ယခုနှစ်၏ ပထမ(၉)လတာကာလတွင် ကမ္ဘောဒီးယား-ဗီယက်နမ် ကုန်သွယ်မှုမှာ အမေရိကန်ဒေါ်လာ ၅.၈၁ ဘီလီယံရှိခဲ့ပြီး ၂၀၂၃ခုနှစ်၏ တူညီသည့်ကာလထက် ၂၁.၉ ရာခိုင်နှုန်းမြင့်တက်လာကြောင်း ကမ္ဘောဒီးယားနိုင်ငံ အကောက်ခွန်နှင့်အခွန်ဦးစီးဌာန၏ ထုတ်ပြန်ချက်အရသိရပါသည်။ ထိုကာလတွင် ကမ္ဘောဒီးယားသည် အမေရိကန်ဒေါ်လာ ၂.၇၂ ဘီလီယံတန်ဖိုးရှိသည့် ထုတ်ကုန်များအား ဗီယက်နမ်သို့တင်ပို့ခဲ့ပြီး အမေရိကန်ဒေါ်လာ ၃.၀၉ ဘီလီယံတန်ဖိုးရှိသော ထုတ်ကုန်များအား ပြန်လည်တင်သွင်းခဲ့ကြောင်းသိရပါသည်။ ဗီယက်နမ်သည် ကမ္ဘောဒီးယားထုတ်ကုန်များ(အထူးသဖြင့် စိုက်ပျိုးရေးထုတ်ကုန်ကြမ်းများ)တင်ပို့ရာ ဒုတိယအကြီးမားဆုံးဈေးကွက်ဖြစ်ကြောင်း သိရပါသည်။ ကမ္ဘောဒီးယား၏ ဗီယက်နမ်သို့ အဓိကပို့ကုန်များတွင် ဆန်၊ ရော်ဘာ၊ သီဟိုဠ်စေ့၊ ပီလောပီနံ၊ ပြောင်း၊ ငှက်ပျောသီး၊ သရက်သီးနှင့် ဆေးရွက်ကြီးတို့ပါဝင်ကြောင်းသိရပါသည်။ တစ်ချိန်တည်းမှာပင် ဗီယက်နမ်ထံမှ အဓိကသွင်းကုန်များတွင် ဆောက်လုပ်ရေးပစ္စည်းများ၊ ဓာတ်မြေဩဇာ၊ တိရစ္ဆာန်အစားအစာ၊ ဟင်းသီးဟင်းရွက်နှင့် သစ်သီးများပါဝင်ကြောင်းသိရပါသည်။ ကမ္ဘောဒီးယားနိုင်ငံ စီးပွားကူးသန်းဝန်ကြီးဌာန၏ ပြောခွင့်ရပုဂ္ဂိုလ်ဖြစ်သူ Pen Sovicheat က ထိုသို့ကုန်သွယ်မှုတိုးမြှင့်လာခြင်းသည် နှစ်နိုင်ငံအကြား ကုန်သွယ်ရေးချိတ်ဆက်မှုအားကောင်းလာမှုနှင့် ကမ္ဘောဒီးယားစိုက်ပျိုးရေးထုတ်ကုန်များ ယှဉ်ပြိုင်နိုင်စွမ်းကြီးထွားလာမှုကို ရောင်ပြန်ဟပ်ကြောင်းပြောကြားခဲ့ပါသည်။ ကမ္ဘောဒီးယားကုန်သည်များအသင်း၏ ဒုတိယဥက္ကဋ္ဌဖြစ်သူ Lim Heng ကလည်း ဗီယက်နမ်သည် ကမ္ဘောဒီးယားထံမှ ကုန်ကြမ်းပစ္စည်းများလိုအပ်သောကြောင့် ကမ္ဘောဒီးယားမှ ဗီယက်နမ်သို့တင်ပို့သည့် ကုန်ပစ္စည်းများ၌ မပြုပြင်ရသေးသည့် ထုတ်ကုန်တချို့ဖြစ်ကြောင်းသိရပါသည်။ နှစ်နိုင်ငံသည် ၂၀၂၄ခုနှစ်ကုန်တွင် ကုန်သွယ်မှုအမေရိကန်ဒေါ်လာ ၁၀ဘီလီယံကျော်မည့် လမ်းကြောင်းတွင်ရှိနေပြီး လာမည့်နှစ်များတွင် အမေရိကန်ဒေါ်လာ ၂၀ဘီလီယံကျော်ရန် ရည်မှန်းထားကြကြောင်းသိရပါသည်။ လတ်တလောတွင် ဗီယက်နမ်သည် ကမ္ဘောဒီးယား၌ စုစုပေါင်း အမေရိကန်ဒေါ်လာ ၂.၉၁ ဘီလီယံတန်ဖိုးရှိသည့် ရင်းနှီးမြှုပ်နှံမှုစီမံကိန်း ၂၀၈ခုရှိပြီး ကမ္ဘောဒီးယားသည် ဗီယက်နမ်၌ စုစုပေါင်းအမေရိကန်ဒေါ်လာ ၇၅.၇၆ သန်းတန်ဖိုးရှိသည့် ရင်းနှီးမြှုပ်နှံမှုစီမံကိန်း ၃၅ခုရှိကြောင်းသိရပါသည်။
Source: Khmer Times
DOCA(ရန်ကုန်)