၂၀၂၄ နေ့နံနက်ပိုင်းက သတ်မှတ်ရည်ညွှန်းစျေးဖြင့် ရောင်းချရေးအတွက် ဌာနဆိုင်ရာများ ပူးပေါင်းအဖွဲ့သည် လက်လီလက်ကား ဆန်ဆိုင် (၁၀)အား ကွင်းဆင်းစစ်ဆေးခဲ့ကြသည်။

    အဆိုပါ ကွင်းဆင်းစစ်ဆေးမှုတွင် စားသုံးသူရေးရာဦးစီးဌာန မြို့နယ်ဦးစီးမှူး ဦးအောင်လွင်က ရောင်းချသူ ဆန်လက်လီ/ လက်ကားလုပ်ငန်းရှင်များကို စားသုံးသူ ပြည်သူများအနေဖြင့် သင့်တင့်မျှတသော စျေးနှုန်းဖြင့် အခြေခံစားသုံးကုန်များ ဝယ်ယူစားသောက်နိုင်ရေးအတွက် ရည်ရွယ်၍ ကွင်းဆင်း စစ်ဆေးခြင်းဖြစ်ကြောင်း၊ မြန်မာနိုင်ငံဆန်စပါးအသင်းချုပ်မှ ထုတ်ပြန်သတ်မှတ်သော သတ်မှတ်ရည်ညွှန်းစျေးများအတိုင်း အခြေခံစားသုံးကုန် ဆန်များကို စျေးကွက်အတွင်းရှိ လက်လီလက်ကားဆန်ဆိုင်များက လိုက်နာဆောင်ရွက် ရောင်းချပေးကြရန်နှင့်  မြန်မာနိုင်ငံဆန်စပါး အသင်း၏ သတ်မှတ်ဈေး အတိုင်းရောင်းချမှု ရှိ/မရှိကို တာဝန်ရှိ သက်ဆိုင်ရာဌာနများ ပူးပေါင်းအဖွဲ့နှင့်အတူ  ဆန်စျေးနှုန်းများ စုံစမ်းစစ်ဆေးကာ ကွင်းဆင်းဆောင် ရွက်ခြင်းဖြစ်ကြောင်း သိရသည်။

   ထိုပူးပေါင်းအဖွဲ့က ဆန်ရောင်းချသူများ၏ လုပ်ငန်းလိုင်စင်များ၊ ဆန်သိုလှောင်ထားရှိမှုမရှိစေရေး၊ ဆန်အမျိုးအစားအလိုက် ရောင်းချလျက်ရှိသော စျေးနှုန်းများ၊ ဆန်အမျိုးအစားစစ်မှန်စေရေးနှင့် တစ်နေ့တာ ပျှမ်းမျှရောင်းချမှုပမာဏအခြေအနေများကို စုံစမ်းစစ်ဆေးကြည့်ရှုဆောင်ရွက်ခဲ့ကြပြီး သတ်မှတ်ထားသည့် သင့်တင့်မျှတသော ရည်ညွှန်းစျေးဖြင့် ရောင်းချ​ကြရေးနှင့် စျေးနှုန်းမြှင့်တင်၍ ရောင်းချခြင်းမပြုရန်တို့ကို သတိပေးမှာကြားခဲ့ပြီး၊ အရေးကြီးကုန်စည်ဝန်ဆောင်မှုဥပဒေဖြင့် အရေးယူဆောင်ရွက်နိုင်ကြောင်း၊ သက်ဆိုင်ရာဌာနတို့၏ ဥပဒေများအတိုင်းလည်း အရေးယူဆောင်ရွက်နိုင်ကြောင်းကို အသိပေး ပြောကြားခဲ့ကြောင်း သိရသည်။

DOCA(ဧရာဝတီ)