ဗီယက်နမ်နိုင်ငံတွင် လတ်ဆတ် ကွမ်းသီးနုများ၏ ဈေးနှုန်းများသည် တရုတ်နိုင်ငံမှ အဓိက ဝယ်လိုအားမြင့်မားမှုကြောင့် စံချိန်တင်မြင့်တက်လျက်ရှိကြောင်း သိရှိရပါသည်။
ပြည်နယ်များဖြစ်သော Quang Ngai ၊ Dak Lak ၊ Tay Ninh ၊ Tien Giang နှင့် Kien Giang တို့တွင် ကွမ်းသီးတစ်ကီလိုဂရမ်လျှင် ဗီယက်နမ်ဒေါင် ၈၀,၀၀၀ မှ ၈၅,၀၀၀ (အမေရိကန်ဒေါ်လာ ၃.၂၀) ဖြင့် ရောင်းချလျက်ရှိကြောင်း၊ မြောက်ပိုင်းဒေသများဖြစ်သည့် Bac Ninh နှင့် Nam Dinh တို့တွင် တစ်ကီလိုဂရမ်လျှင် ဗီယက်နမ်ဒေါင် ၉၀၀၀၀ အထိပေါက်ဈေးရှိကြောင်းသိရှိရပါသည်။
တရုတ်နိုင်ငံ၏ ပြည်တွင်းကွမ်းသီးနု ထုတ်လုပ်မှု ပြတ်လပ်ခြင်းကြောင့် ကွမ်းသီးဈေးနှုန်း မြင့်တက်မှုရှိပြီး လွန်ခဲ့သောလများအတွင်း အမြင့်ဈေး၌ တည်ရှိနေခဲ့ခြင်းဖြစ်ကြောင်း၊ သို့ဖြစ်ရာ ဗီယက်နမ် ကွမ်းသီးနုထုတ်ကုန်များကို တင်သွင်းမှုမှာ ပိုမိုများပြားလာခဲ့ကြောင်း ကုန်သည်များက ပြောဆိုကြသည်။
တရုတ်နိုင်ငံတွင် ကွမ်းသီးနုကို အဓိကအသုံးပြုမှုရှိပြီး ဟိုင်နန်ပြည်နယ်သည် တစ်နိုင်ငံ လုံး ကွမ်းသီးနုသုံးစွဲမှု၏ ၉၀ ရာခိုင်နှုန်းကို ထုတ်လုပ်လျက်ရှိကြောင်း၊ ၎င်းပမာဏ၏ ထက်ဝက်ခန့် သည် ၎င်းပြည်နယ်ရှိ ဝမ်နင်စီရင်စုမှ ထွက်ရှိခြင်းဖြစ်ကြောင်း၊ သို့ရာတွင် ၁၉၈၀ ပြည့်နှစ်လွန် ကာလမှစတင်၍ ကွမ်းသီးပင်များတွင် အဝါရောင်သစ်ရွက်ပိုး ကျရောက်ခဲ့သည့်အတွက် အထွက် ပမာဏ သိသိသာသာကျဆင်းခဲ့ကြောင်း သိရှိရပါသည်။
၂၀၂၄ ခုနှစ် ဇွန်လကုန်အထိ ဝမ်နင်ဒေသရှိ ကွမ်းသီးပင်များ၏ ၈၀ ရာခိုင်နှုန်း၌ အဝါရောင်အရွက်ပိုး ကျရောက်ခဲ့ရာ ၂၀၁၄ ခုနှစ်တွင် ကွမ်းသီးထုတ်လုပ်မှု တန်ချိန် ၂၂၀၀၀၀ ရှိခဲ့ရာမှ ၂၀၂၄ ခုနှစ်၌ တန်ချိန် ၄၀၀၀၀ အထိ သိသာစွာ ကျဆင်းခဲ့သည်။ ရောဂါပိုး ကျရောက်မှုအား နှိမ်နင်းခြင်းမရှိပဲ တရုတ်နိုင်ငံအနေဖြင့် အခြားနိုင်ငံများမှ တင်သွင်းခြင်းကို တိုးမြှင့်ခဲ့ရာ ဗီယက်နမ်နိုင်ငံသည် ကွမ်းသီး အဓိကပေးသွင်းသည့်နိုင်ငံအဖြစ်သို့ ရောက်ရှိလာခဲ့ပါသည်။
