ခရမ်းပင်ဟာ ပူနွေးသောရာသီဥတုရှည်ကို ကြိုက်သော အပင်ဖြစ်သည်။ အပူချိန် (၁၃) ဒီဂရီမှ (၂၅) ဒီဂရီတွင် အသင့်တော်ဆုံးဖြစ်သည်။ ခရမ်းပင်မျိုးစေ့အားပျိုးထောင်ရန် ကောင်းစွာဆွေးမြေ့သောနွားချေး၊ သစ်ရွက်စိမ်းမြေသြဇာများ အသုံးပြု၍(၃) ပေအကျယ် (၁၀) ပေအရှည် ဘောင်များပြုလုပ်ပျိုးထောင်ရပါသည်။ တစ်ဧကအတွက် မျိုးစေ့ (၃၀၀) ဂရမ်နှုန်းဖြင့် စိုက်ပျိုးရပြီး ၊ ပျိုးပင်များ ကြပ်မနေစေရန်မျိုးစေ့အား ခပ်ကြဲကြဲဖြူးပေးရပါသည်။
ပျိုးထောင်ချိန်တွင် စိုက်ခင်းကို မြေပြုပြင်ထားရကြောင်း၊ ထယ် (၃) စပ်ထိုး၍ ထွန်ရေးညက်သည့်အထိ ထွန်ပေးရကြောင်း၊ မျိုးကိုလိုက်၍ ပင်ကြားတန်းကြားအကွာအဝေး ကွာခြားတတ်သော်လည်း အများအားဖြင့် တန်းကြား (၃-၄) ပေ၊ ပင်ကြား (၂-၃) ပေထား၍ ရွှေ့ပြောင်းစိုက်ပျိုးကြပါသည်၊
အချိန်မှန်စွာ ပေါင်းရှင်းပေးခြင်း၊ မိုးစိုက်ခရမ်းဖြစ်ပါက ရေမဝပ်စေရန် မြေတောင်မြှောက်ပေးခြင်း၊ ဘောင်လုံးခြင်း ဆောင်းစိုက်ခရမ်းတွင် အစိုဓါတ်ထိန်းနိုင်ရန် ကောက်ရိုး၊ မြက်ခြောက်များ အုပ်ပေးခြင်း၊ မြေတောင်မြှောက်ချိန်တွင် ယူရီးယားကို ကျွေးခြင်းများပြုလုပ်ရကြောင်း၊ ခရမ်းတွင် ခရမ်းခေါင်ညွှန့်ထိုးပိုး၊ သီးလုံးဖောက်ပိုးများ ကျရောက်ဖျက်ဆီးနိုင်၍ ပင်လုံးပြန့်ပိုးသတ်ဆေးဖြစ်သည့် နိုက်ဝမ်း၊ အီမာလန်ဒါစသော ဆေးများအား (၁၀) ရက်တစ်ကြိမ်ဖြန်းပေးရကြောင်း သိရှိရပါသည်။
ရောဂါအနေဖြင့် ဘက်တီးရီးယား ပင်ညိုးရောဂါကျရောက်တတ်ကြောင်း၊ ပန်းပွင့်ချိန်မှစ၍ ရက်ပေါင်း (၃၀) ကြာလျှင် ခူးဆွတ်ရကြောင်း သိရှိရပါသည်။
အသီးအရောင်တောက်နေသော အချိန်သည် စားသုံးရန်အနေတော်ဖြစ်၍ အရောင်မှိုင်းသွားပါက အသီးရင့်လွန်းပြီးစားသုံးရန်မကောင်းတော့ကြောင်း၊ ခရမ်း တစ်ဧကထွက်နှုန်းမှာ ပိဿာ (၆၀၀၀)မှ (၇၀၀၀) အထိ ထွက်ကြောင်း၊ ခရမ်းပေါက် စျေးနှုန်းအနေဖြင့် ၁ ပိဿာလျှင် (၄၀၀) ကျပ် ရရှိသော် တစ်ဧက (၆၀၀၀) ပိဿာထွက်ရှိပါက ငွေကျပ် (၂၄) သိန်း ရရှိ၍ တောင်သူများ တွက်ချေကိုက်လျှက်ရှိကြောင်း သိရှိရပါသည်။
DOCA(မန္တလေး)