ဘတ်ငွေတန်ဖိုးအားကောင်းမှုနှင့် ယခုနှစ်ကုန်တွင် အိန္ဒိယက ၎င်းတို့၏ဆန်တင်ပို့မှုကန့်သတ်ထားခြင်းကိုပယ်ဖျက်ရန် ဖြစ်နိုင်ချေရှိမှု အစရှိသောအချက်များကြောင့် လာမည့်နှစ်တွင် ထိုင်းနိုင်ငံ၏ဆန်တင်ပို့မှုသည် တန်ချိန် ၈သန်းအောက်ကျဆင်းနိုင်ကြောင်းသိရပါသည်။ ထိုင်းနိုင်ငံဆန်တင်ပို့သူများအသင်း၏ ဂုဏ်ထူးဆောင်ဥက္ကဋ္ဌဖြစ်သူ Chookiat Ophaswongse က နိုင်ငံ၏မြောက်ပိုင်းနှင့် အရှေ့မြောက်ပိုင်းတို့တွင် ရေလွှမ်းမိုးမှုရှိခဲ့သော်လည်း ယခုနှစ်အတွက် ဆန်တင်ပို့မှုကို သက်ရောက်မှုမရှိကြောင်းပြောကြားခဲ့ပါသည်။ အသင်းကလည်း ထိုင်းနိုင်ငံသည် ယခုနှစ်တွင် နှစ်စဉ်တင်ပို့ရန် ရည်မှန်းချက်ဖြစ်သည့် တန်ချိန် ၈.၂သန်းကို ကျော်လွန်လိမ့်မည်ဖြစ်ပြီး အကယ်၍ ယခုနှစ်၏လက်ကျန်လများတွင် တစ်လလျှင် ပျမ်းမျှတန်ချိန်၆၀၀၀၀၀တင်ပို့ပါက နှစ်ကုန်တင်ပို့မှုစုစုပေါင်းပမာဏမှာ တန်ချိန် ၉သန်းအထိရောက်ရှိရန် မျှော်လင့်လျက်ရှိကြောင်းသိရပါသည်။ အင်ဒိုနီးရှားနိုင်ငံ၏ ဆန်တင်သွင်းသော အေဂျင်စီဖြစ်သည့် Bulog သည် တစ်လလျှင် ပျမ်းမျှဆန်တန်ချိန်၄၅၀၀၀၀တင်သွင်းရန် တင်ဒါရရှိထားကြောင်းသိရပါသည်။ သို့သော် ဗီယက်နမ်၊ မြန်မာနှင့် ပါကစ္စတန်တို့၏ ဆန်ဈေးနှုန်းမှာ ထိုင်းဆန်ထက် ဈေးနှုန်းနည်းပါးသောကြောင့် ထိုင်းဆန်ဈေးနှုန်းမှာ Bulog ရည်မှန်းထားသည့် တင်ဒါဈေးနှုန်းနှင့်မကိုက်ညီသောကြောင့် အဆိုပါ(၃)နိုင်ငံထံမှ ပိုမိုတင်သွင်းမှုများကို ဦးတည်စေခဲ့ကြောင်းသိရပါသည်။ La Nina ရာသီဥတုဖြစ်စဉ်ကာလအတွင်း လုံလောက်သော မိုးရွာသွန်းမှုရရှိခဲ့သောကြောင့် ဗီယက်နမ်၊ အိန္ဒိယ၊ ပါကစ္စတန်နှင့် မြန်မာတို့၌ ဆန်ထုတ်လုပ်မှုတိုးတက်ခဲ့ကြောင်းသိရပါသည်။ ထို့ပြင် ယခုနှစ်၏ စတုတ္ထသုံးလပတ်ကာလတွင် အိန္ဒိယက ဆန်ဖြူပြန်လည်တင်ပို့ပြီး ဈေးကွက်ဝေစုအတွက် ယှဉ်ပြိုင်လာပါက