မကွေးတိုင်းဒေသကြီး၊ မကွေးခရိုင်၊ မကွေးမြို့၊ ကုန်သည်များနှင့် စက်မှုလက်မှုလုပ်ငန်းရှင်များအသင်းရုံးအစည်းအဝေးခန်းမ၌ (၁၈.၈.၂၀၂၄)ရက်နေ့၊ နံနက်(၁၀:၀၀)နာရီအချိန်တွင် မကွေးမြို့ကုန်သည်များနှင့် စက်မှု လက်မှုလုပ်ငန်းရှင်များအသင်း၏ အသင်းသားစုံညီနှစ်ပတ်လည် အစည်းအဝေးအား ကျင်းပခဲ့ကြောင်း သိရသည်။
အသင်း၏ လူမှုရေး၊ စီပွားရေးဆိုင်ရာ အထွေထွေကိစ္စရပ်များ နှစ်စဉ်အောင်မြင်စွာ ဆောင်ရွက်ခဲ့မှု၊ အသင်း၏ ရန်ပုံငွေအား စနစ်တကျသုံးစွဲမှု၊ အရောင်းအဝယ်ပြုလုပ်နေသည့် ပွဲစားကုန်သည်များအတွက် ယခုနှစ်သီးနှံများအပေါ်တွင် ပွဲစားခ၊ အလုပ်သမားခများအား အများသဘောတူညီချက်ဖြင့် ဆုံးဖြတ်အတည်ပြုခဲ့ကြပြီး စားသုံးသူရေးရာဦးစီးဌာန၊ မကွေးတိုင်း ဒေသကြီး၊ တိုင်းဒေသကြီးဦးစီးမှူး ဦးခမ်လျန်စွမ်းမှ ကုန်သည်များနှင့် စက်မှုလက်မှု လုပ်ငန်းရှင် များအသင်း ရေရှည်ဖွံ့ဖြိုးတိုးတက်ရေးအတွက် အသင်းသူ၊ အသင်းသားအားလုံးမှ ကြိုးပမ်း ဆောင်ရွက်ကြရမှာဖြစ်ကြောင်း၊ အသင်း၏ နေ့စဉ် သီးနှံမျိုးစုံပေါက်စျေးနှုန်းများ၊ စျေးနှုန်းစျေးကွက် အခြေအနေများအား အများပြည်သူ သိသာမြင်သာ ထင်ရှားစွာဖြင့် ရောင်းဝယ်ဖောက်ကားမှု ပြုလုပ်နိုင်ရန် အသင်း၏ facebook Page တွင်သာမက ကုန်စည်ဒိုင် အဆောက်အဦအတွင်း/ အပြင်တွင် LED Board ဖြင့် ကြော်ငြာထား ရှိရန်လိုအပ်ပါကြောင်း၊ ကုန်စည်ဒိုင်အတွင်း မိမိတို့ရောင်းဝယ်သည့် ကုန်ပစ္စည်းနမူနာများအား ခင်းကျင်းပြသပြီး ပွင့်လင်းမြင်သာစွာ စျေးနှုန်းများဖွင့်၍ စုစုရုံးရုံး ရောင်းချပါရန်နှင့် မကွေးကုန်စည်ဒိုင်သည် တိုင်းမြို့ပေါ်တွင် ရုံးစိုက်ရာ လည်းဖြစ်၍ အသင်းသူ၊ အသင်းသားများမှ အရောင်းအဝယ်မှန်၊ အချိန်အတွယ်မှန်၊ စျေးနှုန်းမှန်စွာ ရောင်းဝယ်ဖောက်ကား၍ စည်ပင်တိုးတက်လာပါက မကွေးတိုင်း၏ ကုန်သွယ်ရေး နှင့် စီးပွားရေးများ ဖွံ့ဖြိုးတိုးတက်လာမှာဖြစ်ကြောင်း ပြောကြားခဲ့ကြောင်း သိရှိရပါသည်။
DOCA(မကွေး)