မကွေးတိုင်းဒေသကြီး၊ ပခုက္ကူမြို့နယ်၊ ကြက်သွန်နီ စိုက်ပျိုးရာဒေသများဖြစ်သော ရေစကြို၊ ပေါက်၊ ကမ္မ၊ ရေပြာနယ်များမှ ဆောင်စိုက်ပင်စိုက်ကြက်သွန်နီများ အရောင်းအဝယ် ဖြစ်လျက် ရှိနေပါသည်။ ပခုက္ကူမြို့နယ်အတွင်းရှိ ကြက်သွန်နီ စိုက်ပျိုးရာဒေသများသာမက အခြားမြို့နယ်များမှလည်း ဝင်ရောက်အရောင်းအဝယ်ဖြစ်နေကြောင်း၊ ၂၀၂၄ခုနှစ်၊ နိုဝင်ဘာလ (တတိယပတ်)တွင် ကြက်သွန်နီဈေးနှုန်းများ အနည်းငယ်ကျဆင်းနေကြောင်း၊ အရောင်းအဝယ်မှာလည်း အေးလျက်ရှိကြောင်း ကြက်သွန်ကုန်သည်များထံမှ သိရှိရပါသည်။ ပခုက္ကူကြက်သွန်နီ ကုန်စည်ဒိုင်သို့ ပခုက္ကူမြို့နယ်ထွက် ကြက်သွန်နီများသာမက စစ်ကိုင်းတိုင်းဒေသကြီး၊ ပုလဲနယ်မှ ကြက်သွန်နီများလည်း ဝင်ရောက်အရောင်းအဝယ်ဖြစ်လျက်ရှိကြောင်း သိရသည်။
ယခုနိုဝင်ဘာလ(တတိယပတ်)တွင် ယောဒေသထွက် ကြက်သွန်နီ ထိပ်စ တစ်ပိဿာလျှင် ကျပ် (၃၁၀၀)၊ အလတ်စ တစ်ပိဿာလျှင် ကျပ်(၃၀၀၀)၊ အနိမ့်စတစ်ပိဿာလျှင် ကျပ်(၂၉၀၀)၊ ပုလဲကြက်သွန်နီ ထိပ်စတစ်ပိဿာလျှင် ကျပ် (၃၃၀၀)၊ အလတ်စတစ်ပိဿာလျှင် ကျပ်(၃၂၀၀)၊ အနိမ့်စတစ်ပိဿာလျှင် ကျပ်(၂၈၀၀)ဖြစ်ပြီး ယခင်(ပထမပတ်)တွင် ယောဒေသထွက် ကြက်သွန်နီ ထိပ်စ တစ်ပိဿာလျှင် ကျပ်(၃၉၀၀)၊ အလတ်စတစ်ပိဿာလျှင် ကျပ်(၃၆၀၀)၊ အနိမ့်စတစ်ပိဿာ လျှင် ကျပ်(၃၀၀၀)၊ ပုလဲကြက်သွန်နီ ထိပ်စတစ်ပိဿာလျှင် ကျပ်(၃၆၀၀)၊ အလတ်စ တစ်ပိဿာ လျှင် ကျပ်(၃၃၀၀)၊ အနိမ့်စတစ်ပိဿာလျှင် ကျပ်(၃၀၀၀)ဖြစ်ခဲ့၍ နိုဝင်ဘာလ(ပထမပတ်)နှင့် ဈေးနှုန်းနှိုင်းယှဉ်ပါက တစ်ပိဿာလျှင် ကျပ်(၈၀၀)ခန့် ဈေးကျဆင်းပြီး အရောင်းအဝယ်ဖြစ်လျက် ရှိကြောင်း၊ နေ့စဉ် အရောင်းအဝယ် ဖြစ်မှုကုန်ချိန်မှာ ပိဿာချိန်(၃)သောင်းမှ (၅)သောင်းအထိ အရောင်းအဝယ်ဖြစ်နေပြီး တင်ပို့မှုအနေဖြင့် ရန်ကုန်ဘုရင့်နောင်ကုန်စည်ဒိုင်သို့ နေ့စဉ်တင်ပို့နေကြောင်း ကုန်သည်များထံမှ သိရှိရပါသည်။
DOCA(မကွေး)