ကမ္ဘာ့ဆန်ဈေးနှုန်းနှင့် ထိုင်းနိုင်ငံပြည်တွင်းဆန်ဈေးနှုန်းတို့ကိုကျဆင်းစေနိုင်ကြောင်း အသင်း၏အဆိုအရသိရပါသည်။ အမေရိကန်စိုက်ပျိုးမွေးမြူရေးဦးစီးဌာနကလည်း အိန္ဒိယသည် ၂၀၂၅ခုနှစ်တွင် ဆန်တန်ချိန် သန်း၂၀ဖြင့် ကမ္ဘာ့အကြီးဆုံးဆန်တင်ပို့သူအဖြစ် ရပ်တည်နေမည်ဖြစ်ပြီး ၎င်း၏နောက်တွင် ထိုင်း(တန်ချိန် ၇.၅သန်း)၊ ဗီယက်နမ်(တန်ချိန် ၇.၅သန်း)၊ ပါကစ္စတန်(တန်ချိန် ၅.၆သန်း)တို့ဖြင့် အသီးသီးရပ်တည်နေမည်ဟု ခန့်မှန်းထားကြောင်းသိရပါသည်။ အသင်းကလည်း ၂၀၂၅ခုနှစ်တွင် အိန္ဒိယနိုင်ငံအနေဖြင့် ဆန်တင်ပို့မှုပြန်လည်စတင်ပြီး ထိပ်ဆုံးနေရာဆီ ပြန်ရောက်လာခြင်း၊ ဘတ်ငွေအားကောင်းလာခြင်းတို့ကြောင့် ထိုင်းနိုင်ငံသည် ၂၀၂၅ခုနှစ်တွင် ဆန်တင်ပို့မှုပမာဏတန်ချိန် ၇သန်းနှင့် ၇.၅သန်းကြားထိကျဆင်းနိုင်ကြောင်း သတိပေးထားပါသည်။ ထိုင်းနိုင်ငံစီးပွားကူးသန်းဝန်ကြီးဌာန၏ ဒုတိယဝန်ကြီးဖြစ်သူ Suchart Chomklin က ယခုအပတ်တွင် ကျင်းပပြုလုပ်ခဲ့သော Thai Rice Networking Forum 2024 ဖွင့်ပွဲအခမ်းအနား၌ ပြည်တွင်းဆန်စပါးဈေးကွက်ကိုမြှင့်တင်ရန်နှင့် ဆန်နှင့်ဆန်ထုတ်ကုန်များဖွံ့ဖြိုးတိုးတက်ရေးအတွက် ထိုင်းနိုင်ငံ၏မူဝါဒများကိုလေးစားကာ ကုန်သွယ်ရေးမိတ်ဖက်များအကြား ယုံကြည်မှုတိုးမြှင့်ရန် ပြောကြားခဲ့ပါသည်။ ထိုင်းနိုင်ငံ၏ ယခုနှစ်ဆန်တင်ပို့မှုမှာ အပေါင်းလက္ခဏာဆောင်သည့် လမ်းကြောင်းပေါ်ရှိနေကြောင်းသိရပါသည်။ ယခုနှစ်၏ ပထမ(၇)လတွင် ဆန်တန်ချိန် ၅.၆၈သန်းတင်ပို့ခဲ့ပြီး လွန်ခဲ့သည့်နှစ်တူညီသည့်ကာလထက် ၂၂ရာခိုင်နှုန်းမြင့်တက်ခဲ့ကြောင်းသိရပါသည်။ ထိုတင်ပို့မှုမှတစ်ဆင့် ဝင်ငွေဘတ် ၁၃၂ဘီလီယံရရှိခဲ့ပြီး လွန်ခဲ့သည့်နှစ်၏ တူညီသည့်ကာလထက် ၅၁ရာခိုင်နှုန်းမြင့်တက်ခဲ့ကြောင်းသိရပါသည်။
Source: Bangkok Post
DOCA(ရန်ကုန်)