ကမ္ဘောဒီးယားနိုင်ငံသည် ၂၀၂၄ခုနှစ်၊ ပထမ ၈လတာကာလတွင် နိုင်ငံတကာခရီးသွား ၄.၂၉ သန်းအား ဆွဲဆောင်နိုင်ခဲ့ပြီး လွန်ခဲ့သည့်နှစ်၏ တူညီသည့်ကာလထက် ၂၂.၅% မြင့်တက်ခဲ့ကြောင်း ခရီးသွားဝန်ကြီးဌာန၏ ၂၇-၉-၂၀၂၄ ရက်နေ့တွင်ထုတ်ပြန်ခဲ့သော အစီရင်ခံစာအရသိရှိခဲ့ပါသည်။ ထိုင်းနိုင်ငံသည် ခရီးသွားလာရောက်မှုတွင် ၁၃.၄ သန်းဖြင့် ထိပ်ဆုံးတွင်ရပ်တည်နေပြီး ဗီယက်နမ်နှင့် တရုတ်တို့မှာ ဒုတိယနှင့် တတိယနေရာအသီးသီးတွင် ရပ်တည်နေကြောင်းသိရပါသည်။ အစီရင်ခံစာအရ ခရီးသွား ၃၅.၈% သည် လေကြောင်းမှ လာရောက်ခဲ့ပြီး ၆၄.၂% မှာ ကုန်းလမ်းကြောင်းနှင့် ရေကြောင်းမှတစ်ဆင့် ဝင်ရောက်ခဲ့ကြောင်းသိရပါသည်။ ကမ္ဘောဒီးယားဝန်ကြီးချုပ် Hun Manet က ခရီးသွားကဏ္ဍကို နိုင်ငံ၏ “green gold” ဟုဖော်ညွှန်းခဲ့ပြီး နိုင်ငံ၏လူမှုစီးပွားဖွံ့ဖြိုးတိုးတက်ရေးအတွက် အဓိကပါဝင်သည့်အရာကို ကမ္ဘာ့ခရီးသွားနေ့တွင် ပြောကြားခဲ့ပါသည်။ ဝန်ကြီးချုပ်က ကမ္ဘောဒီးယားသည် ၂၀၂၄ခုနှစ်ကုန်တွင် နိုင်ငံတကာခရီးသွား ၆သန်းနီးပါးအား လာရောက်လည်ပတ်ရန် ဆွဲဆောင်နိုင်ပြီး ၂၀၂၆ခုနှစ်တွင် ခန့်မှန်း ၇သန်းထိဆွဲဆောင်နိုင်မည်ဟု အကောင်းမြင်သုံးသပ်ခဲ့ကြောင်းသိရပါသည်။ ဝန်ကြီးချုပ်က ၂၀၂၃ခုနှစ်၊ နိုဝင်ဘာလတွင် စတင်လည်ပတ်ခဲ့သည့် တရုတ်ရင်းနှီးမြှုပ်နှံထားသည့် 4E အဆင့် Siem Reap Angkar နိုင်ငံတကာလေဆိပ်၏ အရေးပါမှုနှင့် ၂၀၂၅ခုနှစ် ပထမနှစ်ဝက်တွင် ဖွင့်လှစ်မည့် 4E အဆင့် Techo နိုင်ငံတကာလေဆိပ်သည် ခရီးသွားကဏ္ဍကြီးထွားမှုကို ရေရှည်ထိန်းသိမ်းနိုင်မည်ဟု အသားပေးပြောကြားခဲ့ပါသည်။ ခရီးသွားကဏ္ဍသည် ကမ္ဘောဒီးယားနိုင်ငံ၏ စီးပွားရေးကိုပံ့ပိုးထားသည့် ဒေါက်တိုင် ၄ခုအနက် ၁ခုဖြစ်ကြောင်းသိရပါသည်။ ၂၀၂၃ခုနှစ်တွင် ထိုကဏ္ဍမှတစ်ဆင့် ဝင်ငွေအမေရိကန်ဒေါ်လာ ၃.၀၈ ဘီလီယံဖန်တီးနိုင်ခဲ့ပြီး တိုက်ရိုက်အလုပ်အကိုင်နေရာ ၄၅၀၀၀၀ ကိုဖန်တီးနိုင်ခဲ့ကြောင်း ခရီးသွားဝန်ကြီးဌာန၏ အဆိုအရသိရပါသည်။
Source : Khmer Times
DOCA(ရန်ကုန်)