မကွေးတိုင်းဒေသကြီး၊ အထက်မင်းလှမြို့နယ်၊ ပန်းတော်ပြင်ကျေးရွာအုပ်စုရှိ မယ်ဇလီတောကျေးရွာတွင် ဖီးကြမ်းငှက်ပျောကို အိမ်ခြံမြေများ၊ ယာမြေများတွင် တစ်နိုင်တစ်ပိုင်စီးပွားဖြစ်စိုက်ပျိုးကြကြောင်းသိရသည်။
မယ်ဇလီတောကျေးရွာနေ တောင်သူ ဦးဝင်းသိန်းက ၎င်းအနေဖြင့် ဖီးကြမ်းငှက်ပျောမျိုးကို အပင်(၈၀၀)၊ (၀.၆)ဧကခန့်စိုက်ပျိုးထားကြောင်း၊ မျိုးကို ကျောင်းတော်ရာ၊ ပွင့်ဖြူမြို့မှဝယ်ယူကြောင်း၊ ငှက်ပျောမှာ နွေရာသီတွင် အထွက်နှုန်းကောင်းပြီး မိုးရာသီတွင် ပိုးကျတတ်၍ အထွက်နှုန်းလျော့ကျတတ်ကြောင်း၊ စိုက်ပျိုးပြီး(၁၀)လအကြာတွင် ခုတ်ယူနိုင်ကြောင်း၊ (၁)နှစ်စာကုန်ကျစရိတ်အနေဖြင့် မျိုးဖိုး၊ လုပ်အားခနှင့် အခြားသွင်းအားစုစရိတ်အပါအဝင် ကျပ်သိန်း (၅၀)ခန့်ရှိပြီး အကျိုးအမြတ်အနေဖြင့် ကျပ်သိန်း(၈၀ မှ ၁၀၀)ကျော်ရရှိကြောင်း၊ (၁)နှစ်လျှင် ပုံမှန် ငှက်ပျောခိုင်(၇၀၀ မှ ၈၀၀) ကြားထွက်ရှိကြောင်း၊ ယခု ၂၀၂၄ခုနှစ်၊ စက်တင်ဘာလ (ဒုတိယပတ်)တွင် ငှက်ပျောတစ်ခိုင်လျှင် ကျပ် (၂၀၀၀၀)၊ တစ်ဖီးလျှင် အလုံးအကြီး/ အသေးပေါ်မူ တည်၍ လက်လီဈေး ကျပ်(၃၅၀၀ - ၄၀၀၀- ၄၅၀၀) ဈေးရရှိကြောင်း၊ ဈေးကွက်အနေဖြင့် ၎င်းတို့ကျေးရွာနှင့် အနီးပတ်ဝန်းကျင်ကျေးရွာများသို့ရောင်းချကြောင်း၊ အလှူပွဲ၊ မင်္ဂလာဆောင်ပွဲများရှိသော ကာလများတွင် ငှက်ပျောသီးရောင်းအားမှာ ပို၍ကောင်းကြောင်းသိရှိရပါသည်။
DOCA(မကွေး)