စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်တွင် မိသားစုဝင်ငွေရရှိရန် ရာသီပေါ် သီးနှံစိုက်ပျိုးခြင်းလုပ်ငန်းအပြင် မိသားစုတစ်နိုင်တစ်ပိုင်အနေဖြင့် နဂါးမောက်သီးကို စိုက်ပျိုးရောင်းချ လျက်ရှိပါကြောင်း သိရှိရပါသည်။ နဂါးမောက်သီးကို မိမိတို့အိမ်ခြံဝင်းများအတွင် စင်ထိုးစိုက်ပျိုးခြင်းနှင့် မြေအောက်ရေတင်စနစ်ဖြင့် စိုက်ပျိုးကြပြီး နဂါးမောက်သီးမျိုးများမှာ အဖြူမျိုးနှင့် အနီမျိုးဟူ၍ နှစ်မျိုးရှိပါကြောင်း၊ နဂါးမောက်သီးများကို ကျွန်းလှမြို့နယ်အတွင်း ကျေးရွာများနှင့် မြို့ပေါ်ရပ်ကွက် များမှ လာရောက်ရောင်းချလျက်ရှိပြီး၊ မန္တလေးမြို့သို့ တင်ပို့ရောင်းချကြသူများလည်း ရှိပါကြောင်း သိရှိရပါသည်။
နဂါးမောက်သီးမှ ရရှိသောကျန်းမာရေးအကျိုးကျေးဇူး အာနိသင်များဖြစ်သည့်ကင်ဆာရောဂါကို ကာကွယ်ပေးခြင်း၊ အသားအရည်ကို တင်းရင်းလှပစေခြင်း၊ အရွယ်တင်နုပျိုစေခြင်းနှင့် အသားအရည် ခြောက်သွေ့ခြင်းကို ကာကွယ်ပေးခြင်း၊ သွေးတွင်းသကြားဓါတ်ကို ထိန်းညှိပေးခြင်း၊ ကိုယ်အလေးချိန် လျော့ကျစေခြင်း၊ ကိုယ်လက်စထရောကိုလျော့ချပေးခြင်း၊ သွေးပေါင်ချိန်ကို ထိန်းညှိပေးခြင်း၊ အရိုး အသွားများကို ခိုင်မာစေခြင်းနှင့် ဦးနှောက်မှတ်ဉာဏ် အားကောင်းစေခြင်းစသည့် အကျိုးကျေးဇူး အာနိသင်များရရှိသည့်အတွက် နဂါးမောက်သီးကို လူအများက စားသုံးလျက်ရှိကြောင်း သိရှိရပါသည်။
၂၀၂၄ ခုနှစ်၊ ယခု ဩဂုတ်လ တတိယပတ်အတွင်း ဖြစ်ပေါ်နေသော ကျွန်းလှမြို့၏ နဂါးမောက်သီး ဈေးနှုန်းများမှာ နဂါးမောက်သီး အသေး (၁)လုံးလျှင်(၇၀၀)ကျပ်၊ နဂါးမောက်သီး အလတ် (၁)လုံး လျှင်(၁၀၀၀)ကျပ် နှင့် နဂါးမောက်သီး အကြီး (၁)လုံးလျှင်(၁၅၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။
DOCA(စစ်ကိုင်း)