ဗီယက်နမ်နိုင်ငံ၏ သစ်လုပ်ငန်းနယ်ပယ်သည် ၂၀၂၄ခုနှစ်၏ပထမလများတွင် ပြန်လည်နာလံထူလာသည့်လက္ခဏာများပြသခဲ့ပြီး အကယ်၍ ထိုအပေါင်းလက္ခဏာဘောင်သည် လမ်းကြောင်းဆက်လက်ရရှိမည်ဆိုပါက ယခုနှစ်အတွက်ချမှတ်ထားသည့် တင်ပို့ရန်ရည်မှန်းချက်ပြည့်မီမည်ဟုသိရပါသည်။ ဗီယက်နမ်နိုင်ငံအကောက်ခွန်ဦးစီးဌာန၏အဆိုအရ ယခုနှစ်ပထမ ၇လတွင် ဗီယက်နမ်နိုင်ငံ၏ သစ်တင်ပို့မှုတန်ဖိုးမှာ အမေရိကန်ဒေါ်လာ(၇.၈) ဘီလီယံရှိခဲ့ပြီး လွန်ခဲ့သည့်နှစ် တူညီသည့်ကာလထက် ၂၁% မြင့်တက်ခဲ့ကြောင်းသိရပါသည်။ အထူးသဖြင့် သစ်ထုတ်ကုန်တင်ပို့မှုမှ အမေရိကန်ဒေါ်လာ ၅.၆၉ဘီလီယံရရှီခဲ့ပြီး ၂၂% မြင့်တက်ခဲ့ကြောင်းသိရပါသည်။
ကျွမ်းကျင်သူများက ယခုကဲ့သို့မြင့်တက်လာမှုသည် ဗီယက်နမ်နိုင်ငံထံမှ အကြီးမားဆုံးသစ်နှင့်သစ်ထုတ်ကုန်တင်သွင်းသည့် အမေရိကန်ကဲ့သို့သော အဓိကဈေးကွက်များထံမှ ဝယ်လိုအားမြင့်တက်လာမှုကြောင့်ဖြစ်ကြောင်းသိရပါသည်။ ဗီယက်နမ်နိုင်ငံစက်မှုနှင့်ကုန်သွယ်ရေးဝန်ကြီးဌာနက အမေရိကန်သည် ဗီယက်နမ်၏ စုစုပေါင်းသစ်နှင့်သစ်ထုတ်ကုန်တင်ပို့မှု၏ ၅၄% နီးပါးကိုတင်သွင်းကြောင်းထုတ်ပြန်ခဲ့ပါသည်။ အမေရိကန်သို့တင်ပို့မှုသည် တစ်လပြီးတစ်လ တည်ငြိမ်စွာမြင့်တက်လျက်ရှိကြောင်းသိရပါသည်။ ဗီယက်နမ်နိုင်ငံသစ်နှင့်သစ်တောထုတ်ကုန်များအသင်း၏ အတွင်းရေးမှုးချုပ်ဖြစ်သူ Ngo Sy Hoai ကအမေရိကန်နိုင်ငံစီးပွားရေးဦးစီးဌာန၏ ဗီယက်နမ်နိုင်ငံမှ သစ်ပရိဘောဂများအပေါ် တစ်ဖက်စောင်းနင်းဖြစ်သောအကောက်ခွန်ကောက်ခံမှုများနှင့် စုံစမ်းစစ်ဆေးမှုများကိုဖျက်သိမ်းရန်ဆုံးဖြတ်ချက်ပါဝင်သော လတ်တလောတိုးတက်မှုအခြေအနေများသည် အမေရိကန်သစ်ထုတ်ကုန်များ အမေရိကန်ဈေးကွက်တွင် ဝေစုပိုရစေရေးအတွက် အဆင်ပြေချောမွေ့စေမည်ဟုမျှော်လင့်ကြောင်းပြောကြားခဲ့ပါသည်။
ထို့ပြင် တရုတ်နှင့်အမေရိကန်ကဲ့သို့သော တင်ပို့နေကြဖြစ်သောဈေးကွက်များအပြင် ဗီယက်နမ်သစ်တင်ပို့သူများသည် အိန္ဒိယနှင့် အရှေ့အလယ်ပိုင်းဒေသများသို့ တင်ပို့မှုသည်လည်းကြီးထွားလာကြောင်းဖော်ပြခဲ့သည်ဟုသိရပါသည်။ ၂၀၂၄ခုနှစ်၏ ပထမနှစ်ဝက်တွင် တရုတ်နိုင်ငံသို့ သစ်တင်ပို့မှုများ မှ အမေရိကန်ဒေါ်လာ ၁.၀၅ဘီလီယံရှိခဲ့ပြီး လွန်ခဲ့သည့်နှစ်၏ တူညီသည့်ကာလထက် ၄၉.၃% မြင့်တက်လာကြောင်းသိရပါသည်။ ကနေဒါနှင့်အိန္ဒိယသို့တင်ပို့မှုမှာ အမေရိကန်ဒေါ်လာ၁၁၃၀၀၀နှင့် အမေရိကန်ဒေါ်လာ၇၃၀၀၀ရှိခဲ့ပြီး ၂၃.၃% နှင့် ၉၄.၂% အသီးသီးမြင့်တက်ခဲ့ကြောင်းသိရပါသည်။ သို့သော် သစ်လုပ်ငန်းအနေနှင့် လတ်တလောနှစ်များအတွင်း တင်ပို့မှုတန်ဖိုးမြင့်တက်နေသော်လည်း ထပ်ဆောင်းတန်ဖိုးထုတ်ကုန်များမှာ ဆက်လက်နိမ့်ကျနေကြောင်းသိရပါသည်
ကျွမ်းကျင်သူများက ဗီယက်နမ် သစ်ထုတ်ကုန်များ၏ ၅ရာခိုင်နှုန်းသာလျှင် ဒီဇိုင်းပုံစံရှိကြောင်းခန့်မှန်းခဲ့ကြသည်။ ဗီယက်နမ်နိုင်ငံလက်မှုပညာနှင့် သစ်လုပ်ငန်းအသင်း၏ ဒုတိယဥက္ကဋ္ဌဖြစ်သူ Phung Quoc Men က ဗီယက်နမ်သစ်လုပ်ငန်းများအနေဖြင့် ထုတ်ကုန်၏တန်ဖိုးနှင့် အကျိုးအမြတ်ရရှိမှုမြင့်တင်ရန်အတွက် ဒီဇိုင်းနှင့်ဆန်းသစ်တီထွင်မှုတို့တွင် ရင်းနှီးမြှုပ်နှံရန်လိုအပ်ကြောင်းအကြံပြုခဲ့ပါသည်။ တင်ပို့သည့်သစ်ထုတ်ကုန်များ၏တန်ဖိုး ဆက်လက်မြင့်တက်ရန်အတွက် သစ်ကုန်ကြမ်းများတင်ပို့မှုကိုလျှော့ချရန် နည်းပညာနှင့် ဒစ်ဂျစ်တယ်အသွင်ကူးပြောင်းမှုတို့တွင် ရင်းနှီးမြှုပ်နှံသင့်ပြီး ဈေးကွက်လိုအပ်ချက်နှင့်ကိုက်ညီသည့် မွမ်းမံထားသောထုတ်ကုန်များထုတ်လုပ်မှုကို ဦးစားပေးသင့်ကြောင်းသိရှိရပါသည်။
DOCA(ရန်ကုန်)