မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်၌ မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် အခြေခံပညာဦးစီးဌာနတို့ပူးပေါင်း၍ (၇၇)နှစ်မြောက်အာဇာနည်နေ့ အထိမ်းအမှတ်ပြိုင်ပွဲများကို ဇူလိုင်လ(၁၈)ရက်နေ့၊ နံနက်(၀၉:၀၀)နာရီအချိန်က အမှတ်(၄)အခြေခံပညာမူလတန်း လွန်ရွာဟောင်းကျောင်း၌ ကျင်းပခဲ့သည်။
ရှေးဦးစွာ မူလတန်းအဆင့် ကျောင်းသား၊ ကျောင်းသူများအား ကလေးစာဖတ်ခန်းတွင် စာဖတ်စွမ်းရည်ပြိုင်ပွဲအားလည်းကောင်း၊ (Community Centre )ခန်းမတွင် ဆေးရောင်ခြယ်ပြိုင်ပွဲအားလည်းကောင်း ကျင်းပပြုလုပ်ခဲ့ပြီး မွန်းလွဲပိုင်းတွင် အမှတ်(၁)အခြေခံပညာမူလတန်းပုဂံကျောင်း၌ အာဇာနည်နေ့အထိမ်းအမှတ် အသိပညာပေးဟောပြောပွဲ ကျင်းပပြုလုပ်ခဲ့သည်။
အဆိုပါ အသိပညာပေးဟောပြောပွဲတွင် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်သိမ့်ဝါက အာဇာနည်နေ့ဖြစ်ပေါ်လာပုံနှင့် အာဇာနည်နေ့အကြောင်း သိကောင်းစရာများကိုလည်းကောင်း၊ စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်မြတ်မြတ်မိုးက ကုန်အညွှန်းအမှတ်အသားပြည့်စုံသော ပစ္စည်းများဝယ်ယူတတ်စေရေးအကြောင်းကိုလည်းကောင်း ဝန်ထမ်းများက အာဇာနည်ခေါင်းဆောင်ကြီး(၉)ဦး၏အကြောင်းများကိုလည်းကောင်း ဟောပြောခဲ့ကြကြောင်း သိရှိရပါသည်။
DOCA(မကွေး)