![](http://www.doca.gov.mm/sites/default/files/styles/consumer_inner_image__847x424_/public/29.4_7.jpg?itok=f-rWS6d5)
မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူး ဦးဆောင်သော ဝန်ထမ်းများအဖွဲ့သည် ပြည်တွင်း MSME ကဏ္ဍလုပ်ငန်းများ ဖွံ့ဖြိုးတိုးတက်ရေးအတွက် ရည်ရွယ်၍ (၂၁.၈.၂၀၂၄)ရက်နေ့၊ နံနက်(၀၉:၃၀)အချိန် တွင် ပခုက္ကူမြို့၊ အမှတ်(၁၁)ရပ်ကွက်ရှိ “ သန့်စင်” မြေပဲဆုံဆီ လုပ်ငန်းရှင်နှင့် တွေ့ဆုံ၍ ဈေးနှုန်းဈေးကွက်အခြေအနေများအား မေးမြန်းခဲ့ကြောင်း သိရသည်။
မြေပဲဆုံဆီလုပ်ငန်းကို လွန်ခဲ့သော (၂)နှစ်ခန့်မှ စတင်လုပ်ကိုင်ကြောင်း၊ သန့်ရှင်းမှု အကောင်းဆုံးဖြင့် မိမိကိုယ်တိုင်ဦးစီး၍လုပ်ကိုင်ကြောင်း၊ မြေပဲဆံကို ပခုက္ကူမြို့ပေါ်ရှိ မြေပဲပွဲရုံများမှ ဝယ်ယူကြောင်း၊ တစ်ပိဿာလျှင် ကျပ်(၁၁၅၀၀)ဝယ်ယူရပြီး ဆုံ(၁)ဆုံကို မြေပဲဆံ(၅)ပိဿာထည့်၍ ကြိတ်ရကြောင်း၊ တစ်ဆုံလျှင် မြေပဲဆံ အမျိုးအစား ပေါ်မူတည်၍ (၂)ပိဿာ မှ (၂.၂၅)ပိဿာခန့် ထွက်ရှိကြောင်း၊ ဈေးနှုန်းမှာ မြေပဲဆုံဆီ (၁)ပိဿာလျှင် ကျပ် (၂၂၀၀၀) ရောင်းချကြောင်း၊ ဈေးကွက်မှာ ယခင်က ရန်ကုန်၊ နေပြည်တော်၊ မိုးကုတ်မြို့သို့ တင်ပို့ရောင်းချပြီး ယခုအချိန်တွင် ပခုက္ကူမြို့ပေါ်နှင့် အနီးတစ်ဝိုက်သာ ရောင်းချရကြောင်း၊ တစ်လလျှင် ပျမ်းမျှပိဿာချိန် (၃၀)ပိဿာ ခန့်သာ ရောင်းရပြီး (၅၀)ကျပ်သား နှင့် (၁)ပိဿာ ဘူးများ အများဆုံး ရောင်းရကြောင်း၊ လျှပ်စစ်မီးလာသည့်အချိန်မှသာ ကြိတ်ခွဲရသောကြောင့် အမှာရှိသလောက် မတင်ပို့နိုင်ကြောင်း၊ ကြိတ်ခွဲခ အနေဖြင့် တစ်ဆုံလျှင် ကျပ်(၂၀၀၀)ယူကြောင်း၊ ကြိတ်ပြီးသော မြေပဲဖတ်များကို တိရိစ္ဆာန် အစာဖြင့် အိမ်သို့လာရောက်ဝယ်ယူကြပြီး တစ်ပိဿာလျှင် ကျပ်(၅၈၀၀)ဖြင့် ပြန်လည် ရောင်းချကြောင်း၊ အကျိုးအမြတ်အနေဖြင့် မိသားစုတစ်ပိုင်တစ်နိုင် လုပ်ငန်းဖြစ်သောကြောင့် စားဝတ်နေရေး အဆင်ပြေပါကြောင်း လုပ်ငန်းရှင်၏ပြောပြချက်အရ သိရှိရပါသည်။
DOCA(မကွေး)