ကမ္ဘောဒီးယားအသင်းအဖွဲ့များသည် တရုတ်နိုင်ငံ Guangxi ပြည်နယ်သို့ စိုက်ပျိုးမွေးမြူရေးထုတ်ကုန်များတင်ပို့ရာတွင် တတိယနိုင်ငံဖြတ်သန်းစရာမလိုဘဲ လွယ်ကူချောမွေ့စွာတင်ပို့နိုင်စေရန်အတွက် တရုတ်နိုင်ငံအကောက်ခွန်စီမံအုပ်ချုပ်မှုအဖွဲ့နှင့် နားလည်မှုသဘောတူစာချွန်လွှာ (MOU) ၃ခုကို လက်မှတ်ရေးထိုးခဲ့ကြောင်းသိရပါသည်။ MOU များကို တရုတ်နိုင်ငံ Nanning မြို့တွင် ၂၆-၉-၂၀၂၄ ရက်နေ့၌ ကျင်းပပြုလုပ်ခဲ့သော 21st CAEXPO RCEP Agriculture and Food Products Trade and Industry Coorperation ဖိုရမ်တွင် လက်မှတ်ရေးထိုးခဲ့ခြင်းဖြစ်ကြောင်းသိရပါသည်။ ကမ္ဘောဒီးယားနိုင်ငံ သီဟိုဠိစေ့အသင်း၏ ဥက္ကဋ္ဌဖြစ်သူ Uon Silot က ၎င်း၏အသင်း၊ ကမ္ဘောဒီးယားဇီဝဇိုးငှက်အသင်းနှင့် ကမ္ဘောဒီးယား-တရုတ် ပီလောပီနံမိတ်ဖက်အသင်းတို့သည် ကမ္ဘောဒီးယားစိုက်ပျိုးမွေးမြူရေးထုတ်ကုန်များ Guangxi ပြည်နယ်သို့တင်ပို့ရာတွင် အတားအဆီးတချို့ကိုလျှော့ချပေးမည့် MOU များကို လက်မှတ်ရေးထိုးခဲ့ကြောင်းပြောကြားခဲ့ပါသည်။ Silot က အတိတ်ကာလတွင် တရုတ်နိုင်ငံက ကမ္ဘောဒီးယားမှ လတ်ဆတ်သောစိုက်ပျိုးမွေးမြူရေးထုတ်ကုန်များတင်သွင်းရာတွင် တရုတ်နိုင်ငံအကောက်ခွန်စီမံအုပ်ချုပ်မှုအဖွဲ့၏ ခွင့်ပြုချက်အာဏာအောက်တွင် စစ်ဆေးခြင်းလုပ်ငန်းစဉ်များမှာ အလွန်ရှုပ်ထွေးသည့်အတွက် တချို့ထုတ်ကုန်များကို တတိယနိုင်ငံမှတစ်ဆင့် တင်သွင်းရကြောင်းပြောကြားခဲ့ပါသည်။ MOU များ လက်မှတ်ရေးထိုးခြင်းသည် ကမ္ဘောဒီးယားစိုက်ပျိုးမွေးမြူရေးထုတ်ကုန်များ တရုတ်နိုင်ငံသို့တင်သွင်းရာတွင် အတားအဆီးများကိုလျှော့ချနိုင်မည်ဟုသိရပါသည်။ MOU များတွင် အပေါင်းလက္ခဏာဆောင်သောအချက်ရှိပြီး ပထမအချက်သည် ကမ္ဘောဒီးယားစိုက်ပျိုးမွေးမြူရေးထုတ်ကုန်များ Guangxi ပြည်နယ်ရှိ အထူးစီးပွားရေးဇုန်များသို့ တိုက်ရိုက်ရောက်ရှိကာ ထိုမှတစ်ဆင့် တရုတ်နိုင်ငံရှိများစွာသော ဈေးကွက်များသို့ အကောက်ခွန်အခြေအနေအနည်းငယ်ဖြင့် ရောက်ရှိသွားမည်ဖြစ်ကြောင်း သိရပါသည်။ ဒုတိယအချက်အနေဖြင့် ကမ္ဘောဒီးယားတွင် လက်ရှိတည်ရှိနေသော အထူးစီးပွားရေးဇုန်များ၌ စိုက်ပျိုးမွေးမြူရေးပြုပြင်ထုတ်လုပ်သည့် စက်ရုံများတည်ဆောက်ရာတွင် ရင်းနှီးမြှုပ်နှံရန်အတွက် လမ်းကြောင်းသစ်များဖွင့်လှစ်နိုင်မည်ဖြစ်ကြောင်းသိရပါသည်။
Source: Khmer Times
DOCA(ရန်ကုန်)