မွန်ပြည်နယ်၊ ဘီးလင်းမြို့နယ်တွင် ထွက်ရှိနေသော ရှမ်းပန်းဖြူများ၏ ယခုလက်ရှိပေါက်ဈေးမှာ စိုက်ခင်းအတွင်းမှာပင် တစ်ပွင့်လျှင် (၁၀၀) ကျပ်ရရှိနေကြောင်း သိရှိရသည်။ ဘီးလင်းမြို့နယ်တွင် ပန်းအများဆုံးစိုက်ပျိုးကြသည့်ရွာများဖြစ်သော ရွှေလှေ၊ ညောင်ပုလ္လင်၊ လိပ်ခုံး၊ မုသင် စသည့်ရွာများတွင် ပန်းစိုက်ပျိုးဧက (၇၀) ဧကခန့်ရှိပြီး အချို့သောရွာများတွင်လည်း တစ်နိုင်တစ်ပိုင်စိုက်ပျိုးကြသည်။ စိုက်ပျိုးမြေတစ်ဧကလျှင် ပျိုးပင်အရေအတွက် (၄) သိန်းခန့်ဝင်ဆံ့ပြီး ပျိုးပင်တစ်ပင်၏ တန်ဖိုးမှာ (၇) ကျပ်ရှိပြီး တစ်ဧကကုန်ကျစရိတ်မှာ သိန်း (၉၀) ကျပ်ခန့်ကုန်ကျပြီး တစ်ဧကထွက်နှုန်းမှာ ၆၀ ကျော် ထွက်ရှိပါက အဆင်ပြေကြောင်း သိရှိရသည်။ ရှမ်းပန်းဖြူသည် တစ်ပင်လျှင် ခေါင်ပွင့်တစ်ပွင့် သာထားရပြီး ကျန်အဖူးများအား ချွေပေးရသည်။ စိုက်ပျိုးချိန်မှစတင်၍ (၃) လဝန်းကျင်ခန့်တွင် စပေါ်ကြောင်း သိရှိရသည်။ အဆိုပါပန်းများကို ရန်ကုန်၊ မော်လမြိုင်၊ ဘားအံ မြို့များရှိ ပန်းဒိုင်များသို့ တင်ပို့ပြီး ယခုနှစ်တွင် ပန်းစိုက်တောင်သူများ အနေဖြင့် အကျိုးအမြတ်ဖြစ်ထွန်း ကြောင်း သိရှိရသည်။
DOCA(မွန်)