ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်၊ ရှားဖြူကုန်းကျေးရွာ၊ ကုန်းကြီးကျေးရွာ၊ ဇီးကုန်းကလေး၊ ကုန်းကလေးကျေးရွာများတွင် ပြည်လုံးချမ်းသားညွန့် (ခေါ်) အလက်တစ်ထောင်ပန်းညွန့်ကို နေအိမ်ခြံဝန်းအတွင်း စိုက်ခင်းများပြုလုပ်၍ တစ်နိုင်တစ်ပိုင် စိုက်ပျိုးကြပြီး ၎င်းကို ခြံစည်းရိုးများတွင်လည်းစိုက်ပျိုးကြပါသည်။ အလက်တစ်ထောင်အညွန့်ပင်စိုက်ပျိုးမည်ဆိုပါက မိုးရာသီတွင် အရှည်တစ်တောင်ခန့်ချိုးယူထားသော အညွန့်များကို မြေကြီးတွင် နှစ်လက်မ၊ သုံးလက်မခန့်နှစ်၍ စိုက်ပျိုးရကြောင်း၊ အကြမ်းခံသည့်အပင်အမျိုးအစားဖြစ်ပြီး ဓာတုဆေးဝါးများလည်းသုံးစွဲခြင်းမရှိသည့်အတွက် စိုက်ပျိုးမှုကုန်ကျစရိတ်သက်သာကြောင်းသိရပါသည်။
ပန်းညွန့်များကို တစ်နှစ်ပတ်လုံး ရောင်းချမှုရှိသော်လည်း ဆောင်းရာသီနှင့်နွေရာသီတွင် ပိုမိုဝယ်ယူမှုများရှိ၍ ယခုနှစ်တွင် ယခင်နှစ်ထက် စောစီးစွာ အရောင်းသွက်လျက်ရှိကြောင်းသိရပါသည်။ ယခင်နှစ်က ပန်းညွန့်တစ်ညွန့်လျှင် လက်လီ (၃၅)ကျပ်၊ လက်ကား (၂၀)ကျပ်နှုန်းဖြင့်ရောင်းချခဲ့ပြီး ယခုနှစ် နိုဝင်ဘာလ ဒုတိယပတ်တွင် ပန်းညွန့်တစ်ညွန့်လျှင် လက်လီ (၅၀)ကျပ်၊ လက်ကား (၃၀) ကျပ်နှုန်းဖြင့် အိမ်အရောက် ဝယ်ယူမှုများရှိကြောင်း ပန်းညွန့်စိုက်ပျိုးသူများထံမှသိရပါသည်။
DOCA(ပဲခူး)