ဧရာဝတီတိုင်းဒေသကြီး၊ ဟင်္သာတမြို့တွင် ၊ (၂.၄.၂၀၂၂) နေ့တွင် ၊ စက်မှုကြီးကြပ်ရေးနှင့် စစ်ဆေးရေးဦးစီးဌာန၊ ဟင်္သာတခရိုင်မှူးရုံးတွင် ခရိုင်အတွင်းရှိ ဆီစက်လုပ်ငန်းရှင်များအား နေကြာဆီ ကြိတ်ခွဲထုတ်လုပ်နိုင်ရေး ဆွေးနွေးဟောပြောပွဲကို ဆောင်ရွက်ခဲ့ပါသည်။ ဆွေးနွေးပွဲတွင် စက်မှု၊ ကြီးကြပ်ရေးနှင့် စစ်ဆေးရေးဦးစီးဌာန၊ ဟင်္သာတခရိုင်ဦးစီးမှူးမှ ဒေသတွင်း စားသုံးဆီဖူလုံရေးအတွက် ယခု မိုးရာသီတွင် ဆင်းရွှေကြာ-၂နေကြာ ဧက ၃၀၀၀ ကို စိုက်ပျိုးမျိုးထုတ်လုပ်ပြီး၊ ၂၀၂၂-၂၀၂၃ ဆောင်းရာသီတွင် ဟင်္သာတခရိုင်၌ နေကြာဧက ၂၀၀၀၀၀ကျော် စိုက်ပျိုးမှာဖြစ်တဲ့အတွက် ထွက်ရှိလာသော နေကြာစေ့များကို စားသုံးဆီကြိတ်ခွဲနိုင်ရေးအတွက် ဆီစက်လုပ်ငန်းရှင်များအနေဖြင့် ဆောင်ရွက်နိုင်မှုအခြေအနေများကို ဆွေးနွေးခဲ့ပါသည်။
ဆက်လက်၍ စားသုံးသူရေးရာဦးစီးဌာန ဟင်္သာတခရိုင်ဦးစီးမှူးမှ ဆွေးနွေးရာတွင် ဧရာဝတီတိုင်းဒေသကြီး၏ နှစ်စဉ်စားသုံးဆီလိုအပ်ချက် ၈၅၀၀၀ မက်/တန် ခန့်ရှိပြီး၊ ဒေသတွင်းထုတ်လုပ်မှုနှင့် မလုံလောက်ပဲ စားအုံးဆီတန်ချိန် ၄၃၀၀၀ မက်/တန်ခန့် လိုအပ်လျက်ရှိပါသည်။ ဟင်္သာတခရိုင်အနေဖြင့် ဖွဲနုမှ စားဆီထုတ်လုပ်ခြင်း၊ နေကြာများစိုက်ပျိုးပြီး နေကြာဆီထုတ်လုပ်ပါက ဒေသတွင်းစားဆီဖူလုံမှုကို တိုးတက်စေမှာဖြစ်သည့်အတွက်၊ လာမည့် နှစ်ဆောင်းရာသီတွင် ဟင်္သာတခရိုင်မှာ နေကြာဧက နှစ်သိန်းကျော်စိုက်ပျိုးမှာဖြစ်ပြီး ဆီစက်လုပ်ငန်းရှင်များအနေဖြင့် နေကြာဆီကြိတ်ခွဲနိုင်ရေး အတွက်လိုအပ်ချက်များ၊ ဖြည့်ဆည်းဆောင်ရွက်ပေးရမည့်အချက်များကို လုပ်ငန်းရှင်များနှင့် မေးမြန်းဆွေးနွေးခဲ့ပါသည်။
လုပ်ငန်းရှင်များမှလည်း ယခုမြေပဲဆီကြိတ်စက်များကို နေကြာဆီကြိတ်ခွဲထုတ်လုပ်ရန်အတွက် အခွံချွတ်ယူနစ်၊ လွန်အိမ်စနစ်၊ ဈေးကွက်ယှဉ်ပြိုင်နိုင်ရန်အတွက် အနံ့ချွတ်စနစ်တို့ကို ထောက်ပံ့ပေးခြင်း၊ ထွက်ရှိလာတဲ့ ကုန်ချောပေါ်မှာဈေးကွက်ခိုင်မာမှုရှိခြင်းတို့ရှိမှသာ မိမိတို့အနေနှင့် ရေရှည်ရပ်တည်ထုတ်လုပ်နိုင်မှာဖြစ်ကြောင်းတို့ကို ဆွေးနွေးခဲ့ကြပါသည်။ အဆိုပါ ဆွေးနွေးပွဲသို့ ဆီစက်လုပ်ငန်းရှင် (၁၀) ဦးတက်ရောက်ခဲ့ကြောင်း သိရှိရပါသည်။
DOCA(ဧရာဝတီ)