မကွေးတိုင်းဒေသကြီး၊ ဂန့်ဂေါခရိုင်၊ ကျောက်ထုမြို့နယ်ရှိ ဒေသခံတောင်သူများသည် နှစ်စဉ် စပါး၊ မြေပဲ၊ နှမ်း၊ ကြက်သွန်နီ၊ ကြက်သွန်ဖြူ၊ စားတော်ပဲ၊ ပဲပုပ် သီးနှံများကို နှစ်စဉ် ဒေသစီးပွားဖြစ် တစ်နိုင်တစ်ပိုင်စိုက်ပျိုးကြောင်း၊ မြေပဲသီးနှံကိုလည်း တစ်နှစ်လျှင် မိုး၊ ဆောင်း နှစ်ရာသီစိုက်ပျိုးကြောင်း ယခုနှစ်တွင် စိုက်ဧက(၇၀၀၀)ခန့်စိုက်ပျိုးကြောင်း၊ (၆)လမြေပဲပင်ပြန့်နှင့် (၃) မြေပဲပင်ထောင်ဟူ၍ နှစ်မျိုးစိုက်ပျိုးကြောင်း၊ ဆောင်းရာသီ ဒီဇင်ဘာလတွင် (၆)လပင်ပြန့်မြေပဲမျိုးကို စိုက်ပျိုးပြီး ဇွန်လတွင် တူးဖော်ကြောင်း၊ တစ်ဧကလျှင် မြေပဲဆန်(၂)တင်းခန့်ကုန်ကျကြောင်း၊ ယခုနှစ်တွင် ရာသီဥတုကောင်းမွန်၍ မြေပဲဆန်တစ်ပြည်စိုက်ပျိုးလျှင် အတောင့်(၂)တင်းခန့်ထွက်ရှိ၍ တစ်ဧကလျှင် မြေပဲတောင့် တင်း(၆၀)ခန့်ထွက်ရှိကြောင်း၊ ကုန်ကျစရိတ်အနေဖြင့် ကျပ်(၈)သိန်းခန့်ကုန်ကျကြောင်း၊ ဒေသတွင်းမြေပဲသီးနှံပေါ် ချိန်တွင် တစ်တင်းလျှင် ကျပ်(၄)သောင်းဈေးနှုန်းဖြင့်ရောင်းချရ၍ တစ်ဧကဝင်ငွေမှာ ကျပ်(၂၄)သိန်းခန့်ရရှိ၍ ကျပ်(၁၆)သိန်းခန့်အကျိုးအမြတ်ရရှိကြောင်း၊ ထွက်ရှိသည့်မြေပဲတောင့်များကို မြို့ပေါ်ရှိဆီစက်လုပ်ငန်းရှင်များနှင့် စားသောက်ကုန်လုပ်ငန်းရှင်များမှဝယ်ယူခြင်းနှင့် ဒေသတွင်းဝယ်လက်များမှတစ်ဆင့် ပခုက္ကူဈေးကွက်သို့လည်း တင်ပို့လျက်ရှိကြောင်းသိရှိရသည်။
ပင်ပြန့်(၆)လမြေပဲများကိုတူးဖော်ပြီး စိုက်ခင်းကျွတ်များတွင် ဒုတိယအကြိမ်မြောက် ပင်ထောင် (၃)လမြေပဲကို ထပ်မံစိုက်ပျိုးကြောင်း၊ ဇူလိုင်လတွင် စတင်စိုက်ပျိုးပြီး အောက်တိုဘာလကုန်တွင် တူးဖော်မည်ဖြစ်ကြောင်း၊ ယခုအချိန်တွင် စိုက်ပင်သက်တမ်း (၁)လခွဲခန့်ရှိပြီး အပွင့်ကြွေ၍ စွယ်ထောက်ပြီး ဥချချိန်ရောက်နေပြီဖြစ်ကြောင်း၊ စိုက်ခင်းများမှာလည်း အောင်မြင်ဖြစ်ထွန်းလျက်ရှိကြောင်း၊ သီးနှံပေါ်ချိန်တွင် မြေပဲအထွက်ကောင်းပြီး ဈေးကောင်းရရှိပါက တောင်သူများ အဆင်ပြေမည်ဖြစ်ကြောင်း၊ ပြည်တွင်းသုံးစွဲမှုသာမက ပြည်ပပို့ကုန်ပဲတစ်မျိုးဖြစ်သည့် ဈေးကွက်ခိုင်မာသည့်မြေပဲသီးနှံကို စိုက်တောင်သူများအနေဖြင့် နှစ်စဉ်မပြတ်စိုက်ပျိုးလျက်ရှိကြောင်း၊ ကျောက်ထုမြို့နယ်၊ ဂုံဘိုရပ်ကွက်ရှိ မြေပဲစိုက်တောင်သူတစ်ဦးထံမှသိရှိရပါသည်။
DOCA(မကွေး)