လူစားသုံးရန်နှင့်တိရစ္ဆာန်အစာအတွက် အင်းဆက်နှင့်အင်းဆက်ထုတ်ကုန်များ တင်သွင်းခွင့်ကို စင်္ကာပူအစိုးရကခွင့်ပြုခဲ့ကြောင်း သိရပါသည်။ စင်္ကာပူအစားအစာအေဂျင်စီက အစားအစာ အဖြစ်ခွင့်ပြုထားသည့် အင်းဆက်အမျိုးအစား(၁၆)မျိုး တင်သွင်းရာတွင် လမ်းညွှန်ချက်ပေးမည့် အင်းဆက်ထိန်းသိမ်းကန့်သတ်မှုအဖွဲ့ကို ထုတ်ပြန်ခဲ့ပါသည်။ အဆိုပါ အင်းဆက် များနှင့်အင်းဆက် ထုတ်ကုန်များကို လူစားသုံးရန်နှင့်အစားအစာထုတ်လုပ်ပေးသည့် တိရစ္ဆာန်များအတွက် တိရစ္ဆာန်အစာအဖြစ် အသုံးပြုသွားမည်ဟု သိရပါသည်။ လူနှင့်တိရစ္ဆာန် အစားအစာထဲတွင် အင်းဆက်များ ကို ထည့်သွင်းသည်စင်္ကာပူ၏ အစားအစာတင်သွင်းမှုကို မှီခိုနေမှုအားလျှော့ချရန်နှင့် အစားအစာ ဖူလုံမှုရန်ကြိုးပမ်းမှု၏ ခြေလှမ်းတစ်ရပ်ဟု သိရပါသည်။ စင်္ကာပူသည် ၂၀၃၀ ပြည့်နှစ်တွင် အစားအစာလိုအပ်မှု၏ ၃၀ ရာခိုင်နှုန်းကို ပြည်တွင်း၌ရရှိရန် ရည်မှန်းထားကြောင်း သိရပါသည်။ လတ်တလောတွင် စင်္ကာပူသည် ၎င်းတို့၏သေးငယ်သည့် အရွယ်အစားကြောင့် စိုက်ပျိုးမွေးမြူရေးကဏ္ဍအတွက် နေရာများစွာမရှိကြောင်း သိရပါသည်။ အစိုးရ၏အစားအစာအရင်းအမြစ် ကွဲပြားစွာရရှိရေးအစီအစဉ်မှာလည်း အဓိကမဟာဗျူဟာ အဖြစ် ဖော်ပြထားပါသည်။ အင်းဆက်များကို မြောက်အမေရိက၊ ဥရောပသမဂ္ဂနှင့် စင်္ကာပူ၏ အိမ်နီးချင်းနိုင်ငံအချို့တွင်လည်း စားသုံးရန်ခွင့်ပြုထားကြောင်း သိရပါသည်။ စင်္ကာပူတွင် အင်းဆက် အမျိုးအစား(၁၆)မျိုးမှ တစ်ခုချင်းစီကို သတ်မှတ်ထားသော ၎င်းတို့သက်တမ်းအရွယ်သာ တင်သွင်းခွင့်ပြုခြင်းဖြစ်ကြောင်း သိရပါသည်။ ဥပမာအားဖြင့် ပုရစ်နှင့်ကျိုင်းကောင်တို့ကို အရွယ် ရောက်အဆင့်သာ တင်သွင်းခွင့်ပြုခြင်းဖြစ်ပြီး ဝါးပိုးကဲ့သို့သောအမျိုးအစားများကို သားလောင်းအဆင့်တွင် တင်သွင်းခွင့်ပြုခြင်းဖြစ်ကြောင်း သိရပါသည်။ ကုလသမဂ္ဂ၏ အစားအစာနှင့် စိုက်ပျိုးမွေးမြူရေးအဖွဲ့အစည်းကလည်း အာဟာရဖြစ်ခြင်းနှင့် သဘာဝပတ်ဝန်းကျင်ထိန်းသိမ်းနိုင်ခြင်းတို့ကြောင့် အင်းဆက်များကို အစားအစာအဖြစ်လက်ခံရန် ထုတ်ပြန်ပြောဆိုထားကြောင်း သိရပါသည်။
Source: Bangkok Post
DOCA(ရန်ကုန်)