တရုတ်နိုင်ငံအနေဖြင့် ဗီယက်နမ် ကွမ်းသီးနုများကို တိုးမြှင့်ဝယ်ယူနေခြင်း၏ အဓိကအချက်မှာ ရိုးရာပွဲများတွင် တည်ခင်းဧည့်ခံသည့် ကွမ်းသီးနုသကြားလုံးများ ထုတ်လုပ်ရန်အတွက် ဖြစ်ကြောင်း၊ အစေ့မတည်သေးသော သို့မဟုတ် အစေ့သေးငယ်သည့် အဆင့်၌ရှိသော ကွမ်းသီးနုများကို စုစည်း၍ ရေနွေးငွေ့ဖြင့်အပူပေး၊ အခြောက်ခံပြုပြင်ပြီးနောက် သကြားလုံးအဖြစ် အဆင့်ဆင့် ပြုလုပ်ခြင်းဖြစ်ကြောင်း၊ အနည်းငယ်ချို၍ စပ်ရှရှအရသာရှိသည့် သကြားလုံးသည် အနွေးဓာတ် သတ္တိရှိခြင်းနှင့် လည်ချောင်းနာခြင်းကို သက်သာစေသည့်အတွက် ဆောင်းရာသီတွင် လူကြိုက်များသည့် အစားအစာတစ်ခုဖြစ်ကြောင်း သိရှိရပါသည်။
ထို့အပြင် ဘဲသားကြော်၊ ငုံးသားနှပ်၊ ဆန်ပြုတ်စသည့် တရုတ်ဟင်းလျာများ ချက်ပြုတ်ရာတွင်လည်း ကျန်းမာရေးအထောက်အကူပြုရန်အတွက် ကွမ်းသီးနုများကို ထည့်သွင်းအသုံးပြု လျက်ရှိကြောင်း၊ ၂၀၂၀ ပြည့်နှစ်စာရင်းများအရ တရုတ်နိုင်ငံတွင် ကွမ်းသီးနှင့်ဆက်စပ်နေသည့် ထုတ်ကုန်များ ရောင်းချမှုသည် နှစ်စဉ် ၂၀ ရာခိုင်နှုန်း တိုးတက်လျက်ရှိကြောင်း သိရှိရပါသည်။
တရုတ်နိုင်ငံမှ ဝယ်လိုအားများပြားခြင်းကြောင့် ဗီယက်နမ်နိုင်ငံ၌ ကွမ်းသီးနု ဈေးနှုန်းမှာ ၂၀၂၄ ခုနှစ်တွင် မြင့်တက်ခဲ့ရာ အထူးသဖြင့် ရှေးယခင်ကတည်းက ကွမ်းသီးအမြောက်အမြား စိုက်ပျိုးရာဒေသများမှ တောင်သူများအတွက် ဝင်ငွေသိသာစွာ တိုးတက်စေခဲ့သည်။
သို့ရာတွင် တရုတ်ဈေးကွက်အပေါ်များစွာ မှီခိုနေခြင်းသည် ဆုံးရှုံးနိုင်ခြေများပြားကြောင်း၊ တရုတ်နိုင်ငံမှ ဝယ်လိုအား လျော့နည်းခြင်း သို့မဟုတ် ဈေးကွက်မတည်ငြိမ်ခြင်း ဖြစ်ပေါ်ပါက ကွမ်းသီးနုဈေးနှုန်းမှာ ကျဆင်းလာနိုင်ပြီး စိုက်ပျိုးသူများအတွက် ဆုံးရှုံးမှုများဖြစ်ပေါ်နိုင်ကြောင်း၊ ဗီယက်နမ် ကွမ်းသီးစိုက်ပျိုးသူများအနေဖြင့် အရည်အသွေးထိန်းသိမ်းခြင်း၊ ပို့ကုန်ဈေးကွက်များ ဖြန့်ကျက်ရှာဖွေခြင်းနှင့် ကွမ်းသီးနုထုတ်ကုန်များ တိုးတက်အောင်ဆောင်ရွက်ခြင်း စသည်တို့ကို လုပ်ဆောင်ရန် လိုအပ်ကြောင်း၊ အခြားနိုင်ငံများနှင့် ပူးပေါင်းဆောင်ရွက်မှု တိုးချဲ့ခြင်းနှင့် တန်ဖိုးမြင့်ထုတ်ကုန်များ ပြုပြင်ထုတ်လုပ်မှု တိုးမြှင့်ဖော်ဆောင်ခြင်းတို့ဖြင့် ကွမ်းသီးနုလုပ်ငန်း တည်ငြိမ်စေရန်နှင့် ဆုံးရှုံးမှုများလျော့နည်းစေရန် အထောက်အကူပြုမည်ဖြစ်ကြောင်း Vietnam Plus သတင်းဌာနက ဖော်ပြထားပါသည်။
Source : Vietnam Plus, October 19, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)