မကွေးတိုင်းဒေသကြီး၊ ဆိပ်ဖြူမြို့အနောက်ပိုင်းရပ်ကွက်တွင် ကြက်သွန်နီ အရောင်းအဝယ်ဖြစ်လျက်ရှိသော ကုန်စည်ဒိုင်သို့ ဧပြီလ(၁)ရက်မှ(၇)ရက်အထိ ပထမ(၁)ပတ်အတွင်း ကြက်သွန်နီ ဆောင်းစိုက်ပင်စိုက် အသစ် များ ဆိပ်ဖြူ မြို့နယ်ဒေသတွင်း နေရာအနှံ့အပြားမှ နေ့စဉ်ဝင်ရောက်လျက်ရှိကြောင်း တစ်ရက်လျှင်ပျမ်းမျှ ကြက်သွန်နီ ကုန်ချိန်ပိဿာ (၆)သောင်းခန့် (၁)ပတ်အတွင်း စုစုပေါင်းပိဿာ(၄)သိန်းဝန်းကျင်ခန့် ကုန်စည်ဒိုင်သို့ ဝင်ရောက်ပြီး အရောင်းအဝယ်ဖြစ်လျက်ရှိကြောင်း သိရှိရပါသည်။
ဧပြီလ ပထမပတ်အတွင်း ကြက်သွန်နီအသစ်(၁)ပိဿာ ထိပ်စရှယ်အမြင့်ဆုံးဈေးနှုန်းမှာ (၆၇၅ ကျပ်မှ ၅၆၀ ကျပ်ထိ) ကုန်စည်ဒိုင်ဖြတ်ဈေးနှုန်းဖြစ်ခဲ့ပြီး အနိမ့်ဆုံးဈေးနှုန်းမှာ (၄၅၀ ကျပ်မှ ၃၀၀ ကျပ်ထိ) ဈေးနှုန်းများ ဖြင့် အရောင်းအဝယ်ဖြစ်ခဲ့ကြောင်း၊ ကြက်သွန်နီ ထွက်ကုန်အရည်အသွေးများ မတူညီခြင်း ကြောင့် ဈေးနှုန်းများကွာခြားကြောင်း၊ ယခင်(၁)ပတ်ကြက်သွန်နီအမြင့်ဆုံး ဈေးနှုန်းမှာ (၆၂၅)ကျပ် ဖြစ်ပြီး ယခု(၁)ပတ်အမြင့်ဆုံးဈေး မှာ(၆၇၅)ကျပ်ဈေးဖြင့် အရောင်းအဝယ်ဖြစ်၍ ယခင်(၁)ပတ် ထက်(၅၀)ကျပ်ခန့် ဈေးနှုန်းမြင့်တက်ခဲ့ကြောင်း၊ အနိမ့်ဆုံးဈေးနှုန်းမှာ ယခင်(၁)ပတ်က (၅၀၀)ကျပ် ၊ ယခု(၁)ပတ် (၄၅၀)ကျပ်ဖြစ်၍ (၅၀)ကျပ်ခန့် ဈေးနှုန်းကျဆင်း သွားကြောင်း၊ ပြည်ပဝယ်လက် နည်း၍ ဈေးနှုန်းအတက်အကျကွာဟမှုမရှိသေးကြောင်း ကုန်စည်ဒိုင်ဈေးကွက်မှ သိရှိရပါသည်။
ဆိပ်ဖြူမြို့တွင် ကြက်သွန်နီအသစ်(၁)ပိဿာလျှင် လက်လီဈေးနှုန်းအနေဖြင့် ထိပ်စရှယ် (ကျပ် ၁၀၀၀/၉၀၀)၊ လတ်(ကြီး)(ကျပ် ၈၀၀/၇၀၀)၊ လတ်(သေး)(ကျပ် ၆၀၀/၅၀၀) ဈေးနှုန်းများ ဖြင့် အရောင်းအဝယ်ဖြစ်လျက် ရှိပြီး ကုန်စည်စီးဆင်းမှုအနေဖြင့် ဧပြီလ ပထမ(၁)ပတ်အတွင်း ဆိပ်ဖြူမြို့မှ ရန်ကုန်ဘုရင့်နောင်သို့ ကားစီးရေ(၃၄)စီး၊ ပြည်မြို့(၇)စီး၊ ပုသိမ်(၆)စီး နေ့စဉ် ၆/၁၂ ဘီး မော်တော်ယာဉ်များဖြင့် စုစုပေါင်း ကားအစီးရေ(၄၇)စီးခန့် ထွက်ရှိပြီး တန်ချိန်(၂၅၀၀၀)ခန့် ကုန်စည် စီးဆင်းခဲ့ကြောင်း သိရှိရပါသည်။
DOCA(မကွေး)