အရှေ့တောင်အာရှနိုင်ငံများအသင်း(အာဆီယံ)နှင့် တရုတ်တို့သည် မဟာဗျူဟာမြောက် မိတ်ဖက်နိုင်ငံများဖြစ်ကြပြီး ကုန်သွယ်ရေးနှင့် ရင်းနှီးမြှုပ်နှံမှုတို့တွင် အားကောင်းစွာပေါင်းစပ် ထားခြင်းနှင့်အတူ ကာလကြာရှည် စီးပွားရေးဆက်နွယ်မှုကို ထိမ်းသိမ်းထားနိုင်ကြောင်း လာအိုနိုင်ငံစက်မှုနှင့် စီးပွားရေးကူးသန်းရောင်းဝယ်ရေးဝန်ကြီး Malaithong Kommasith က လာအိုနိုင်ငံ Vietiane မြို့တွင် စက်တင်ဘာလ ၂၂ ရက်နေ့၌ ကျင်းပခဲ့သော 23rd ASEAN Economic Ministers-China Ministry of Commerce Consultation (AEM-MOFCOM) တွင် ပြောကြားခဲ့ပါသည်။ ၂၀၂၃ခုနှစ်တွင် နှစ်ဖက် အပြန်အလှန်ကုန်သွယ်မှုတန်ဖိုးမှာ အမေရိကန်ဒေါ်လာ ၇၀၂ဘီလီယံရှိခဲ့ပြီး အာဆီယံစုစုပေါင်းကုန်သွယ်မှုတန်ဖိုး၏ ၁၉.၇% ရှိကာ တရုတ်နိုင်ငံအား ဒေသ၏ နံပါတ်တစ်ကုန်သွယ်ရေးမိတ်ဖက်ဖြစ်စေခဲ့ကြောင်းသိရပါသည်။ အာဆီယံနိုင်ငံများတွင် တရုတ်၏ တိုက်ရိုက်ရင်းနှီးမြှုပ်နှံမှုပမာဏမှာ ခန့်မှန်းခြေအားဖြင့် အမေရိကန်ဒေါ်လာ ၁၇.၃ဘီလီယံရှိပြီး အာဆီယံ၏ စုစုပေါင်းနိုင်ငံခြားတိုက်ရိုက်ရင်းနှီးမြှုပ်နှံမှု (FDI) ၏ ၇.၅% ရှိကာ ဒေသ၏ တတိယအကြီးများဆုံးရင်းနှီးမြှုပ်နှံသူအဖြစ် ရပ်တည်နေကြောင်းသိရပါသည်။ ထို့ပြင် လွန်ခဲ့သည့်နှစ်တွင် အာဆီယံနှင့် တရုတ်သည် များစွာသော ပူးပေါင်းဆောင်ရွက်ရန်ကိစ္စများကိုဆွေးနွေးခဲ့ကြပြီး အာဆီယံ-တရုတ်လွတ်လပ်သော ကုန်သွယ်ရေးသဘောတူညီချက် (ACFTA) ၏ ပြဋ္ဌာန်းချက်များနှင့်တာဝန်များကို အပြည့်အဝနှင့် ထိရောက်စွာအကောင်အထည်ဖော်ရန် ၎င်းတို့၏အာမခံချက်ကို ထပ်မံအတည်ပြုခဲ့ကြောင်းသိရပါသည်။ ဆွေးနွေးမှုများပြီးမြောက်ရေးနှင့် ACFTA 3.0 အဆင့်မြှင့်တင်မှုအကောင်အထည်ဖော်ခြင်းသည် နှစ်ဖက်အကြား ရင်းနှီးမြှုပ်နှံမှုနှင့် ကုန်သွယ်ရေးဆက်လက်မြှင့်တင်ရန် မျှော်လင့်ကြောင်းသိရပါသည်။ ထိုစက်တင်ဘာလ ၂၂ရက်နေ့အစည်းအဝေးသည် စီးပွားရေး၊ ကုန်သွယ်ရေးနှင့် E-commerce တို့တွင် နှစ်ဖက်စလုံး၏ ပူးပေါင်းမှုနှင့် ACFTA 3.0 အဆင့်မြှင့်တင်ရန်အတွက် ဆွေးနွေးမှုများတိုးတက်မှုအခြေအနေကို ပြန်လည်ဆန်းစစ်ရန်နှင့် ၂၀၂၄ခုနှစ်၊ အောက်တိုဘာလတွင်ကျင်းပမည့် ASEAN-China ထိပ်သီးအစည်းအဝေးအတွက် ပြင်ဆင်ရန် အဓိကရည်ရွယ်ခဲ့ကြောင်းသိရပါသည်။
Source : Vietnam Plus
DOCA(ရန်ကုန်)