အင်ဒိုနီးရှားအစိုးရသည် ကမ္ဘာလုံးဆိုင်ရာ စိန်ခေါ်မှုများနှင့် လူဦးရေ တိုးပွားလာမှုတို့ကြားတွင် နိုင်ငံ၏ စားနပ်ရိက္ခာ လုံလောက်မှု ခိုင်မာတောင့်တင်းစေရန် စပါးဧရိယာ ဟက်တာ ၃ သန်း အသစ်တိုးချဲ့ စိုက်ပျိုးရေးအစီအစဉ်ကို အကောင်အထည်ဖော်ရန် လုပ်ဆောင်နေကြောင်း သိရပါသည်။
အဆိုပါ အစီအစဉ်သည် ကမ္ဘာလုံးဆိုင်ရာ စားနပ်ရိက္ခာအကျပ်အတည်း၏ ခြိမ်းခြောက်မှုများကို ကိုင်တွယ်ဖြေရှင်းရန်နှင့် အမျိုးသားစိုက်ပျိုးရေးကဏ္ဍ တည်ငြိမ်မှုကို ထိန်းသိမ်းရန်အတွက် မဟာဗျူဟာမြောက် ခြေလှမ်းများ၏ တစ်စိတ်တစ်ပိုင်းဖြစ်ကြောင်း၊ အင်ဒိုနီးရှား၏ လူဦးရေသည် ၂၀၅၀ ပြည့်နှစ်တွင် သန်း ၃၃၀ သို့ တိုးပွားလာမည်ဟု ခန့်မှန်းထားမှုနှင့်အတူ အမျိုးသား စားနပ်ရိက္ခာ လိုအပ်ချက်သည် မြင့်တက်လာမည်ဖြစ်ကြောင်း စိုက်ပျိုးရေး ဒုတိယဝန်ကြီး Sudaryono က အောက်တိုဘာ ၂၅ ရက်နေ့တွင် ထုတ်ဖော်ပြောကြားခဲ့သည်။
တစ်ချိန်တည်းမှာပင် ကျယ်ပြန့်သော မြေယာများအား စက်မှုဇုန်များနှင့် လူနေရပ်ကွက် များ အဖြစ်သို့ ပြောင်းလဲမှုများကြောင့် စိုက်ပျိုးမြေဧရိယာများ လျော့ကျလျက်ရှိသည်။ အဆိုပါ ကိစ္စရပ်များကြောင့် စပါးစိုက်ခင်းအသစ်များ ဖန်တီးခြင်းသည် နိုင်ငံ၏ အဓိက အစားအစာဖြစ်သည့် ဆန်စပါးထုတ်လုပ်ရေးနယ်ပယ်ကို ချဲ့ထွင်ရန်အတွက် အရေးပါသော ဖြေရှင်းချက်တစ်ခုဖြစ်ကြောင်း၊ ကမ္ဘာလုံးဆိုင်ရာ ပြောင်းလဲမှုဖြစ်စဉ်များနှင့် ပြည်တွင်းလိုအပ်ချက်တို့၏ တွန်းအားအရ ၎င်းအစီအစဉ်အား ဦးစားပေးလုပ်ဆောင်ရန် သမ္မတ Prabowo Subianto က ချမှတ်ထားကြောင်း Sudaryono က ရှင်းလင်းပြောဆိုခဲ့ပါသည်။
ကမ္ဘာ့စားနပ်ရိက္ခာစနစ်သည် စီးပွားရေးမသေချာမရေရာမှုများ၊ ရာသီဥတုပြောင်းလဲမှုများနှင့် နိုင်ငံတကာစားနပ်ရိက္ခာ ထောက်ပံ့ရေးကွင်းဆက်များကို နှောက်ယှက်သည့် လက်နက်ကိုင် ပဋိပက္ခများကြောင့် ပြင်းထန်သော သက်ရောက်မှုများရှိနေကြောင်း၊ အင်ဒိုနီးရှားသည် လူဦးရေ ထူထပ်သောနိုင်ငံဖြစ်၍ ၎င်း၏စိုက်ပျိုးရေးကဏ္ဍကို အားကောင်းစေခြင်းဖြင့် စားနပ်ရိက္ခာ ဖူလုံမှု ရရှိအောင် ဆောင်ရွက်ရမည်ဖြစ်ကြောင်း ၎င်းက အလေးအနက်ထား ပြောကြားခဲ့ပါသည်။
အဆိုပါ စပါးစိုက်ခင်းများ ဖွံ့ဖြိုးတိုးတက်ရေး အစီအစဉ်တွင် အရည်အသွေးမြင့် မျိုးစေ့များ၊ ခေတ်မီဆည်မြောင်းစနစ်များနှင့် စက်မှုလယ်ယာနည်းစနစ်များ အသုံးပြုခြင်းဖြင့် ထည့်သွင်း အကောင်အထည်ဖော် ဆောင်ရွက်သွားမည်ဖြစ်ကြောင်း၊ ထိုသို့လုပ်ဆောင်ခြင်းမှ စိုက်ပျိုးရေးကဏ္ဍတွင် အလုပ်အကိုင် အခွင့်အလမ်းများ ဖန်တီးပေးပြီး ကျေးလက်ဒေသ စီးပွားရေး တိုးတက်မှုကို တွန်းအားပေးရန် အစိုးရက မျှော်လင့်ထားကြောင်း သိရပါသည်။
Source: Antara News, 25 Oct 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)