မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၊ တောင်ဦးကျေးရွာအုပ်စု၊ တောင်ဦးကျေးရွာတွင် မိုးနေကြာကို ၂၀၂၄ခုနှစ်၊ မေလနှင့် ဇွန်လတို့၌ တောင်သူ(၂၀)ဦးက စိုက်ဧက (၃၀)ဧကခန့်စိုက်ပျိုးကာ စက်တင်ဘာလ(ပထမပတ်)တွင် စတင်ရိတ်သိမ်းနေပြီဖြစ်ကြောင်းသိရသည်။
တောင်ဦးကျေးရွာနေ ဒေါ်ပြုံးကြည်က ၎င်းအနေဖြင့် မိုးနေကြာ(၁)ဧကခွဲခန့်ကို ထွန်ကြောင်းဆွဲအစေ့ချစနစ်ဖြင့် မျိုးကို ဒေသခံတောင်သူအချင်းချင်းဆီမှ (၁)ပြည်လျှင် ကျပ် (၅၀၀၀) ဖြင့်ဝယ်ယူကာ စိုက်ပျိုးကြောင်း၊ (၁)ဧကအတွက် မျိုး(၂)ပြည်ခန့်အသုံးပြုရပြီး လုပ်အားခ၊ မျိုးခအပါအဝင် စုစုပေါင်းကုန်ကျစရိတ်မှာ ကျပ်(၂၅၀၀၀၀)ခန့်ကုန်ကျကြောင်း၊ ယခင်နှစ်တွင် (၁) ဧကလျှင် တင်း(၂၀)ထိထွက်ရှိခဲ့သော်လည်း ယခုနှစ်တွင် မိုးရွာသွန်းမှုနည်းပါးခြင်းကြောင့် (၁၀)တင်းကျော်သာထွက်ရှိကြောင်း၊ ဈေးနှုန်းအနေဖြင့် ယခင်နှစ်တွင် (၁)တင်းလျှင် ကျပ်(၅၀၀၀၀) ဈေးရရှိခဲ့ပြီး ယခုနှစ်တွင် ကျပ်(၇၀၀၀၀) ထိဈေးရရှိကြောင်း၊ အကျိုးအမြတ်အနေဖြင့် (၁)ဧကလျှင် ကျပ် (၄၅၀၀၀၀)ခန့်ရရှိကြောင်း၊ ဈေးကွက်အနေဖြင့် မင်းလှမြို့ရှိ ဆီစက်များနှင့် ပွဲရုံများသို့တင်ပို့ရောင်းချကြောင်း၊ ယခုနှစ်တွင် မိုးနေကြာမှာ အထွက်နှုန်းလျော့နည်းသော်လည်း ဈေးကောင်းရရှိသောကြောင့် စိုက်တောင်သူများ အဆင်ပြေလျက်ရှိကြောင်းသိရှိရပါသည်။
DOCA(မကွေး)