စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် မင်းဘူးခရိုင်ဦးစီးမှူးဦးဆောင်၍ မကွေးတိုင်းဒေသကြီး၊ စားသုံးသူရေးရာဦးစီးဌာနမှ စားသုံးသူရေးရာဌာနခွဲတာဝန်ခံ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့် ဝန်ထမ်း(၈)ဦးတို့သည် (၂၄.၇.၂၀၂၄)ရက်နေ့၊ နံနက်(၁၀:၀၀)နာရီအချိန်တွင် ပွင့်ဖြူမြို့နယ်၊ စိုက်ပျိုးရေးနှင့် မွေးမြူရေး သိပ္ပံကျောင်း၌ စားသုံးသူကာကွယ်ရေးဆိုင်ရာ အသိပညာပေးဟောပြော ဆွေးနွေးခဲ့ပါသည်။
မင်းဘူးခရိုင်ဦးစီးမှူး ဒေါ်စုစုထွန်း (လက်ထောက်ညွှန်ကြားရေးမှူး)က ဆွေးနွေးရာတွင် ဌာနသမိုင်းကြောင်းနှင့် စားသုံးသူကာကွယ်ရေးဥပဒေအားလည်းကောင်း၊ စားသုံးသူရေးရာဌာနခွဲ တာဝန်ခံ ဒေါ်စန္ဒာစိုးလွင် (ဦးစီးမှူး)က စားသုံးသူများရရှိနိုင်မည့် အခွင့်အရေးနှင့်တာဝန်များ၊ နစ်နာဆုံးရှုံးမှုများအတွက် အရေးဆိုတိုင်ကြားနိုင်သည့် နည်းလမ်းများ၊ ပြည့်ဝဆီ စားသုံးခြင်းဖြင့် ရရှိလာနိုင်မည့် ကျန်းမာရေးဆိုင်ရာ ဘေးထွက်ဆိုးကျိုးများအားလည်းကောင်း၊ ထုတ်ကုန်လုံခြုံစိတ်ချရမှုဆိုင်ရာဌာနခွဲတာဝန်ခံ ဒေါ်အေးအေးခိုင် (ဦးစီးမှူး)က ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မြန်မာဘာသာဖြင့် ပြည့်စုံစွာဖော်ပြထားသော စားသောက်ကုန်များကို ဝယ်ယူစားသုံးသင့်ကြောင်းနှင့် Online Sale မှတ်ပုံတင်ခြင်းဆိုင်ရာ အကြောင်းအရာများအားလည်းကောင်း ဟောပြောဆွေးနွေးခဲ့ပါသည်။
အဆိုပါဟောပြောဆွေးနွေးပွဲတွင် ပွင့်ဖြူမြို့နယ်၊ စိုက်ပျိုးရေးနှင့်မွေးမြူရေးသိပ္ပံကျောင်း၊ ကျောင်းအုပ်ဆရာကြီးအပါအဝင် ဆရာ၊ ဆရာမ(၇)ဦးနှင့် ကျောင်းသား၊ ကျောင်းသူ(၁၅၀)ဦး၊ စုစုပေါင်း(၁၅၇)ဦး တက်ရောက်ခဲ့ပြီး စားသုံးသူကာကွယ်ရေးဆိုင်ရာ အသိပညာပေး လက်ကမ်းစာစောင်များ ဝေငှခဲ့ကြောင်း သိရှိရပါသည်။
DOCA(မကွေး)