ဖိလစ်ပိုင်နိုင်ငံနှင့် ဘတ် ၂.၈ ဘီလီယံတန်ဖိုးရှိသည့် ဆန်သဘောတူညီမှုလက်မှတ်‌ရေးထိုးခဲ့သည့် ထိုင်းနိုင်ငံဆန်တင်ပို့သူများအသင်း

      ထိုင်းနိုင်ငံစီးပွားရေးဝန်ကြီးဌာနသည် ဆန်တင်ပို့သူများအသင်းကိုဦးဆောင်၍ ဖိလစ်ပိုင် နိုင်ငံသို့သွားရောက်ခဲ့ပြီး ဘတ် ၂.၈ ဘီလီယံ တန်ဖိုးရှိသည့် ဆန်ကုန်သွယ်မှုနားလည်မှုသဝဏ်လွှာ (MOUs)ကို လက်မှတ်ရေးထိုးခဲ့ကြောင်း သိရပါသည်။ ထိုင်းနိုင်ငံ ပြည်ပကုန်သွယ်ရေးဦးစီးဌာန၏ ညွှန်ကြားရေးမှူးချုပ် Ronnarong Phoolpipat သည် ထိုင်းနိုင်ငံဆန်တင်ပို့သူများအသင်း၊ ဥက္ကဌ Charoen Laothamatas ပါဝင်သော ဆန်ကုန်သည်များကိုယ်စားလှယ်အဖွဲ့ကို ဦးဆောင်၍ ဖိလစ်ပိုင်နိုင်ငံသို့ ဇူလိုင်လ ၃ ရက်နေ့မှ ၄ ရက်နေ့အထိ သွားရောက်ခဲ့ကြောင်း သိရပါသည်။ ထိုင်းတင်ပို့သူများနှင့် ဖိလစ်ပိုင်နိုင်ငံ ဆန်တင်သွင်းသူများအကြား ဘတ် ၂.၈ ဘီလီယံတန်ဖိုးရှိသည့် ဆန်တန်ချိန် ၁၃၀၀၀၀ ပမာဏ ရှိသည့် MOUs (၉)ခုကို လက်မှတ်ရေးထိုးခဲ့ပြီး ဖိလစ်ပိုင်နိုင်ငံ တွင် ထိုင်းဆန်ဈေးကွက်ဝေစုကို တိုးမြှင့်နိုင်ခဲ့ကြောင်း သိရပါသည်။ ဖိလစ်ပိုင်နိုင်ငံသည် ယခုနှစ်တွင် ဖေ‌ဖော်ဝါရီလက ခန့်မှန်းထားသည့် ဆန်တန်ချိန် ၃.၉ သန်းမှ တန်ချိန် ၂၀၀၀၀၀ တိုးမြှင့်ကာ ဆန်တန်ချိန် ၄.၁ သန်းအထိတင်သွင်းမည်ဟု မျှော်လင့်ရသောကြောင့် ဖိလစ်ပိုင်နိုင်ငံတွင် ထိုင်းဆန်အတွက် ဈေးကွက်တိုးချဲ့ရန်အတွက် ဌာနနှင့်စီးပွားရေးသမားများ ပူးပေါင်းရန်ညွှန်ကြားခြင်းခံခဲ့ရကြောင်း သိရှိရပါသည်။ ယခုလိုတိုးမြှင့်မှုသည် ပြည်တွင်းဆန်ထုတ်လုပ်မှုနည်းပါးခြင်းက ပြည်တွင်းမှ ဝယ်လိုအားကို ထောက်ပံ့ရန် မလုံလောက်ခြင်းကို ဦးတည်စေခဲ့ကြောင်း Mr.Ronnarong က ပြောကြားခဲ့ပါသည်။

  ထိုင်းကိုယ်စားလှယ်အဖွဲ့သည် ဖိလစ်ပိုင်နိုင်ငံ အစားအစာဖူလုံရေးအတွက် တာဝန်ရှိသည့် အမျိုးသားအစားအစာအာဏာပိုင်အဖွဲ့(NFA)နှင့် ဆန်ဈေးကွက်အပေါ် သတင်းအချက်အလက်များ ဖလှယ်ခဲ့ကြောင်း သိရပါသည်။

     Mr.Ronnarong က ဖိလစ်ပိုင်နိုင်ငံသည် ၂၀၂၈ ခုနှစ်အထိ ဆန်တင်သွင်းမှုအပေါ် အကောက်ခွန်ကို ၃၅ ရာခိုင်နှုန်းမှ ၁၅ ရာခိုင်နှုန်းထိ အစိုးရကလျှော့ချမည်ဖြစ်သောကြောင့် ယခု နှစ်နှင့် နောက်နှစ်များတွင် ဆန်တင်သွင်းမှုမြင့်တက်မည်ဟု မျှော်လင့်ရကြောင်းနှင့် အခွန်နှုန်းထားအသစ်သည် ယခုလတွင် စတင်သက်ရောက်နိုင်ရန် အလားအလာရှိသောကြောင့် ထိုင်းနိုင်ငံ ဆန် ကုန်သွယ်ရေးမြင့်တက်ရန်မျှော်လင့်ရကြောင်း ပြောကြားခဲ့ပါသည်။ NFA ၏အဆိုအရ ဆန်တင်သွင်းမှုအတွက် အကောက်ခွန်ကို လေးလလျှင်(၁)ကြိမ် ပြန်လည်ဆန်းစစ်မည်ဟု သိရပါသည်။ ဖိလစ်ပိုင်အစိုးရသည် ဆီးနိတ်လွှတ်တော်က လတ်တလောစဉ်းစားသုံးသပ်လျက်ရှိသည့် အရေးပေါ်အခြေအနေများတွင် NFA ကို ဆန်တင်သွင်းခွင့်ပြုမည့်ဥပဒေကို ပြင်ဆင်ချက် ထုတ်ပြန်ရန် လုပ်ဆောင်လျက်ရှိကြောင်း သိရပါသည်။ လက်ရှိ ဥပဒေအောက်တွင် NFA ၏လုပ်ပိုင်ခွင့်သည် ကပ်ဘေးအန္တရာယ်များအတွက် ထောက်ပံ့မည့်ကုန်လက်ကျန် သေချာ စေရေးဆောင်ရွက်မှုများတွင် ကန့်သတ်ချက်များ ရှိနေပါသည်။ ထိုင်းနိုင်ငံဘက်ကလည်း ဖိလစ်ပိုင်နိုင်ငံ၏ အစားအစာဖူလုံစေရေးအတွက် ထောက်ပံ့ရန် ဆန်တင်ပို့ရန်အဆင်သင့်ရှိကြောင်း ကတိပြုခဲ့ပါသည်။ ၂၀၂၄ ခုနှစ်၏ ပထမ(၆)လတာကာလတွင် ဖိလစ်ပိုင်နိုင်ငံသို့ ထိုင်းနိုင်ငံ၏ ဆန်တင်ပို့မှုသည် တန်ချိန် ၂၉၉၇၈၇ တန်ရှိခဲ့ပြီး တန်ဖိုးအားဖြင့် ဘတ် ၅.၉၈ ဘီလီယံ (အမေရိကန်ဒေါ်လာ ၁၆၇ သန်း) ရှိခဲ့ကြောင်း သိရပါသည်။

Source: Bangkok Post

DOCA(ရန်ကုန်)