![](http://www.doca.gov.mm/sites/default/files/styles/consumer_inner_image__847x424_/public/သီဟို.jpg?itok=IaqBmQHZ)
ဧရာဝတီတိုင်းဒေသကြီးအတွင်းရှိ ဒေသထွက်ကုန်များတွင် ပြည်ပပို့ကုန်သီဟိုဠ်ဈေးကွက်မှာ ရာသီသီးနှံအဖြစ် ဖေဖော်ဝါရီလကုန်မှစတင်၍ ဈေးကွက်သို့ ဝင်ရောက်လျက်ရှိပြီး မတ်လပိုင်း ဆိုလျှင် သီဟိုဠ်လှိုင်လှိုင်ပေါ်သည့်အချိန် ဖြစ်ကြောင်း ၊ သီဟိုဠ်ရာသီမှာ မိုးမရွာခင်အချိန်အထိ ဈေးကွက်တွင် အရောင်းအဝယ်ဖြစ်၍ မေ၊ဇွန်လများတွင် မိုးဖြိုင်ဖြိုင်ရွာသွန်းပါက သီဟိုဠ်စေ့မှာ မိုးမိလျှင် ရေဝင်ကာ အသီးမှာမဲသွားသည့်အတွက် ဈေးကွက်တွင် အရောင်းအဝယ်မဖြစ်တော့ဘဲ သီဟိုဠ်ရာသီပြီးဆုံးကြောင်း ဈေးကွက်မှသိရသည်။
ဧရာဝတီတိုင်းဒေသကြီးအတွင်း သီဟိုဠ်စိုက်ဧက(၆၅၀၀၀)ခန့်ရှိပြီး မြောင်းမြခရိုင်၊ဟင်္သာတခရိုင်နှင့် လပွတ္တာခရိုင်အပါအဝင် သီဟိုဠ်အများဆုံးထွက်ရှိရာဒေသများမှာ ပုသိမ်မြို့နယ်၊ သာပေါင်းမြို့နယ်နှင့် ငပုတောမြို့နယ်အတွင်းရှိ ပင်လယ်ကမ်းခြေဒေသကျေးရွာများအပြင် ချောင်းသာ၊ငွေဆောင်ဒေသများတွင်လည်း စိုက်ပျိုးလျက်ရှိကြောင်း၊ ပုသိမ်မြို့ပေါ်တွင် သီဟိုဠ်စေ့ ကုန်ကြမ်း ဝယ်ယူသည့်ဒိုင်(၅/၆)ဒိုင်ခန့်ရှိ၍ ဝယ်ယူရရှိသော သီဟိုဠ်စေ့ကုန်ကြမ်းများကို ရန်ကုန် ဈေးကွက်သို့ အဓိကတင်ပို့၍ ရန်ကုန်ရှိသီဟိုဠ်ခွဲစက်များမှ ကုန်ချောများပြုလုပ်ကာ ပြည်ပနိုင်ငံများသို့ တင်ပို့ရောင်းချလျက်ရှိကြောင်း အဝယ်ဒိုင်များမှ သိရသည်။
ပုသိမ်မြို့ပေါ်တွင်သီဟိုဠ်ကုန်ချောများ ထုတ်လုပ်သည့်ခွဲစက်ရှိပြီး ကုန်ကြမ်းများကိုဝယ်ယူ၍ နှစ်ပတ်လည်သိုလှောင်ကာ ကုန်ချောပြုလုပ်ပြီး လစဉ်မူဆယ်မှတဆင့် တရုတ်နိုင်ငံသို့ တင်ပို့ ရောင်းချလျက်ရှိကြောင်း၊ ယခင်နှစ်က သီဟိုဠ်စေ့ပေါ်ချိန်(၁)ပိဿာလျှင် (၁၈၀၀/၂၀၀၀) ကျပ် ဈေး သာရှိပြီး ယခုနှစ်သီဟိုဠ်ပေါ်ချိန်(၁)ပိဿာလျှင် (၃၂၀၀/၃၃၀၀)ကျပ်နှင့် ဈေးကွက်မှာ အရောင်း အဝယ်ဖြစ်ပြီး တောင်သူများယခင်နှစ်ထက် ဈေးပိုရရှိ၍ တွက်ချေကိုက်လျက်ရှိကြောင်း၊ မတ်လ သီဟိုဠ်လှိုင်ချိန်မှာလည်း ဈေးကောင်းရရှိပြီး အချို့မြို့နယ်များတွင် ဈေးကွက်ပေါ်မူတည်၍လည်း ဈေးနှုန်းကွာခြားမှုရှိနိုင်ကြောင်း မြို့ပေါ်ရှိသီဟိုဠ်အဝယ်ဒိုင်များမှ သိရသည်။
DOCA(ဧရာဝတီ)